Synopsis: A new City Council bill raising the smoking age to 21 advances.

He pila hou ma ka ‘Aha Kūkā o Honolulu nei. ‘O Pila 51 ia. A ma ia pila, aia wale nō a piha nā makahiki he iwakālua kūmākahi i ke kanaka, a laila, he hiki iā ia ke puhi i ke kikaliki, ke kikaliki uila a me ia ‘ano mea aku, ia ‘ano mea aku. A pēlā pū me ke kū’ai ‘ana mai i ia mau mea.

‘O ka hapanui o nā kānaka i hō’ike mana’o ma ka hālāwai i mālama ‘ia, ua kū’ē i ua pila nei. Wahi a kekahi wahine, ua lilo kāna mau keiki ‘elua i mau kānaka makua mālama pono i ke kuleana i ka piha ‘ana o nā makahiki he ‘umi kūmāwalu iā lāua, e ho’oholo ana i ka mana’o ma ka ‘oihana, ke ola kino, ka male ‘ana a me ke kālā. No laila, ‘o ka pi’i ‘ana o ka makahiki e puhi paka ai ke kanaka a ka iwakālua kūmākahi, he keu aku ia a ka hūpō.

Wahi a kekahi moho lunamaka’āinana, he Lepupalika, aia nō nā koa ‘ōpiopio ke ho’i maila mai ke kaua mai, ua lele ka lima a wāwae paha, a ua lilo ka puhi paka i mea ma’a mau iā lākou. A i ka ho’ā’o ‘ana e kū’ai mai i ke ‘ope kikaliki, e hō’ole ‘ia. Aloha nō.

Wahi a kekahi moho ‘Aha ‘Ōlelo Lāhui, he Kemokalaka, ‘a’ole ‘o ia makemake i ka ha’i ‘ana aku i nā kānaka nona nā makahiki he ‘umi kūmāwalu a ka iwakālua i ka hana e hana ai, he mau kānaka makua lākou ma ke kānāwai.

‘Eā, ua lohe ‘ia nō ia mau mea like ma mua loa. I ka wā ho’i e kama’ilio ‘ia ana ka pi’i ‘ana o ka makahiki e inu wai ‘ona ai a ka iwakālua kūmākahi, koe na’e ka lele ‘ana o ka lima a wāwae paha o ke koa. A ‘a’ole i loli ka mana’o o nā luna kau kānāwai ma ia kānāwai no ka inu wai ‘ona.

A ‘o kekahi, aia nō ke ho’okō ‘ia akula ia kānāwai puhi paka ma kekahi mau ‘āina o ‘Amelika Hui Pū ‘Ia, a pēlā pū ho’i me kahi kalana o kēia pae ‘āina nei. ‘Akahi nō a ho’omaka ka ho’okō ‘ia ‘ana o ia kānāwai ma ke Kalana ‘o Hawai’i i ka lā mua o ka mahina ‘o Iulai, 2014. ‘O ka mea ‘oko’a na’e o ke kānāwai o ia kalana, ‘o ka po’e i piha ‘ē nā makahiki he ‘umi kūmāwalu, ua pakele lākou i ka lima wīkani o ia kānāwai. Ua like nō ka pila a ka ‘Aha Kūkā o Honolulu nei i kinohi, akā, ‘akahi nō a loli, ‘a’ole e ‘ae ‘ia ana ka po’e i piha ‘ē nā makahiki he ‘umi kūmāwalu e puhi paka i ka wā e ho’omaka ai ka ho’okō ‘ana i ke kānāwai. Ma laila paha e pilikia ai ke kanaka. Inā he kanaka puni paka a kikaliki uila paha, a he pono ke ha’alele pau loa i ia hana. He mau polokalamu paha e mālama ‘ia ana no ia ‘ano kanaka?

‘O kekahi mea ‘ano ‘ē, ‘a’ole ia he kānāwai moku’āina ma kēia pae ‘āina a puni. Ma Hawai’i wale nō i kēia manawa, a inā holo ma O’ahu nei, he ‘elua nō mokupuni. He ‘ano ‘ē ia, e pono ana i ka mea puhi paka ke ho’omaopopo le’a i ke kānāwai o kēlā me kēia mokupuni. He mea ma’a mau ka lele ‘ana o kānaka i kekahi mokupuni no ke kipa ‘ohana, no ka hana, a pēlā aku. A no laila, inā puhi hewa kekahi, e ho’opa’i ‘ia ana nō ma ke kānāwai. Auē he puhi wale nō paha ia pila na ka makani.

E ho‘ouna ‘ia mai na ā leka iā māua, ‘o ia ho‘i ‘o Laiana Wong a me Kekeha Solis ma ka pahu leka uila ma lalo nei:

>> kwong@hawaii.edu

>> rsolis@hawaii.edu

This column is coordinated by Kawaihuelani Center for Hawaiian Language at the University of Hawai‘i at Mānoa