Synopsis: The art exhibit “3Rs: Respect, Responsibilities & Re-righting” at Lama Library at Kapi’olani Community College, highlights Native Hawaiian perspectives and approaches along the lines of the exhibition theme through visual exploration, definition and analysis, and synthesis.
Welina e nā makamaka heluhelu o Kauakūkalahale. ua hala aku nei ka ‘aha ho’ona’auao i kapa ‘ia ‘o WIPCE a i mālama ‘ia aku nei ho’i ma ke Kulanui Kaiāulu ‘o Kapi’olani. ‘O kahi pōmaika’i, aia nō kekahi mau hō’ike’ike hana no’eau ‘elua o ia ‘aha ho’ona’auao e waiho nei. ‘O kekahi, ‘o salt wada ia. Aia ma ka lumi hō’ike’ike ‘o Koa. ‘O ka lā hope loa o ia hō’ike’ike, ‘o ia ka lā 14 o Iune.
‘O ka lua o ka hō’ike’ike hana no’eau, ‘o ia ka mea nona ke po’o mana’o e kau a’ela i luna. Akā, mai noho ‘oukou a kuhihewa e nā hoa makamaka, ‘o ia mau R ‘ekolu, ‘o ia ka heluhelu (Reading), ke kākau (‘Riting), a me ka makemakika (‘Rithmetic). ‘A’ole loa. ‘O ka inoa o ua hō’ike’ike hana no’eau nei, ‘o ia ‘o 3Rs: Respect, Responsibilities & Re-righting. Aia ma ka Hale Waihona Puke ‘o Lama.
‘O nā kānaka hana no’eau o ia hō’ike’ike, he mau kumu, he mau limahana, a he mau haumāna ho’i ma ke Kulanui o Hawai’i ma Mānoa. A ‘o nā hana no’eau a pau o ia hō’ike’ike, he ulu nō ka hoi. He mau mea ho’i kahi e ‘ike ‘ia ai nā mana’o mahalo a hō’ihi paha, ke kuleana, a me ka ho’oponopono ‘ana.
‘O kekahi o nā hana no’eau, na Ipo Wong ia, a he keu ia a ka nani. He ‘eono mau lei Ni’ihau like ‘ole a i hana ‘ia mai ka makahiki 1978 a i ka makahiki 2010. He hō’ike kēia i ka mālama pono ‘ia o ka ‘ike lei pūpū Ni’ihau. Eia mai nā ‘ano o nā lei, ‘o ka Lei Kīpona Momi Uliuli, ka Lei Pīkake Momi & Pūpū Pōleho, ka Lei ‘Ālilea, ka Lei Kui Pololei Momi Kua’ula, ka Lei Kīpona Momi Kahakaha a me ka Lei Pīkake Momi Ke’oke’o.
‘O kekahi hana no’eau, he ho’oheno ia iā Bill Ali’iloa Lincoln, a i kapa ‘ia ‘o I Ola I Ka Ho’oheno A Nā Kūpuna: Nā Kuahiwi Kaulana. Na Keawe Lopes ia. Aia nā pā leo o Bill Lincoln a me nā mele a kekahi mau haumāna i haku ai ma ka ho’opilipili ‘ana i ke ‘ano o ke mele ‘o Nā Kuahiwi Kaulana a Bill Ali’iloa Lincoln.
‘O kekahi hana no’eau, he ki’i ia, na Lia O’Neill Keawe, i kapa ‘ia ‘o ‘Ike Kupuna. He ‘eke ia nona nā ‘ike kupuna like ‘ole i kikokiko ‘ia ma nā ‘ao’ao, ‘o ia ho’i, ‘o ke mele, ka mahi ‘ai, ke aloha, a pēlā aku. A e ho’omaopopo mai ana kahi ki’i, e lawe pū ‘ia ka ‘ike kupuna me ‘oe i nā manawa a pau.
‘O ia mau hana no’eau ma luna a’e nei, he hō’ike ia i ka mālama ‘ana i ka ‘ike kupuna, ka hō’ike ‘ana i ke kuleana o ka ho’omau ‘ana i ka ‘ike kupuna, a me ka hō’ike ‘ana, ua lehulehu a manomano ka ‘ikena a ka Hawai’i.
He nui hou aku nā hana no’eau nani, a no laila, e ho’omau ‘ia ke kama’ilio ‘ana aku i kekahi wā. Akā, inā he mana’o kou e māka’ika’i aku i kēia hō’ike’ike ‘o ka 3Rs: Respect, Responsibilities & Re-righting, e ‘oni koke aku ka moku i ka Hale Waihona Puke ‘o Lama, ‘oiai, ‘o ka lā 10 o Iune, kēia Pō’akolu a’e ho’i, ‘o ia ka lā hope loa.
———
This column is coordinated by Kawaihuelani Center for Hawaiian Language at the University of Hawai’i at Mānoa.
