Synopsis: Blame for the problems in the Veterans Administration hospital system is being attributed to one man, Gen. Eric Shinseki. What else is new? That’s the American way.

———

Aloha mai nō kākou e o’u mau hoa ‘ōlelo Hawai’i, ku’u pū’ali koa ho’i e paio nei no ka pono o ka lāhui.

He mea maopopo ka mana’o kū’ē o kekahi o kākou i ia mea he kaua. He hana māinoino ka pepehi ‘ana i nā hoa kanaka pehea ka wā maluhia a wā kaua paha. He kau ho’i ka weli ke ‘ike aku i ka ‘ino o ia mea he kaua, a he ‘eha nō ho’i ka na’au o ka ‘ohana ke pepehi ‘ia ko lākou mea aloha. He kaumaha lua ka mea i ‘ike ‘ia e nā koa i pakele ke ola ma nā ‘āina ‘ē a i ho’i ola mai. ‘Eha ho’i ka ho’omāna’ona’o ‘ana i nā hanana weliweli a lākou i hana ai a i hana ‘ia mai iā lākou a i ko lākou mau hoapili nō ho’i. Aloha ‘ino!

Eia hou, he kū’ē ‘i’o nō ka po’e e koikoi nei i ke kū’oko’a o Hawai’i. ‘A’ohe wahi ho’omanawanui i ka noho hewa ‘ia mai e ke aupuni ho’oma’au, ‘o ‘Amelika. A i ka ‘ike ‘ia o kona ‘ano ‘imi hana i nā lāhui ‘ē a’e, he mea ia e māhuahua ai ka inaina. He aha lā ka waiwai o ka paio ‘ana no kona pono? Eia mai na’e ka mea minamina. Ke ho’ohalahala ‘ia nei nā pū’ali koa, ke nalo nei ka lima koko maoli nāna i ho’ouna aku a i kauoha aku ho’i iā lākou e pepehi i nā kānaka o kekahi lāhui.

‘O ka mea ‘āpiki, he nui nā kānaka Hawai’i i komo i loko o ka pū’ali koa a i ho’ouna ‘ia aku i nā ‘āina ‘ē e pepehi ai i nā kānaka o laila. Ua komo nō paha kekahi o lākou ma muli o ka mana’o loialiki e kūpale ai iā ‘Amelika. Ke kuhi nei na’e au he nuī nā Hawai’i i komo no ka ‘imi ‘ana i ola, ‘oiai ‘a’ohe ola e loa’a mai ana ma ko kākou ‘āina hānau nei. A he aha lā ke kumu e loa’a ‘ole ai? Aia paha ka ha’ina ma ke ‘ano hemahema a na’aupō o ka ho’ona’auao ‘ia ‘ana ma nā kula. Kainō e ho’omākaukau ‘ia no ka ‘imi ‘ana i ola, eia kā, ‘a’ole e lawa ka mākaukau e komo ai i kahi ‘oihana maika’i o ka uku.

‘A’ole na’e e hihi. E ‘imi aku kākou i ka mole o kēia pilikia, aia i nā luna nui o ‘Amelika. Na lākou e ho’oponopono i nā hihia o ka honua nei i ‘ole ai e māhanahana mai ke kaua. A inā e ho’ouna lākou i nā pū’ali koa i nā ‘āina ‘ē e kaua ai, a ‘eha mai auane’i ke kino a i ‘ole ka na’au, na lākou nō ia e mālama i kēia po’e ‘eha ke ho’i mai. ‘O ka po’e na’e i ho’ouna ‘ia aku nei a i ho’i ‘eha mai, ua hulikua ‘ia lākou. Aloha ‘ino! No laila, ‘a’ole e kau ‘ia ka hewa ma luna o lākou lā. I hewa ho’i i nā luna aupuni nāna lākou i ho’ouna aku. He kuleana ko ke aupuni e nānā ai i ko lākou lā pono.

I kēia mau lā, ke kuhi ‘ia nei ke Kenelala Eric Shinseki, ke Kuhina Nui ho’i o nā koa kahiko, i ka hemahema o kona mālama ‘ana i nā haukapila, kahi e lapa’au ‘ia ai a mālama ‘ia ai ho’i nā pū’ali koa i ‘eha a i pilikia paha ka no’ono’o. Aloha ‘ino! E kau ana nō paha ka hewa ma luna o ia mea ho’okahi, a e nalo ana ka hewa o nā luna aupuni. He hana kohu ‘ole kēia i kūluma i nā luna o ‘Amelika. Eia mai ka’u nīnau. He laki anei kou noho ‘ana ma ‘Amelika?

———

E ho’ouna ‘ia mai na ā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:

>> kwong@hawaii.edu

>> rsolis@hawaii.edu

a i ‘ole ia, ma ke kelepona:

>> 956-2627 (Laiana)

>> 956-2627 (Kekeha)

This column is coordinated by Kawaihuelani Center for Hawaiian Language at the University of Hawai’i.