Synopsis: If a bunch of college football players can accept a gay football player, why can’t everybody?

———

‘O ia ‘ōlelo no‘eau e kau a‘ela i luna, i po‘o mana‘o no ka mo‘olelo o kēia lā, e hō‘ike ana he mea nui ka ‘ike ‘ana a me ke aloha ‘ana i ko kākou mau hoa kanaka me ka nānā ‘ole i kona ‘ano iho, ‘oko‘a ‘o ia, a ‘oko‘a paha ‘oe. A he mea minamina, inā ‘a‘ole pēlā, a ‘oi aku paha kou aloha i ka ‘īlio, he holoholona wale nō. A aia nō ho‘i kekahi ‘ōlelo no‘eau, “A aloha wale ‘ia kā ho‘i ‘o Kaunuohua, he pu‘u wale nō.” E hō‘ike mai ana, inā aloha nui ‘ia kahi pu‘u, e ‘oi aku ke aloha i ke kanaka.

A ‘o ke kumu i lilo ai ia mau ‘ōlelo i mea nui, no ka mea, i ka pule nei i hala, ua hō‘ike a‘e ‘o Michael Sam i ka lehulehu, he kanaka ho‘okāmaka ‘o ia. A ua lilo ia i mea kama‘ilio nui ‘ia a puni ‘o ‘Amelika. ‘O ke kumu paha i lilo ai i mea kama‘ilio nui ‘ia, ‘o ia ho‘i, he mea pā‘ani pōpō peku ‘o Sam. ‘Akahi nō a pau kona kikina hope loa ma ke Kulanui o Mikouli. A ‘o Sam kekahi e koho ‘ia ana ma ka lā koho mea pā‘ani pōpō peku loea e hiki mai ana i ka mahina ‘o Mei. A hiki i kēia manawa, ‘a‘ohe mea pā‘ani pōpō peku loea i hō‘ike a‘e, he kanaka ho‘okāmaka ‘o ia. He mau mea pā‘ani loea i hō‘ike aku, akā, ma hope wale mai nō o ka ha‘alele ‘ana i ka pā‘ani ‘ana.

‘O Sam, ‘a‘ole kēia ‘o ka makamua o kona hō‘ike ‘ana. Ha‘i mua akula ‘o ia i kona mau hoa pā‘ani pōpō o Mikouli ma mua o ke kikina 2013-2014. Kohu mea lā, ua mālama ‘ia ‘o ia e kona mau hoa pā‘ani. Ua pū‘iwa ihola ka no‘ono‘o o ko ‘oukou mea kākau, ‘oiai, ua kuhi ihola, he mau ‘ōpiopio wale nō lākou, a no laila, e hana ‘ino wale ana nō lākou iā Sam. Eia na‘e, ‘a‘ole pēlā. Ua ‘ike ‘ia ka hoa kanaka. A ‘o kekahi, ‘a‘ole nō i hō‘ike ‘ia aku ia mea huna i ka lehulehu. Ua mālama ‘ia iho ia mea huna a hiki i ia hō‘ike ‘ana a‘e o Sam i ka lehulehu.

A ‘o ia kikina pōpō peku, ua hiu a‘ela ‘o Mikouli a ‘āha‘i akula i ka lanakila ma nā ho‘okūkū he 12, a kā‘ili akula i ka inoa moho o ka māhele Hikina o ka ‘Ahahui Hikina Hema. Ua komo ‘o Mikouli i ka Ipu Pulupulu a lanakila a‘ela ma luna o ‘Okalahoma Moku‘āina.

Ua nui ke aloha o nā hoa pā‘ani o Sam i ko lākou hoa kanaka, a alu like ihola a loa‘a ka lei o ka lanakila. Ke lana nei ka mana‘o o ko ‘oukou mea kākau e like ana ka lehulehu a me nā mea pā‘ani loea me ia mau hoa pā‘ani o Sam ma Mikouli.

Ma ke kikina nei i hala, ua ho‘ohina ‘o Sam i ka ‘alihikūlele he 11.5 manawa, a he 19 ho‘ohina no nā ‘īā pohō. ‘Elua mea pā‘ani kūlele ‘oi o ka makahiki o ka ‘Ahahui Hikina Hema, a ‘o Sam kekahi o lāua.

Ua kuhi mua ‘ia, e koho ‘ia ana ‘o Sam i mea pā‘ani loea ma ka puni ‘ehā paha, akā, wahi a ka lohe, ua ‘ōlelo kekahi mau luna o ka ‘Ahahui Pōpō Peku Loea, e hā‘ule ana kona koho ‘ia ‘ana a ma ka puni ‘elima a ma hope aku paha. ‘Eā, mai poina iā kākou a pau ka ‘ōlelo no‘eau e kau a‘ela i luna.

———

E ho’ouna ’ia mai na ā leka iā māua, ’o ia ho’i ’o Laiana Wong a me Kekeha Solis ma ka pahu leka uila ma lalo nei:

» kwong@hawaii.edu
» rsolis@hawaii.edu

a i ’ole ia, ma ke kelepona:

» 956-2627 (Laiana)
» 956-2627 (Kekeha)

This column is coordinated by Kawaihuelani Center for Hawaiian Language at the University of Hawai’i at Mānoa