Synopsis: Is recreational marijuana good for Hawai’i?

________

Ua lilo aku nei ka ‘auhau pakalōlō i loa’a aku nei i ka moku’āina ‘o Kololako i mea kama’ilio nui ‘ia a i mea ho’i i nānā nui ‘ia e nā moku’āina ‘ē a’e. ‘O ka nui o ka ‘auhau i loa’a i ka pakalōlō ho’onanea ma laila ma ka mahina ‘o Ianuali, he $2 miliona kālā a ‘oi aku. He ho’okahi wale nō mahina. A ke hui pū ia me ka loa’a i ka pakalōlō lapa’au, he $3.5 miliona kālā ka nui. He mea kū i ke kānāwai ka pakalōlō lapa’au a me ka pakalōlō ho’onanea ma Kololako, a pēlā pū me Wakinekona. A ma nā moku’āina he 20, he kū nō i ke kānāwai ka pakalōlō lapa’au.

E lilo paha ka pakalōlō i mea kūkākūkā ‘ia no nā luna kau kānāwai o Hawai’i nei i mea e nui ai ke kālā o kahi waihona nona ke koena ‘opihi i kūpihipihi loa.

‘Eā, ua ho’omaopopo paha ‘oukou i kahi mana’o o kekahi lunamaka’āinana, ‘o Rida Cabanilla, ‘o ia ho’i, he mea kū i ke kānāwai ka ho’oulu ‘ia ‘ana o ka pakalōlō ma Hawai’i nei, akā, e ho’olilo ‘ia aku i ‘Amelika. Ke lana nei ka mana’o o ko ‘oukou mea kākau, e loli paha kona mana’o, a e ‘ae ‘ia ka pakalōlō ho’onanea ma kēia pae ‘āina nei.

He nui paha ka po’e kū’ē i ka pakalōlō ho’onanea, akā, i kēia manawa, ua ‘ae ‘ia ma ke kānāwai ka wai ‘ona a me ke kikaliki. Ua ‘oi aku paha ka ‘ino o ia mau mea ‘elua ma mua o ka pakalōlō.

A he hopohopo kekahi o loa’a ka pakalōlō i nā keiki o Hawai’i nei. ‘Eā, ‘o ka po’e keiki makemake pakalōlō, he loa’a wale ka pakalōlō i kēia manawa.

‘Eā, e nā luna kau kānāwai a me ka lehulehu, ‘a’ole e hāiki ka no’ono’o. E kala loa i puhi ‘ia ai ka pakalōlō ma ka ho’omana a ke ho’omau ‘ia nei ia hana i kēia manawa. He lā’au ka pakalōlō mai kahiko mai, a he ‘ano ‘ē loa ka pāpā ‘ia ‘ana aku o ka lā’au lapa’au.

I Ulu I Ke Kumu

Synopsis: The I Ulu I Ke Kumu Awards is next Saturday. It honors the following Kanaka Maoli educator-leaders: Dr. Benjamin Young, Dee Jay Mailer, Māpuana and Kīhei de Silva, and the Protect Kaho’olawe ‘Ohana. [Correction from last week’s synopsis: Kīhei de Silva was left out of the synopsis, however, he is also one of the recipients of the award.}

———

E mālama ‘ia aku ana ka ‘Aha Hā’awi Makana I Ulu I Ke Kumu i kēia Pō’aono a’e. He mea ia e ho’oulu ai i ke kālā no ka po’e haumāna o ke Kulanui o Hawai’i. A i kēia makahiki, he mau kānaka e kau ana i ka hano hāweo. ‘O ia nō ‘o Kauka Benjamin Young, ‘o Dee Jay Mailer, ‘o Māpuana a me Kīhei de Silva, a me ka Protect Kaho’olawe ‘Ohana. Inā he mana’o kou e kōkua ma ka hā’awi manawale’a i ke kālā a ma kekahi hana paha, e kāhea iā Hawai’inuiākea ma ka helu 808-956-0980 a e leka uila paha i ka hua leka uila, hshk@hawaii.edu.

———

E ho ‘ouna ‘ia mai na ā leka iā māua, ‘o ia ho‘i ‘o Laiana Wong a me Kekeha Solis ma ka pahu leka uila ma lalo nei:

>> kwong@hawaii.edu

>> rsolis@hawaii.edu

a i ‘ole ia, ma ke kelepona:

>> 956-2627 (Laiana)

>> 956-2627 (Kekeha)

This column is coordinated by Kawaihuelani Center for Hawaiian Language at the University of Hawai‘i at Mānoa.