Synopsis: The land is most important.

———

‘O ia ‘ōlelo e kau a‘ela i luna i po‘o mana‘o, he ‘ōlelo ia mai nā kūpuna mai o kēia pae ‘āina nei. He ‘ōlelo ia e hō‘ike ana ē he mea nui ka ‘āina. A ‘o ka mālama ‘ana a me ke aloha ‘ana i ka ‘āina ka mea e pono ai.

‘O ka mea minamina, i ka hiki ‘ana mai o Kāpena Kuke mā a me nā kānaka ma ia hope mai, ‘o Mika Nele mā a pēlā aku, he mana‘o ‘oko‘a ko lākou. Iā lākou, ‘a‘ole ka ‘āina he ali‘i. ‘O kā lākou lā ‘ōlelo no‘eau, ‘o ia ho‘i, he ali‘i ke kālā, he kauā ke kanaka. A pēlā nō ko lākou mana‘o pa‘a a hiki i kēia lā. A ‘o ia ihola ke kumu i pilikia ai ka honua nei i kēia manawa. ‘O ka puni kālā, he mea minamina ia, akā, ‘o ia ka mea e ku‘upau nei nā kānaka he nui i nā hana like ‘ole, me he mea lā, he kauā kuapa‘a ka honua. ‘O kekahi po‘e kānaka, he mea ‘ole iā lākou ka mālama ‘ana i ka ‘āina.

Ua hau‘oli ka na‘au o ko ‘oukou mea kākau i ka heluhelu ‘ana ma ka Hōkū Avalataisa no ka ‘ākoakoa ‘ana a me ka hō‘eu‘eu ‘ana o kekahi mau kānaka ma ke Kapikala no ka pono o ka ‘āina a me ke kanaka a i kapa ‘ia ia hui ‘ana, ‘O ke kanaka, ‘a‘ole ‘o ka waiwai ho‘opuka! 2014. He mau hui kaiāulu kai hui like no ka hō‘ike ‘ana i ko lākou kāko‘o ‘ana i ka mālama ‘āina, ke aloha ‘āina, ka ho‘oulu mea ‘ai pono ma ko kākou ‘āina nei, ka home rula ‘ana o nā kalana, nā wahi noho i kūpono ke kumu kū‘ai a me ka ho‘olimalima ‘ana paha a me ke kūkulu no‘eau ‘ana. A hō‘ike nō ho‘i ia mau hui i ke kū‘ē ‘ana i ke kūkulu wale ‘ia ‘ana o ka ‘āina, ke kūkulu ‘ia ‘ana o nā mauna nani a kaulana o Hawai‘i nei, ka ho‘oulu ‘ia ‘ana o ka mea kanu i ho‘ololi ‘ia kona ‘ano iho, a pēlā aku.

‘O kekahi hui, i kapa ‘ia ‘o Kaka‘ako Hui pū ‘ia (United Kaka‘ako), ua ka‘i like mai ka Pāka ‘o Mother Waldron a i ke Kapikala no ke koi ‘ana i ka mālama ‘ana iā Kaka‘ako.

Nui ka mahalo o ko ‘oukou mea kākau iā lākou a pau, nā kānaka i kū i ka pono no ka ‘āina a me ke kanaka. A he mea nui nō ho‘i ia, ‘oiai, i ka nūpepa i ka pule nei i hala, ua hō‘ike ‘ia, he 22 mau hale papa‘i hiehie e kūkulu ‘ia ana ma uka o Kewalo e ka hui ‘o Howard Hughes. A ma kekahi o ia mau hale papa‘i hiehie, aia ana kekahi ke‘ena noho nani hiehie o luna lilo, a ‘o kona kumu kū‘ai, he $20 miliona kālā. No ka po‘e waiwai wale ana nō paha ia mau hale papa‘i hiehie.

Mahalo nui iā ‘oukou e ka po‘e e kū nei i ka pono no ke kāko‘o ‘ana, ka mālama ‘ana a me ke aloha ‘ana i ka ‘āina a me ke kanaka. Eia mai kekahi ‘ōlelo a Kaleikoa Kaeo i ho‘opuka ai ma ia lā (huki ‘ia mai ka Hōkū Buletina mai), “Ke kū‘ē kākou a alu like no ka ho‘omalu ‘ana i ka ‘āina, ka mea nāna e hānai iā kākou, ho‘okanaka kākou iā kākou iho nō. ‘O ko kākou leo kālai ‘āina ia: i nā manawa a pau a kākou e kūpa‘a ai ma hope o ka ‘āina, holo mua kākou.”

(E huikala mai e Kaleikoa a me nā makamaka heluhelu, ua unuhi au i ka ‘ōlelo no‘eau āu e Kaleikoa, a ‘a‘ole i like kona no‘eau a me kona nani e like me kāu i ho‘opuka ai.)

———

E ho’ouna ‘ia mai na ā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:

» kwong@hawaii.edu
» rsolis@hawaii.edu

This column is coordinated by Kawaihuelani Center for Hawaiian Language at the University of Hawai’i at Mānoa.