Synopsis: Sovereignty Restoration Day is a monument reminding everyone that there are governments that enforced the idea of pono.

‘O ka Lā Ho’iho’i Ea nō ‘o nehinei. A he kia hoʻomana’o nō ua lā nei e hō’ike ana iā kākou nā kānaka a puni ka honua, aia nō kekahi aupuni i hana no ka pono o ka Lāhui Hawai’i.

He aupuni ia i ‘ike i ka hana hewa a kekahi o kona mau luna kaua, a ho’oponopono ‘ia aku nō, ‘o ia ho’i, ua ho’iho’i ‘ia maila ke ea o ka ‘āina, a ua mau ke ea o ka ‘āina i ka pono.

‘Eā, ‘a’ole i ‘ōlelo mai ka Mō’īwahine o ‘Enelani, auē, ua pau ke ea i ke kā’ili ‘ia, ‘a’ole hiki ke ho’iho’i ‘ia. Ua ‘ike ‘o ia i ka hewa i hana ‘ia, a ‘o kona ho’oponopono akula nō ia.

‘Oko’a ‘o ‘Enelani, a ‘oko’a ho’i ‘o ‘Amelika. ‘O ‘Amelika, kāka’ikahi paha kona nānā ‘ana i ka pono o kekahi aupuni. Mai hana ‘o ia no ka pono o ka Lāhui Hawai’i, inā ‘a’ole i kū ‘o Pelekikena Makinalē i ka moku. Akā, ma waho o kēlā, he ‘ole wale nō.

E aho paha ka lilo ‘ana o ka Lāhui Hawai’i ma lalo o ‘Enelani. ‘A’ole nō e hana ‘ino ‘ia. ‘O ke aupuni moku’āina o Hawai’i kekahi mea hana hewa.

E ha’i mai ana, ua hala ka Pu’ulena, ‘a’ole hiki ke ho’opau ‘ia ke kūkulu ‘ia ‘ana a’e o ka Hale ‘Ohe Nānā Kanakolu Mika ma Mauna Kea a me kahi ‘Ohe Nānā Lā ma Haleakalā. ‘A’ole i ho’omaka ke kūkulu ‘ana ma Mauna Kea. Pehea lā e hiki ‘ole ai ke ho’opau ‘ia ke kūkulu ‘ana, ‘a’ole i ho’omaka ka hana.

A inā i ho’omaka ke kūkulu ‘ana, he aha lā ka mea e hiki ‘ole ai ke ho’opau ‘ia, no ka mea, ke kali ‘ia nei ka ‘ōlelo ho’oholo o ka ‘aha ho’okolokolo ki’eki’e o Hawai’i.

A aloha nō ka po’e aloha ‘āina i hopu ‘ia aku nei i ka wana’ao o ka Pō’ahā nei ma Haleakalā a me Mauna Kea. Mahalo iā ‘oukou, e nā Kū Kia’i Mauna mai kinohi a i kēia manawa, i ko ‘oukou kūpa’a ‘ana ma hope o ka ‘āina.

Ka Lā Ho’iho’i Ea ma Kamaki Kuea.

E naue aku paha ‘oukou e nā makamaka heluhelu i Kamaki Kuea i kēia lā, ka lā mua o ‘Aukake, no ka ho’onanea ‘ana a me ke a’o ‘ana mai paha i nā mo’olelo e pili ana i ka Lā Ho’iho’i Ea a me nā hana like ‘ole.

He mau Hawai’i Alaka’i e ha’i ‘ōlelo ana a e ho’okani pila ana kekahi mau pu’ukani kaulana o ka ‘āina. E lawe pū i kou ‘ohana, nā hoa aloha, a me kahi luna aupuni nō paha. E ho’omaka ana i ka hola 12:00 o ke awakea, a e pau ana i ka hola 6:00 o ke ahiahi.

Ka’i Huaka’i Aloha ‘āina.

I kēia Lāpule a’e, ka lā 9 o ‘Aukake, e ka’i huaka’i ana ka po’e Aloha ‘āina ma Waikīkī no ka hō’ike ‘ana i ke alu like ‘ana ma ke aloha ‘āina. E ‘ākoakoa ana kānaka ma ke alanui ‘o Saratoga i ka hola 10:00 o ke awakea, a e ka’i ana no Kapi’olani Pāka. A ma Kapi’olani Pāka, aia ana nā ha’i ‘ōlelo, ka mea ‘ai e kū’ai ai, nā pu’ukani a pēlā aku.

———

E ho‘ouna ‘ia mai na ā leka iā māua, ‘o ia ho‘i ‘o Laiana Wong a me Kekeha Solis ma ka pahu leka uila ma lalo nei:

>> kwong@hawaii.edu

>> rsolis@hawaii.edu

a i ‘ole ia, ma ke kelepona:

>> 956-2627 (Laiana)

>> 956-2627 (Kekeha)

This column is coordinated by Kawaihuelani Center for Hawaiian Language at the University of Hawai‘i at Mānoa.