Column: Ua aeoia ka Puuhonua o Puuhuluhulu

Synopsis: The Puuhonua o Puuhuluhulu is a wonderful example of governance that operates smoothly, under Hawaiian control, despite the misinformed disparaging characterization made by the governor prior to his visit.

Aloha e na hoa aloha aina, na mamo a Haloa, na pua kaulana hoi o ka aina. He leo aloha keia i na kiai mauna a puni ka honua nei. He koa aloha aina oukou e noho paa nei i ka malu o Puuhuluhulu i ke kiai mau aku i ko kakou kupuna, ia Maunakea. Ua kipa ka oukou mea kakau i ua puuhonua nei a he moolelo pokole keia e waiho ia aku nei i mua o oukou.

Ua hookumu ia ka Puuhonua o Puuhuluhulu ma ka ehu kakahiaka o ka la 13 o Iulai, ma ka po o Hua, i ka malama o Hinaiaeleele, e ka Royal Order of Kamehameha. He hana keia i ike ole ia no na hanauna he nui. Na keia hui i hoomakaikai a maka akula i na kihi o ka puuhonua me na ohe ku kilakila me na lepa e welo mai ana. A ua hoolaa ia o Puuhuluhulu ma o na pule, na oli, a me na hookupu i mea e ku ai ka mana o ka lahui i laila.

He manao ko na makai e lilo mai ia puu i wahi no lakou e hoomoana ai a e kokua ai i na poe kukulu TMT i ka pii ana i uka. Ma mua nae o ko lakou la nee ana i laila, he eleu aku ka hana a na kiai mauna i ke kaili mai i ia wahi i puuhonua no lakou e noho ai me ka palekana. Hu ka eleu a akamai o ka poe hoonee kaua a me na kuhikuhi puuone o neia au! Ua puiwa ke aupuni mokuaina, a puiwa pu hoi me ka DLNR a me ka DHHL. Ua laa maila ia wahi a ua lilo no i wahi e palekana ai ka lehulehu aloha aina e ku ana i kiai no ka mauna. Ma laila e ola ai ke aloha maoli o ko kakou lahui! He kapu aloha ke ano, he aloha aina hoi, a he aloha kekahi i kekahi.

Eia mai na kuleana, o ke kahu ai a me ka lawelawe ai, o ka malama i na lako i haawi manawalea ia mai e ka lahui, o ka malama ola, ka hoomaemae lumi hoopaupilikia, ka malama i ka poe e ae ana i ke alanui, ka malama kupuna e noho paa ana i waena alahele, a me ka hoonaauao ana i ka lehelehu ma ke kula nui o Puuhonua o Puuhuluhulu. He mau kuleana koikoi ia no ka holo pono ana o na hana. He kaiaulu nani ia me ke kamahao. He kumu hoohalike pono ia no ke aupuni mokuaina. Hanai ia na poe a pau me ka nana ole i ia mea he kala. E hele na kanaka a pau a moe i ke ala, aohe mea nana ia e hoopilikia. Ua lako ka hale i na pono a pau, a ua maemae hoi kau! He ohana aloha aina nui no ia!

Hu mai ka haaheo ke ike aku i ka lokahi a me ka maluhia o na kiai mauna. He walaau me ka oiaio, aole like me ka olelo wahahee a ke kiaaina Ige. O ka puni kukulu ohe nana, o ia paha kona kuko nui i hakuepa ai no na hana lapuwale a ka poe o ka puuhonua. O ka moe lepo oe, o ka hana laau ino, ia mea aku, ia mea aku. I mea ia e haku wale ai no ke kulana kupilikii o ia aina a hoouna mai ai i na makai. O ke ano ia o ke aupuni noho hewa ma Hawaii. Ke ike ahuwale ia nei ka nani o ka nohona o na Hawaii ma Puuhuluhulu e ko ka honua a puni; he kapu aloha. Ma laila e akaka ai ua hiki i ka lahui ke noho aeoia, e like me ko kakou mau kupuna. Ua kani ka pu! Ke hea mai nei ka mauna i na hoa aloha aina, e pii i uka a e Ku Kiai Mauna!

E ho‘ouna ‘ia mai na ä leka iä mäua, ‘o ia ho‘i ‘o Laiana Wong a me Kekeha Solis ma ka pahu leka uila ma lalo nei:

>> kwong@hawaii.edu

>> rsolis@hawaii.edu

a i ‘ole ia, ma ke kelepona:

>> 956-2627 (Laiana)

>> 956-2627 (Kekeha)

This column is coordinated by Kawaihuelani Center for Hawaiian Language at the University of Hawai‘i at Mänoa.