I Ulu I Ke Kumu

Synopsis: I Ulu I Ke Kumu honors five community members who have made a commitment to excellence in Native Hawaiian education.

———

Welina e nā makamaka heluhelu o Kauakūkalahale, e hiki koke ana ia ‘aha’aina, kahi e ho’ohanohano ‘ia ai kekahi mau Hawai’i Alaka’i nāna i a’o a mālama i nā pua o ka ‘āina i mea e ulu ai a nui, a nani, a ikaika. A he mau kānaka kēia na kākou e maliu ai a e mahalo ai ho’i no kā lākou mau hana a puni kēia pae ‘āina.

E kau ana ‘elima mau kānaka i ka hano hāweo i kēia makahiki. ‘O ka mua, ‘o ia nō ‘o Kauka Michael J. Chun. Ua puka ‘o ia nei mai ke Kula ‘o Kamehameha no nā keikikāne i ka makahiki 1961. Mai ka makahiki 1988, e lawelawe ana ‘o ia i ka hana ma ke ‘ano he pelekikena a ma ke ‘ano he haku paha ma nā Kula ‘o Kamehameha ma Kapālama. He nui nō ke aloha a me ka mahalo o nā kumu a me nā haumāna o ia kula i nei kanaka.

‘O ka lua o ke Alaka’i e kau ana i ka hano hāweo, ‘o ia ‘o Nanette Mossman Judd. He nui nō kona mau makahiki e lawelawe ana i ka hana e pono ai ke ola kino o nā kānaka a puni ‘o Hawai’i nei, he 46 makahiki a ‘oi. A no nā makahiki he 30, ‘o ia ka luna o ka polokalamu ‘Imi Ho’ōla ma ke Kula Lapa’au o ke Kulanui o Hawai’i ma Mānoa. He polokalamu ia kahi e kōkua ana i nā haumāna e lilo i kauka. ‘A’ole o kana mai ka mahalo o nā kānaka iā ia nei a me kāna hana.

‘O ke kolu o ke kumu ulu pono e ho’oheno ‘ia ana i ia ahiahi, ‘o ia ‘o J. Kimo Alama Keaulana. He keu ‘o ia nei o ke kanaka akamai ma nā mele a me nā hula a me ka ‘ōlelo Hawai’i. He pu’uwai hāmama nō ko ia nei, a nui nō kāna mau haumāna i a’o ai i nā ‘ike like ‘ole i pa’a iā ia. E ‘ole ‘o ia nei, laha ai kekahi mau ‘ike i mana’o ‘ia, ua nalowale. Hau’oli nō paha nā kūpuna a me nā kumu āna i kāna hana e mau ai ko lākou ‘ike.

‘O ka hā a me ka lima o ke kumu kūpa’a ma ka ‘āina, he mau kōko’olua lāua nei, ‘o ia ‘o Lynette lāua ‘o Richard Paglinawan. Ua noke lāua nei i ke kōkua ‘ana a me ke a’o ‘ana i nā Kānaka Maoli ma nā mea e pono ai ke ola kino a me ke ola no’ono’o, he 40 makahiki a ‘oi. E ola mau ka lāhui i kā lāua hana.

‘O ia nā Alaka’i ‘elima e ho’ohanohano ‘ia ana i ke ahiahi o ka lā 24 o kēia mahina nei. ‘O ka mea minamina, ua pau iho nei nā likiki i ke kū’ai ‘ia.

‘O “I Ulu I Ke Kumu,” he ho’oulu kālā ia no ka Waihona Kālā Hele Kulanui o Hawai’inuiākea, ke Kula ‘Ike Hawai’i o ke Kulanui o Hawai’i ma Mānoa. A no laila, ‘o nā kānaka e mana’o ana e kāko’o i ia papahana nāna e kōkua i nā keiki hele kula nui, a i nā mākua a kūpuna nō ho’i paha, e kāhea iā Hawai’inuiākea ma ka helu, 956-0980.

A inā he nīnau paha kāu, a he mana’o paha e ho’ohanohano aku i kekahi “kumu” i ulu ikaika ai nā lālā o Hawai’i nei, e kāhea mai nō ho’i iā Hawai’inuiākea ma ka helu, 956-0980.

[Mahalo iā ‘oe, e Terii (David Lee Rogers), no ke kākau ‘ana i ka mo’olelo o kēlā pule aku nei. Ua pū’iwa loa ka no’ono’o i ka heluhelu ‘ana i ia ‘ano hana na’aupō o ia kula ma Wakinekona i kēia mau lā Kainō, ua hala ia mau lā, eia kā, ‘a’ole loa. LH]

———

E ho’ouna ‘ia mai na ā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:

>> kwong@hawaii.edu
>> rsolis@hawaii.edu

a i ‘ole ia, ma ke kelepona:

>> 956-2627 (Laiana)
>> 956-2627 (Kekeha)

This column is coordinated by Kawaihuelani Center for Hawaiian Language at the University of Hawai’i at Mānoa.