Ka Lā Ho’iho’i Ea

Synopsis: Sovereignty Restoration Day will be celebrated this Sunday at Thomas Square Park, which brings to question what else needs to be restored.

———

Aloha mai kākou e nā hoa puni ‘oia’i’o a me nā hoa kū i ka pono. Eia ke hiki koke maila ka lā 31 o Iulai, a ‘o ka Lā Ho’iho’i Ea nō ia. Pōmaika’i ko ‘oukou mea kākau i ke kama’ilio ‘ana aku iā ‘Analū Perez ma ka Pō’alua nei. E ‘ole ‘o ia, ho’omaopopo ‘ia ai ua lā nui nei e ko ‘oukou mea kākau a me nā hana e mālama ‘ia ana ma Kamaki Kuea i ka lā ‘apōpō, ka Lāpule ho’i, ka lā 29 o nei mahina mai ke kū ‘ana o ka lā i ka lolo (ka hola 12:00) a i ka hola 6:00 o ke ahiahi. I ka makahiki 1843 ia ho’iho’i ‘ia ‘ana mai o ke ea o ka ‘āina. A mai ia manawa mai, ua lilo ia lā i lānui no ka lāhui Hawai’i. A piha hau’oli ka na’au o ko ‘oukou mea kākau i ka mālama hou ‘ia ‘ana o ia lā i lānui no kākou mai ka makahiki 1985 a hiki i kēia lā.

‘O ka mea ‘āpiki, ‘a’ole nō i maliu iki mai nā luna aupuni o ‘Amelika. ‘Ane’ane e piha nā makahiki he 30 a ‘a’ole i ho’iho’i mai ‘o ‘Amelika i ke ea o ka ‘āina. Kainō, e ‘ike ana ko ‘Amelika i ka hana pono a e hana like, eia kā, ‘a’ohe luna aupuni pono o laila. Ma kēia hope aku paha.

E maika’i ana ka hana o ka Lā Ho’iho’i Ea ma Kamaki Kuea. He mau hana ho’olaule’a, a he mau hana a’o nō ho’i e pili ana i nā nīnau like ‘ole i mua o kākou.

A ‘oiai, ke kama’ilio ‘ia nei ka ho’iho’i, eia mai kahi mea e no’ono’o ai. Pehea ka ho’iho’i ‘ia ‘ana o ka ‘āina o nā kūpuna o kekahi o kākou i hana ‘āpuka ‘ia e kekahi o nā haole o ia au. E like ho’i me ka mo’olelo a Mary Kaleikoa i ha’i mai ai ma Ka Leo Hawai’i e pili ana i ia ‘ano hana a Sam Damon. Penei ka mo’olelo:

Kēia George Houghtailing, ‘o ia ka waha ‘ōlelo o Sam Damon, hele i waena o nā po’e Hawai’i, ‘ōlelo akula me kēia nei, “’auhea ‘oe, inā ‘oe makemake i kōkua, hiki nō iā Sam Damon ke kōkua iā ‘oe.” A i kēia pule maybe hele ko’u kupunakāne kanawalu kālā paha a i kekahi pule aku kanahiku kālā, pēlā e pi’i li’ili’i ai a piha ka haneli, mau haneli kālā a hele maila ‘o George Houghtailing, “’auhea ‘oe, ‘ai’ē ‘oe iā Sam Damon, eia kou pila.” But, kēlā hua’ōlelo kōkua that means help, ‘a’ole i ‘ōlelo mai ē ‘ai’ē…’o ia ka mea hewa…’ōlelo aku nei ko’u kupunakāne, “’A’ole au hele i ka hana, ‘a’ohe a’u kālā e uku ai, but, he ‘āina ko’u,” and ki’i ‘o ia ma ka ‘āina waiwai, loa’a ka wai, wai puna, lawe ‘o ia i kēlā ‘āina.

A ‘o ia ihola ka mo’olelo mai ka waha mai o Mary Kaleikoa. A i ka makahiki 2004, ua ‘ōlelo ‘ia, e lilo ana he $500 miliona i nā ho’oilina o Damon. Eia ka nīnau, he hiki i nā ho’oilina o ke kanaka i hele a waiwai ma muli o ka hana ‘āpuka ke pōmaika’i i ia waiwai? Inā pēlā, he hiki nō ho’i i nā ho’oilina ke uku no ia hana hewa a ke ho’iho’i i ia waiwai a pau. ‘Eā, e ‘ole ia hana ‘āpuka a Damon, pōkeokeo ai ka waihona o ia ‘ohana. Inā ‘a’ole i hana ‘āpuka ‘o Damon, inā ua pala ‘ole ka ‘umeke.

A ‘o kekahi mea minamina, ke kuhi nei ko ‘oukou mea kākau, ‘a’ole wale nō ‘o ke kupunakāne o Mary Kaleikoa ka mea i hana ‘āpuka ‘ia e Damon, a e kekahi haole paha, akā, he nui nō paha nā mo’olelo like.

E ho’iho’i ‘ia ke ea o ka ‘āina.

———

E ho’ouna ‘ia mai na ā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:

>> kwong@hawaii.edu
>> rsolis@hawaii.edu

a i ‘ole ia, ma ke kelepona:

>> 956-2627 (Laiana)
>> 956-2627 (Kekeha)

This column is coordinated by Kawaihuelani Center for Hawaiian Language at the University of Hawai’i at Mānoa.