Synopsis: The 2013 I Ulu I Ke Kumu honorees are former U.S. Sen. Daniel Kahikina Akaka, Dr. Kekuni Blaisdell, Eddie and Myrna Kamae and Marvlee Kēhaulani Naukana-Gilding.

———

Aloha mai e nā makamaka heluhelu mai ka puka ‘ana mai o ka lā i Ha’eha’e a i kona welo ‘ana i ka mole ‘olu o Lehua. A mahalo nō ho’i i ke kōmike WINHEC i hele mai e kōkua iā mākou, nā polokalamu o Hawai’inuiākea.

Ua hiki hou mai ka lā e ho’ohanohano ai i nā “kumu” alaka’i o Hawai’i nei. E mālama ‘ia ana nō ka ‘aha ‘aina i kēia ahiahi. ‘O ka lima kēia o ka makahiki. A ua pau hou nā pākaukau a me nā noho i ke kū’ai ‘ia. He mea maika’i nō ia, no ka mea, ‘o kekahi pahu hopu o kēia ho’ohanohano ‘ana, ‘o ia ka ho’oulu ‘ana i ke kālā no nā haumāna e hele ai i ke kula.

‘Ehā moho o kēia makahiki nei, a he mau kumu nō lākou e ulu ana nā lālā a nui a ikaika.

Eia nā kumu o kēia makahiki nei:

‘O Kenekoa Kaniela Kahikina Akaka. ‘O ka Hawai’i mua kēia i lilo i Kenekoa ‘Amelika Hui pū ‘ia. I ka makahiki 1976 i ho’omaka ai kona noho ‘ana aku ma Wakinekona, ‘oiai, ua koho ‘ia ‘o ia i lunamaka’āinana. He 14 makahiki o kāna hana ‘ana ma ke ‘ano he lunamaka’āinana. A i ka makahiki 1990, ua ho’okohu ‘ia ‘o ia i kenekoa. A ma ia kūlana ‘o ia i noke ai i ka hana no nā makahiki he 23.

‘O Kauka Kekuni Blaisdell. E ‘ole ‘o Kauka Kekuni Blaisdell, holomua ai ka ‘oihana kauka o Hawai’i nei. ‘O kā ia nei noi’i ‘ana ma ka lapa’au ‘ana o ke Kanaka Maoli, ‘o ka ‘oi nō ia. A na ia nei nō i ho’okumu i ke Kula Lā’au Lapa’au no ke Kanaka Maoli. A mahalo nui ‘ia kona paipai ‘ana aku i nā haumāna he nui hewahewa e lilo i kauka. Ua hana ‘o ia i mea e kū ai ka lapa’au ‘ana i ke Kanaka Maoli i ka pono o ke Kanaka Maoli.

‘O Eddie lāua ‘o Myrna Kamae. Ua kaulana ‘o Eddie Kamae i ka haku mele a i kona ‘ano pu’ukani a ho’okani pila. A i ka hana pū ‘ana me kāna wahine, me Myrna Kamae, ua noke aku lāua i ka mālama ‘ana i ka mo’olelo Hawai’i, ka hana a ka po’e kahiko a me nā mele Hawai’i. He 10 a lāua ki’i ‘oni’oni hu’e ‘oia’i’o i hana ai. A ua kau ia mau ki’i ‘oni’oni he 10 i ka hano hāweo.

‘O Marvlee Kēhaulani Naukana-Gilding. ‘O ka pouhana ‘o ia o ka Hālau ‘Ike Hawai’i o ke Kulanui o Hawai’i ma Mānoa no nā makahiki he nui. Ua ho’omaka kāna hana ma laila i ka makahiki 1982. A ‘oiai ‘o ia e hana ana ma laila, komo akula ‘o ia i ka polokalamu lae pua, a loa’a pono ka lei o ka lanakila, a ma hope mai o kēlā, ho’omau ‘o ia i ka ho’ona’auao ‘ana ma ka ‘imi ‘ana i ke kekelē lae o’o ma ke Kālai Waihona Puke.

‘Auhea ‘oukou e nā kumu ‘ehā, ‘a’ole i kana mai ka mahalo o mākou iā ‘oukou. ‘O ‘oukou ka mea e holo ai ka ‘ōlelo, “Nāna i waele mua i ke ala, ma hope aku mākou, nā pōki’i.”

Inā he nīnau kāu, a he mana’o paha e ho’ohanohano i kekahi kumu i ulu ai nā lālā o Hawai’i nei, e kāhea aku iā Hawai’inuiākea, ke Kula ‘Ike Hawai’i ma ka helu, 956-0980.

———

This column is coordinated by Kawaihuelani Center for Hawaiian Language at the University of Hawai’i at Mānoa.