Ako ‘ē ka hale a pa’a

Synopsis: Matson and the state should have been prepared for such a spill and at least try something to decrease the amount of molasses in the water.

———

Welina e nā makamaka heluhelu, ‘o ia ‘ōlelo e kau a’ela i luna i po’o mana’o no ka mo’olelo o kēia lā, he ‘ōlelo no’eau ia mai kahiko mai. Penei ka ‘ōlelo piha, “Ako ‘ē ka hale a pa’a, a i ke komo ‘ana mai o ka ho’oilo, ‘a’ole e kulu i ka ua o Hilinehu.” He ‘ōlelo a’o maika’i wale kēia. E ho’omaopopo mai ana ia iā kākou, e hana i nā hana e pono ai o pilikia auane’i ma ia hope aku. ‘O ka pilikia na’e, ‘a’ole kēia mau ‘ōlelo no’eau a nā kūpuna ma ka lehelehe a kākou, ‘a’ole i pa’a ma ko kākou waihona no’ono’o. Aia nō i ka puke. A he makana ‘i’o nō ia puke na kākou, akā, ‘a’ole paha i makana ‘ia aku ua puke nei i ka hui ‘o Makona a me ke aupuni moku’āina paha.

Ua hui aku nā maka i Kou no ka laha o ka nūhou e pili ana i ke kahe ‘ana aku o ka malakeke ma ke awa ‘o Honolulu, he 233,000 kālani ka nui. Ua laha paha ia nūhou a puni kēia pae ‘āina a puni nō ho’i ‘o ‘Amelika a me ka honua paha. He mea minamina nō kēia, ‘oiai, he 2,000 i’a, a ‘oi aku paha i make i ka malakeke, a ke kuhi ‘ia nei, ua nui nō ho’i paha ke ‘āko’ako’a i make.

Wahi a nā waha ‘ōlelo o Matson, ‘a’ole i ho’olālā ‘ia kahi hana ke kahe aku ka malakeke i loko o ke awa. A ‘o ka mea ‘āpiki, he waiwai ho’olilo ka malakeke no ka hui ‘o Matson i ko nā ‘āina ‘ē, a ho’olilo ‘ia nō he 2,000 kona malakeke i ‘Amelika i kēlā me kēia pule. A he ho’olilo malakeke ka hana mai ka makahiki 1983. I ka makahiki 1983 i ho’omaka ai ia hana, a ua komo mai nō ka ho’oilo, a kulu loa ihola i ka ua o Hilinehu a o Welehu paha. ‘O Welehu nō ka malama, akā, ‘a’ole hiki ke kau ke po’o i ka uluna, he nui loa ka hana. Inā i ako ‘ē ‘ia aku ka hale a pa’a, inā e ola ia mau i’a i kēia lā.

Ma ka Hōkū Avalataisa o ka lā 10, ua ‘ōlelo ‘ia, ‘a’ole i ho’olālā ‘ia ka ho’oma’ema’e ‘ana a’e i ka malakeke, no ka mea, ‘a’ole maopopo ka hana e ho’oka’awale ‘ia ai ka malakeke. ‘A’ohe hana e hana ‘ia ana i ka wā i ‘ike ‘ia ai ke kahe ‘ana aku o ia malakeke? Inā ‘o ka mea omoomo mea inu wale nō ka mea loa’a, e hele aku nō me ia a e omoomo aku i ka malakeke. Pehea lā ka wākiuma? Me ia paha e huki ‘ia ai ka malakeke a me ke kai nō ho’i paha, akā, ‘o ka mea nui, e pau ana kekahi mau paona o ka malakeke, a e emi ana ia 233,000 mau kālani a e ola ai paha kekahi i’a. ‘Eā, e hana aku a e ho’ā’o paha i kekahi hana e pau ai ka malakeke, ‘a’ole ‘o ke kū iho me he ki’i lā e holo ai ka nīnau, “No Kūki’i mai paha ‘oe?”

A ma ka Hōkū Avalataisa o Honolulu o ka lā 13, ho’olaha ‘ia, he helu e kelepona aku ai ka mea i pilikia i ia kahe ‘ana aku o ka malakeke i loko o ke awa. ‘Eā, he pepeiao ko ka i’a, akā, ‘a’ohe āna kelepona, a ‘a’ohe ‘ōlelo o kona waha. Pehea lā ‘o ia e kelepona ai i ia helu me ka namunamu pū ‘ana aku i ua hui lā.

E wikiwiki aku i ka ho’oma’ema’e ‘ana o nui hou auane’i nā i’a e make ana.

———

E ho’ouna ‘ia mai na ā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:

>> kwong@hawaii.edu
>> rsolis@hawaii.edu

a i ‘ole ia, ma ke kelepona:
>> 956-2627 (Laiana)
>> 956-2627 (Kekeha)

This column is coordinated by Kawaihuelani Center for Hawaiian Language at the University of Hawai’i at Mānoa.