Synopsis: Let’s focus on supporting the Rainbow Warriors instead of dwelling on what could have happened.

Ua hiki hou mai ke kau kinipōpō peku, a mākaukau ihola paha ko Hawai’i no ke kāko’o ‘ana i ko lākou hui. A i ka nānā ‘ana aku nei i ka ho’okūkū o kēlā Pō’aono aku nei, kohu mea lā, ua mākaukau nō nā Koa Ānuenue no ka pā’ani pōpō peku ‘ana.

‘O ka hoa paio mua o nā Ānuenue, ‘o ia ‘o Wakinekona, a ‘o ia ka hui helu 25 o ke ao nei i ia pule. Akā, i ka ulele ‘ana o ka ho’okūkū i kinohi, ua kuhi paha ka nui o nā kānaka, ‘o Hawai’i ka hui helu 25 o ke ao nei. Ua lilo mua ke kinipōpō iā Hawai’i, a holo wale akula i nā ‘īā he 58 a loa’a ihola ka ‘ai holo ma ka naku ‘ana o Joey Iosefa he ho’okahi ‘īā i loko o ke kā’ei ‘ai holo i loko o nā minuke mua ‘ehā o ka ho’okūkū. Ua hopu ‘ia nā nou mua ‘eono a Ikaika Woolsey, ka ‘alihikūlele.

A ma hope o ka hoka ‘ana o Wakinekona, ‘a’ole i loa’a he wahi ‘ai, lilo hou mai ke kinipōpō iā Hawai’i. Holo akula nā Koa Ānuenue i nā ‘īā he 79, a ua ho’ohala ‘ia he 6 minuke me 19 kekona. Akā, ‘o ka hopena, he ‘ai peku wale nō, he 3 ‘ai. Akā, i ia manawa, e ‘oi a’e ana ‘o Hawai’i, he 10 āna ‘ai i ka hua kakā a Wakinekona. I ia manawa, he 3 minuke 22 kekona i koe o ka hapahā mua.

Ma ia hope mai, he mau pilikia kai ‘ike ‘ia. A e ‘ōlelo ana kekahi po’e māka’ika’i, inā ‘a’ole i limanui hewa ‘ia ka ‘alihikūlele o Wakinekona, inā ua lanakila ‘o Hawai’i. Inā i ho’ā’o ‘o Hawai’i no ka ‘ai peku ‘oiai ‘o ia ma ka laina ‘īā 9, inā ua lanakila ‘o Hawai’i. Akā, ua oki ia ‘ano ‘ōlelo ‘ana o holo a’e ia ‘ōlelo mai kahiko mai, ‘o ia ho’i, “He i’a laka nō lā ho’i ka ‘ina.” E ho’opoina aku i ia mau mea, a e kāko’o kākou i ko kākou hui pōpō pekupeku. Ua maika’i ka hana a kahi keiki o ka ‘āina, ‘o Ikaika Woolsey. He 207 āna ‘īā i nou ai, a ‘a’ole i ‘apo lilo ‘ia kāna kinipōpō i nou ai. He lio holo wale ‘o Joey Iosefa, a he 143 ona ‘īā i holo ai. Ma ka hapalua ‘elua, ‘a’ole i loa’a kahi ‘ai iā Wakinekona.

‘O ka mea nui, e kāko’o kākou i nā Koa Ānuenue ma ka hele kino ‘ana aku i ka ho’okūkū ke hiki. A ke hele aku, e noho nō a kani ka pū i ka hopena o ka ho’okūkū.

A ‘o kekahi pilikia, he pono ke mākaukau ke Kahua Pā’ani ‘o Aloha, i ‘ole ho’ohalahala nā kānaka māka’ika’i, i ho’i hou lākou i nā ho’okūkū a pau. He 32,197 mau kānaka i hele i laila e māka’ika’i ai i ka pā’ani ‘ana. Akā, he 4,200 o lākou, ‘akahi nō a kū’ai i ke kikiki i ia lā ma ke kahua pā’ani. A ‘o ia ka mea i pupū ai ka holo o nā ka’a, ke kūkulu ‘ana i ke ka’a a me ke komo ‘ana i loko o ke kahua pā’ani. A ‘o ia ka mea i ‘ōlelo ai kekahi po’e māka’ika’i, ‘a’ole lākou e ho’i hou ana i ka ho’okūkū o nā Koa Ānuenue. A wahi a ka lohe, ua ha’alele ‘i’o nō kekahi po’e a ho’i i kauhale ma mua o ka ulele ‘ana o ka pā’ani ‘ana i ia Pō’aono.

No laila, i kēia lā, e kāko’o pau loa kākou, pēlā pū me ke Kahua Pā’ani ‘o Aloha, iā Hawai’i i loko o ka maika’i a me ka maika’i ‘ole paha.

———

E ho’ouna ‘ia mai na ā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:

>> kwong@hawaii.edu

>> rsolis@hawaii.edu

a i ‘ole ia, ma ke kelepona:

>> 956-2627 (Laiana)

>> 956-2627 (Kekeha)

This column is coordinated by Kawaihuelani Center for Hawaiian Language at the University of Hawai’i at Mānoa.