Synopsis: Students in Hawai’i’s public and private schools face many similar challenges. Teachers from both sectors comment on the value of school uniforms.
———
Welina mai e nā hoa makamaka mai na’e a lalo, mai uka a kai. He leo heahea keia iā ‘oukou e heluhelu mai i kēia wahi mana’o e kāko’o ana i ka lole makalike ma nā kula. He lei pe’e poli ke keiki a ‘o ke komo i ka lole makalike kona mea e mālama ‘ia ai.
No Beretania mai ka mo’olelo o ke komo ‘ana i ka lole makalike, a ma hope aku, ua hele a laha ia hana ma nā kula uku i ‘ō i ‘ane’i o ‘Amelika. Ua hele a he mea ma’amau kēia ma nā kula uku like ‘ole. Ma Hawai’i nei nō ho’i, he nui nā kula uku nāna e koikoi i ke komo lole makalike, a i kēia mau lā, ke nui a’e nei ka heluna o nā kula aupuni e koho ana i ka lole makalike.
He mau kumu e kāko’o ai i ka lole makalike ma nā kula. He nui nā pilikia i kēlā me kēia kula aupuni e like me ka ‘aihue, ka hakakā a me ka ho’ohenehene ‘ana. Uluhua nā keiki a me nā ‘ohana i ke koikoi ‘ia e like a like ke ‘ano o ka lole me ka lole kaila i makemake nui ‘ia. I kēia wā, inā hele mai ke keiki i ke kula me nā lole kaila ‘ole, nui ka ho’omā’au ‘ana o nā keiki ‘ē a’e iā ia. Inā makemake kekahi keiki i ka lole o kekahi keiki, e ‘aihue ana paha ‘o ia i ia lole. Nui ka waiwai o ka ‘ae ‘ana o nā kula i ka lole makalike. E hiki ana i nā haumāna ke no’ono’o i ka ha’awina me ka hopohopo ‘ole i ko lākou nānā ‘ana, a e emi ana paha ia ‘ano pilikia. No’ono’o kekahi mau kānaka inā like a like ka lole o nā haumāna, e ‘oi aku ana ka maika’i o ka hana ma ke kula.
‘A’ole i kaulike ka nohona o nā haumāna waiwai a me nā haumāna waiwai ‘ole i ka wā ma mua. Eia kekahi la’ana, ‘a’ole i hiki i nā keiki o nā ‘ohana waiwai ‘ole ke kū’ai i nā lole kaila. A he pilikia kēia, no ka mea, ua luhi nō ia mau keiki i ka ho’ohenehene ‘ia mai. I kēia wā na’e, i ka mana’o o nā keiki o nā kula uku, ua ‘oi aku ke kaulike o nā haumāna waiwai a me nā haumāna waiwai ‘ole. No ka mea paha, he pū’ulu kālā kōkua e hā’awi ‘ia nei i nā ‘ohana lāhui hapaiki, a he kālā paha ia e kū’ai ai i nā lole kaila. Ma muli o ka loa’a ‘ana o ia ‘ano kālā, ua ‘oi aku ka "ethnic diversity", a he mea ho’i kēia e emi ai ke kōā ma waena o nā ‘ohana waiwai a me nā ‘ohana waiwai ‘ole. Eia hou ho’i, he mea ia e pau ai ka hilahila o nā keiki no nā ‘ohana waiwai ‘ole. No laila, ‘o ka lole makalike kekahi mea e emi ai kēlā kōā ma waena o nā keiki.
Ke ‘ole ka lole makalike, e komo nā kaikamāhine i ka lole hiehie i mea e hoihoi ai nā keiki kāne. Eia na’e, nui a lawa nā mea e ho’ohihi ai ke kāne i ka wahine a ‘o ka wahine i ke kāne ma ke kīwī, ma nā mele, a ma ka pūnaewele. ‘A’ole pono kēia ‘ano ma nā kula, no ka mea, he mea ia e lilo ai ka no’ono’o i kahi ‘ē.
Ua ho’ohālike nā mea kākau ‘elua i ko lāua mau kula, he kula aupuni kekahi, a he kula uku kekahi, a ua like a like ke ‘ano o nā pilikia pili i ka lole. He pu’uhonua ke kula, kahi e no’ono’o pono ai i ka ha’awina. ‘A’ole ia he wahi no ka no’ono’o nui ‘ana i ke kaila o ka lole.
No laila, he leo kāko’o kēia i ka lole makalike ma nā kula o ka pae’āina ‘o Hawai’i. He mea ia e kaulike ai, e palekana ai, a e pono ai ka no’ono’o, ke a’o, a me ke ola o nā pua o nēia ‘āina.
———
E ho’ouna ‘ia mai na ā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:
>> kwong@hawaii.edu
>> rsolis@hawaii.edu
a i ‘ole ia, ma ke kelepona:
>> 956-2627 (Laiana)
>> 956-2627 (Kekeha)
This column is coordinated by Kawaihuelani Center for Hawaiian Language at the University of Hawai’i at Mānoa.
