Synopsis: Candidates running for office should give half of all campaign funds raised to an account for disaster relief for Hawai’i.
He mea minamina ke kāka’ikahi o nā luna aupuni i kūpa’a ma hope o ka pono kīwila, ‘o ke koho pāloka ‘ana ho’i ma Puna. Inā he mea nui ke koho pāloka ‘ana, e like me ka paipai ‘ana e ho’olaha ‘ia ana ma luna o ke kīwī a me ka lekiō, no ke aha i kāko’o ‘ole ai nā luna aupuni a pau i ka ho’opane’e ‘ana i ke koho pāloka ‘ana a i ka wā kūpono, a i ‘ole ia, e ‘ae ‘ia ke koho pāloka ‘ana o ia mau ‘āpana ma o ka leka. I kēlā Pō’alima aku nei, ka lā ho’i i mālama ‘ia ai ke koho pāloka no ia mau ‘āpana ‘elua o Puna, he hapa iki wale nō o nā manakoho kai hele aku i ke koho pāloka, ‘oiai, ‘o ka hapanui o lākou, e kau ana ka mana’o no ko lākou pono a me ka pono o ka ‘ohana. ‘A’ole ia he wā e no’ono’o ai i ke koho pāloka ‘ana. Ua pau ka pono o ka hale, ke ka’a a pēlā aku. ‘A’ohe uila e holo ana ma ka hale, ‘a’ohe wai.
A ‘o kekahi pilikia, ‘a’ole i ‘ae ‘ia nā kānaka o waho o ia mau ‘āpana ‘elua e koho pāloka i kēlā Pō’alima aku nei. ‘A’ole wale nō ‘o ia mau ‘āpana ‘elua kai pō’ino i ka makani pāhili, ua pilikia nō ho’i kekahi po’e i ka hiki ‘ana mai o Iselle, e hiki ‘ole ai ke hele aku i kahi koho pāloka ma ka lā koho pāloka mua, ka lā ‘eiwa o ‘Aukake.
A mana’o ihola ko ‘oukou mea kākau, e hele nui aku nā luna aupuni, nā moho i kū ha’aheo ma hope o ka helu ‘ia ‘ana o nā pāloka a me nā moho i hā’ule, i Puna no ke kōkua ‘ana aku, e like me Colleen Hanabusa lāua ‘o Brian Schatz. ‘A’ole na’e pēlā.
A no laila i hāpai ‘ia ai kahi ‘ōlelo e kau a’ela i luna i po’o mana’o no kēia mo’olelo o Kauakūkalahale nei, ‘o ia ho’i, “E hā’awi, e hā’awi lilo i kou mau waiwai.” He lālani mele ia no loko mai o ke mele ‘o Iesū me ke kanaka waiwai, a he mea maika’i paha ia e hahai ai ka po’e moho e alualu ana i ke kūlana aupuni. ‘O ia ho’i, ‘o ke kālā a lākou e ho’oulu ai no ka hana paipai kālai’āina, e lilo aku ka hapalua like o ia pu’u kālā i kahi waihona (‘a’ole ‘o ka hā’awi lilo). A ‘o ia pu’u kālā, he mea ia e hana ‘ia ai nā mea e pono ai nā kānaka i pilikia i ka ‘ino, e like ho’i me ia mau kānaka o Puna.
Ua nui nō ka mahalo i nā kānaka, nā hui a me nā hale ‘aina i hā’awi aku i ka mea ‘ai, ka hau, ka wai a pēlā aku e pono ai ko Puna. Akā, inā i loa’a ‘ē ia ‘ano waihona kālā, inā ua lawa ke kālā no ka lawe ‘ana i nā pono i nā hale a pau, a e ‘olu’olu iho ka na’au, a e hiki paha ke no’ono’o i ke koho pāloka.
A ‘o ka pu’u kālā a nā moho e ho’oulu ai, makehewa ka ho’olilo ‘ana i kekahi manawa. Hana ‘ia nā ho’olaha paipai kālai’āina ma ka pepa mānoanoa a ma nā waiho’olu’u like ‘ole. He nani nō, akā, ‘a’ole paha heluhelu pono ‘ia e ka hapanui o nā kānaka. ‘O ka mea ma’a mau paha, lele koke i loko o ke kini ‘ōpala. A ‘o kekahi mau ho’olaha kīwī a lekiō, he ho’opuka ‘ōlelo hō’ino wale nō i ka hana a kekahi moho. He ho’opau kālā. A no laila, e aho ka hā’awi ‘ana o lākou i ka hapalua like, a ‘o ke koena, e no’ono’o pono ‘ia ke ‘ano ho’olaha e pono ai ko lākou alualu kūlana aupuni ‘ana. A he kōkua nō ho’i lākou i ka lehulehu ke pō’ino.
E ho’ouna ‘ia mai na ā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:
» kwong@hawaii.edu
» rsolis@hawaii.edu
a i ‘ole ia, ma ke kelepona:
» 956-2627 (Laiana)
» 956-2627 (Kekeha)
This column is coordinated by Kawaihuelani Center for Hawaiian Language at the University of Hawai’i at Mānoa.
