Ua ao Hawai’i, ke ‘ōlino nei mālamalama

Synopsis: Great presentations from two students from the MA program of Kawaihuelani.

———

Welina mai e nā makamaka heluhelu o nei pae’āina, he wā kēia e piha hau’oli ai ka na’au o kānaka, ‘oiai, i ka pule nei i hala, i ka Pō’akolu nei ho’i, ua ‘ike kūmaka ‘ia kekahi mau mea e holo mua ai kēia ho’ōla hou a ho’omau ‘ana i ka ‘ōlelo Hawai’i, ka ‘ōlelo ho’i a ko kākou po’e kūpuna. ‘O ia mau mea e kama’ilio ‘ia nei, ‘o ia ka hana a kekahi mau haumāna o Kawaihuelani, ke ke’ena ‘ōlelo Hawai’i o Hawai’inuiākea o ke Kulanui o Hawai’i o Mānoa.

Ua kūpale aku nei kekahi mau haumāna ‘elua i kā lākou papahana laeo’o ‘ōlelo Hawai’i. A he mau papahana ia e ulu ai ka hoi o kākou. He mau haumāna nō lāua nei no Kawaihuelani, a he mau limahana nō ho’i no Kawaihuelani.

‘O Kainoa Wong ka mua, a he kumu ‘ōlelo Hawai’i no Kawaihuelani no nā makahiki lō’ihi. Ua hele a kama’āina ko ‘oukou mea kākau iā ia mai ka wā a Kainoa e hele ana i ke kulanui ma ke ‘ano he haumāna laepua. He keu ‘o ia a ka ‘eleu, he ‘olu’olu, a ua maika’i ma nā ‘ano a pau. He welo paha ia ma kona ‘ohana, no ka mea, ua like pū kona mau kaikaina. I ulu nō ka lālā i ke kumu, ‘o ia ho’i, ‘o nā mākua a me nā kūpuna o Kainoa, ‘o ia nō ke kumu.

A he pili paha ia ‘ano ‘eleu i ka mea a Kainoa i ‘ōlelo a’e ai ma kāna ha’i ‘ōlelo, ‘o ia ho’i, he nohona ka hana paniolo. He maika’i nō kāna ha’i ‘ōlelo ‘ana, a ua ahuwale kona akamai a mākaukau ho’i ma ka hana paniolo. A pēlā pū ke ahuwale o kona mahalo i ka ‘ohana a me nā kūpuna.

Ua hana nō ho’i ‘o Kainoa i mo’olelo wikiō a i kapa ‘ia ho’i ‘o “He Mo’olelo Paniolo.” A he mo’olelo maika’i wale ia, mai ka pipi mua loa i hiki mai i Hawai’i nei a i nā mea hou o kekahi mau wahi hānai holoholona. A ‘o kekahi mea maika’i, he a’o nō ua Kainoa nei i ka hana paniolo i kāna mau haumāna.

A ‘o ka lua o ka haumāna i ha’i ‘ōlelo, ‘o ia nō ‘o Alicia Perez. A ‘o ia nei kekahi limahana o ke ke’ena o Kawaihuelani. Ma muli o ka hana pū ‘ana o ko ‘oukou mea kākau me ua limahana nei, ua ‘ike kūmaka nō i ke ‘ano maika’i o ua Alicia nei, a me ka ho’okō kuleana. A he keu ho’i ‘o ia nei a ka ‘olu’olu.

‘O ke kumuhana o kāna papahana, ‘o ia ke kākau leka ‘ana a ka Mō’īwahine Emalani lāua me kona makuahine. A ‘o ke kumuhana kūpono ia, ‘oiai, he wahine puni kākau leka nō ua Alicia nei. ‘O kekahi makemake o ia nei, ‘o ia ke kanu a ho’oulu ‘ana i ka ‘ano’ano makemake kākau leka i loko o nā kānaka a pau. Wahi āna, he au kelepona pa’alima kēia, me ka ho’oili leka uila (email/text) paha. Akā, ke lana nei ko ia nei mana’o, e nui hou nā kānaka kākau leka ma kēia hope aku.

He nui nā mea i ulu ai ka hoi. ‘O kekahi, ‘o ia nā mea pilina ‘ōlelo a pilina hua’ōlelo paha. ‘O kekahi mea a Alicia i hō’ike mai ai, he ‘oko’a ka hua ‘ōlelo ‘o ho’ouna, ‘oko’a ho’i ‘o ho’oili. A kuhihewa nō ko ‘oukou mea kākau ma mua, ‘o ka ho’ouna leka ka mea kūpono, akā, ‘o ho’oili ka ‘ōlelo ma’a mau a nā kūpuna. A he nui hou aku nā mea hoihoi a ua haumāna ‘eleu nei i hō’ike a’e nei ma kāna ha’i ‘ōlelo.

Mahalo iā ‘olua, e Kainoa a me Alicia, no ka noke ‘ana aku i ka hana e holo mua ai kākou.

———

E ho’ouna ‘ia mai na ā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:

>> kwong@hawaii.edu
>> rsolis@hawaii.edu

a i ‘ole ia, ma ke kelepona:

>> 956-2627 (Laiana)
>> 956-2627 (Kekeha)

This column is coordinated by Kawaihuelani Center for Hawaiian Language at the University of Hawai’i at Mānoa.