He aha ka mea e pono ai?

Synopsis: Due to the recent shooting spree in Connecticut, the issue of gun control has resurfaced.

Welina e nā makamaka heluhelu, ‘akahi nō a hala akula ka lā Kalikimaka. He lā ia e nanea ai me nā ‘ohana a me nā hoa aloha. ‘O ka mea minamina na’e, ‘o ia ka hana māna’ona’o i ‘ike ‘ia iho nei ma Konekikuka i kēlā mau pule i hala aku nei, i ka lā 11 ho’i o Kēkēmapa. ‘O ia ka lā i hele aku ai kekahi kanaka i ke kula ‘o Sandy Hook e kī wale aku i nā kumu a me nā haumāna o laila. Ua make ihola he 26 mau kānaka i ua kanaka lā. He 20 keiki, a he ‘eono mau kānaka makua. ‘O ke po’o kumu kekahi i kī ‘ia akula i ka pū a make. Aloha nō nā ‘ohana o ia mau keiki i make aku nei.

‘O kahi nīnau nui e kau nei i kēia manawa, ‘o ia ka ho’ohāiki ‘ia ‘ana o ka loa’a ‘ana o ka pū i ‘ole e loa’a wale i ke kanaka, a i ‘ole ho’i e ‘ike hou ‘ia aku ia ‘ano hana māna’ona’o i ‘ike ‘ia aku nei ma Konekikuka. A ‘a’ole ia hana ‘o ka mua o ia ‘ano hana e kau ai ka weli i ka pū ma kahi kula i nā makahiki he 15 i hala iho nei. I ka makahiki 2007, ua kī kekahi haumāna kulanui i nā kānaka he 32 i ka pū a make ma ke Kulanui ‘o Wilikinia Teka. I ka makahiki 1999, ua kī a’ela kekahi mau haumāna ‘elua o ke kula ki’eki’e ‘o Columbine i nā haumāna a me nā kumu a make. He 13 lākou. A inā e helu pū ‘ia nā wahi ‘ē a’e, ‘a’ole he kula, e kaumaha loa ka na’au.

A no laila, he mea maika’i ke lilo ka ho’ohāiki ‘ia ‘ana o ka loa’a ‘ana o ka pū i ke kanaka i mea kama’ilio ‘ia. Akā, ke ho’ā’o nei kekahi mau kānaka e ho’ohāmau loa aku i kekahi e kāko’o ana i ka ho’ohāiki ‘ana, i mea paha e lohe ‘ole ‘ia ai kona leo. A ‘o ka mea nona ia leo, ‘o ia nō ‘o Pirisa Molokana (Piers Morgan). Ua noi ho’opi’i lākou ala iā Pelekikena Barack Obama i ka ho’i ‘ana aku o Molokana i kona ‘āina hānau me ka ‘ōlelo ‘ana a’e, ke hana ‘ino nei ‘o Molokana i ke Kumu Kānāwai o ‘Amelika Hui Pū ‘ia. A i ka nānā ‘ana aku nei, he 87,000 mau kānaka i pūlima aku nei i ia palapala ho’opi’i.

‘Eā, ‘o ka ho’ohāiki ‘ana i ka loa’a o ka pū, he ha’ina maika’i paha ia, ‘a’ole paha. Akā, no ke aha lā e ho’ā’o ‘ia nei e ho’onalonalo ‘ia kahi leo. Wahi a ka lohe, ‘o ‘Amelika Hui Pū ‘ia kēia, kahi e ‘ōlelo aku ai ke kanaka e like me kona makemake. Aia lā kekahi po’e o ‘Amelika ke kū’ē nei i ia mana’o. Pehea lā e pono ai? ‘A’ole ka ‘ōlelo a Molokana he mea e ‘eha ai a e make ai nā kānaka he nui.

E kama’ilio ‘ia kēia nīnau i mea e pa’a ai ka hana kūpono e holo mua ai. Ho’omana’o ihola ko ‘oukou mea kākau i ka ‘ōlelo a Kalika Pōhaku (Chris Rock) no ia mea ‘o ka ho’ohāiki i ka loa’a o ka pū. Ha’i maila ‘o Pōhaku, “’A’ole pono ka ho’ohāiki i ka loa’a o ka pū. He pono ka ho’ohāiki i ka loa’a o ka pōkā. He $5,000 o ka pōkā ho’okahi. Inā pēlā, ‘a’ole e kī wale ‘ia aku ke kanaka.

Maika’i loa paha ia mana’o o Kalika Pōhaku, a he pololei paha. ‘O ka mea minamina, inā e ho’ohāiki ‘ia iho ka loa’a o ka pū a o ka pōkā paha, he akamai ke kanaka. E ‘imi ‘ia a’e nō i wahi e loa’a ai ia mau mea ‘elua, a i wahi paha e hō’eha ai i nā kānaka he nui me ka loa’a ‘ole o ia mau mea. A no laila, he pono kākou a pau ke no’ono’o a pa’a kahi ha’ina e pono ai kākou.

‘O ia ihola kahi mana’o i ‘ike ‘oukou. Ke ho’i akula ko Mānoa keiki, ua ahiahi. Aloha Makahiki Hou iā ‘oukou e nā makamaka heluhelu.

E ho’ouna ‘ia mai na ? leka i? m?ua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:
» kwong@hawaii.edu
» rsolis@hawaii.edu
a i ‘ole ia, ma ke kelepona:
» 956-2627 (Laiana)
» 956-2627 (Kekeha)
This column is coordinated by Kawaihuelani Center for Hawaiian Language at the University of Hawai’i at Mānoa.