Synopsis: Was the alleged actions of the four U.S. Marines inappropriate? Who should be held accountable?

Welina e nā makamaka heluhelu. Ua lohe iho nei paha ‘oukou e pili ana i ia mau koa malina e mana’o ‘ia nei, ua mimi akula i luna o nā kino kupapa’u o ke Kalipana.

A i ka ‘ike ‘ana aku o ko ‘oukou mea kākau i ia hana māna’ona’o, kau a’ela kona weli no ka mana’o, aia nō he mau kānaka ma ka honua nei e mimi ma luna o ke kanaka make. A kau ka mana’o i nā kūpuna o kākou, inā mimi ‘ia ko lākou kino kupapa’u a iwi paha, auē, he aha lā ka hana a ko ‘oukou mea kākau, akā, e kū ana paha ka mākaia ma ia hope aku. ‘A’ole paha ho’i e hihi, aia nā koa malina ma Afghanistan e kaua akula, ‘a’ole ma Hawai’i nei. Ō…Alia. Aia nō ho’i nā koa malina ma Hawai’i nei. Pehea, e hana like paha lākou ma ‘ane’i nei? E ‘ōlelo mai auane’i paha kekahi, “’A’ole lākou e hana pēlā ma Hawai’i nei, no ka mea, ‘a’ole ke kaua ma kēia pae ‘āina a ‘a’ole ‘o ka Hawai’i ka ‘enemi.” Eia ka pane a ko ‘oukou mea kākau, he kaua nō paha, he ‘ano ho’opa’apa’a, kahi i lilo ai ka Hawai’i i ‘enemi ma kekahi ‘ano, ‘o ia ho’i ke kū’ē ‘ana o ka Hawai’i i ka hana ‘ino ‘ana a ka Pū’ali Koa i ka ‘āina o kākou. Ke lana nei ka mana’o, ‘a’ole e hana nā koa malina pēlā i nā iwi e loa’a iā lākou, a e mālama pono lākou i nā iwi ke loa’a.

Akā, inā he mana’o ko nā koa malina, ‘oko’a kēia, ‘oko’a ke kaua ma Afghanistan, a laila, pehea? He hiki nō ke ho’ohaumia ‘ia ka ‘enemi ma ke kaua ‘ana i kona wā e make ai?

‘O ke kaua, he mea ho’omake nō ia a no laila, he mau lula ‘oko’a paha. ‘O ia ka mana’o o kekahi mau kānaka no ia po’e Kalipana i mimi ‘ia. “He kaua ia, a ua hā’ule lākou.” A pēlā nō ko lākou mana’o, akā, ua no’ono’o paha ia mau kānaka, inā ‘o ko lākou ‘ohana ia e mimi ‘ia ana e ka po’e Kalipana? E like kā lākou ‘ōlelo? “He kaua ia, ua hā’ule lākou.” ‘A’ole paha.

Wahi a ke Kuhina Pale Kaua Leon Panetta, ‘o ia hana a nā koa malina ‘ehā, he hana kūpono ‘ole ia i nā lālā o ka pū’ali koa o ‘Amelika. Akā, inā pēlā, ua a’o ‘ia lākou, ‘a’ole e mimi i ke kino kupapa’u i loko o ka wā kaua? I hewa lākou i ke kumu. A no laila, ‘a’ole paha ‘o ia mau koa malina ke ho’opa’i ‘ia, ‘o nā luna a pau o lākou kekahi e ho’opa’i ‘ia. I a’o mai lākou a pau loa i ka ha’awina.

(‘Ane like ka hana a ia mau koa malina me ka hana ‘ino ‘ia ‘ana o nā iwi kupuna e ia mau hui kūkulu ‘āina ma ka hu’e ‘ana a me ka waiho ‘ana a malo’o i ka lā. Akā, ‘a’ohe paha no’ono’o iki o nā luna o ia mau hui i ka pono o nā iwi kupuna a me ka pono ho’i o nā mamo a ia mau kūpuna. Aloha nō. Ke lana nei ka mana’o, e pau ia ‘ano hana a mālama pono ‘ia nā iwi kupuna ma kēia hope aku. Luna Ho’oponopono)

E ho’ouna ‘ia mai nā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:

This column is coordinated by Kawaihuelani Center for Hawaiian Language at the University of Hawai’i at Mānoa.