Ho’olaule’a Aloha

Synopsis: September brings the 66th Annual Aloha Festivals.

———

Welina e nā makamaka heluhelu mai Hawai’i moku o Keawe a i Ni’ihau o Kahelelani a hiki loa aku paha i Nihoa. ‘O ka mahina kēia ‘o Kepakemapa, a ua hiki maila ka Ho’olaule’a Aloha. ‘O ke kanaonokumamāono kēia o ka makahiki o ka mālama ‘ia ‘ana aku. He ho’olaule’a kēia no ke kama’āina a pēlā pū me ka malihini.

‘O ke kumuhana o kēia makahiki, ‘o ia ho’i, ‘o ka “Ho’onui ‘Ike,” ‘oiai, ‘o ia ka mea e holo mua ai kākou. A ‘o ia kumuhana, ‘o ka “Ho’onui ‘Ike, he mea ho’omana’o ia i ke Ali’iwahine Bernice Pauahi Bishop a me nā Kula ‘o Kamehameha, ‘oiai, ua piha i ua mau kula nei nā makahiki he 125. A ‘o ka ho’onui i ka ‘ike o nā kamali’i kekahi mea nui i ua Ali’iwahine aloha nui ‘ia nei. A ke lana ‘olu’olu nei ka mana’o o nā kānaka nāna e mālama nei i ka Ho’olaule’a Aloha, he ho’onui ‘ike ka hana a nā kānaka a pau e komo ana i loko o nā papahana like ‘ole o ka Ho’olaule’a Aloha o kēia mahina nei.

He mau mea hou nō ko kēia makahiki. E hana pū ana ka Ho’olaule’a Aloha me Street Grindz. A no laila, e mālama ‘ia ana nā pā’ina “’Ai I Ke Alanui.” A mālama ‘ia aku nei ka mua i kēlā pule aku nei, ka lā 31 o ‘Aukake ma Kaka’ako. Ua hala ia, akā, mai kaumaha ka na’au inā ‘a’ole ‘oe i naue aku i laila, no ka mea, e mālama ‘ia ana kekahi “’Ai I Ke Alanui” ma Mililani i ka lā 15 o Kepakemapa. A e mālama hou ‘ia ana kekahi ma Kaka’ako i ka lā 27 o Kepakemapa.

‘O kekahi mea hou, ‘o ia nā mokupuni e ho’ohanohano ‘ia ana e nā wāhine holo lio. ‘O nā mokupuni ma’a mau, ‘o ia ho’i, ‘o Hawai’i, ‘o Maui, ‘o O’ahu, ‘o Kaua’i, ‘o Moloka’i, ‘o Lāna’i, ‘o Ni’ihau a me Kaho’olawe. A e komo ana i loko o ia hui, ‘o Molokini lāua ‘o Nihoa.

Ua mālama ‘ia iho nei ka wehena i ka Pō’ahā nei, kahi i ho’olauna ‘ia ai ka Mō’ī, ka Mō’īwahine, ke kamāli’i a me ke kamāli’iwahine ma ke Kikowaena Kū’ai ‘o ka Royal Hawaiian.

I kēia lā, ka lā 8, aia ka ho’olaule’a no ka po’e keiki. Aia ma ke Kikowaena Kū’ai ‘o Pearlridge mai ka hola 10:00 o ke kakahiaka a i ka hola 3:00 o ka ‘auinalā. E nānā aku ma ka pūnaewele ma ka ‘ao’ao www.pearlridgeonline.com no nā mea e pili ana i ia ho’olaule’a.

A i ka lā 15 o Kepakemapa, he Pō’aono, e mālama ‘ia ana ka Ho’olaule’a ma Waikīkī. Ma ke alanui ‘o Kalākaua, mai ke alanui ‘o Lewers a hiki i ke alanui ‘o Kapahulu. Aia ana nā pu’ukani, nā hālau hula, a me ka mea ‘ai. ‘O ka helu ‘ekahi ia o ka pā’ina.

A ma ka lā 22 o Kepakemapa, aia ke Ka’i Huaka’i Pua i ka hola 9:00 o ke kakahiaka. E ka’i ana mai ka Pāka ‘o Ala Moana a hiki i ka Pāka ‘o Kapi’olani.

He manuahi ka hele ‘ana i nā mea a pau o ka Ho’olaule’a Aloha. Ho’okahi wale nō mea e uku ai, ‘o ka mea ‘ai ho’i. A no laila, he kōkua ke kū’ai ‘ana i ke apo mana Ho’olaule’a Aloha a me nā mea Ho’olaule’a Aloha ‘ē a’e e kū’ai ‘ia ana.

Nui ke aloha o nā kānaka nāna e mālama nei i ka Ho’olaule’a Aloha iā ‘oukou me ka paipai ‘ana iā ‘oukou e naue aku i ka ho’olaule’a a e “Ho’onui ‘Ike.”

———

E ho’ouna ‘ia mai na ā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:

>> kwong@hawaii.edu
>> rsolis@hawaii.edu

a i ‘ole ia, ma ke kelepona:

>> 956-2627 (Laiana)
>> 956-2627 (Kekeha)

This column is coordinated by Kawaihuelani Center for Hawaiian Language at the University of Hawai’i at Mānoa.