Synopsis: What would be a good mascot for the Rainbow Warriors and the Rainbow Wāhine? Maybe Kalo Man. Or maybe there needs to be two mascots.

Welina e nā makamaka heluhelu o Kauakūkalahale, nā mea e noho nei ma kēia pae ‘āina aloha o kākou, a me nā makamaka ho’i e noho nei ma nā wahi like ‘ole o ka honua nei. Ua lilo i mea kama’ilio ‘ia ka mea ho’olaki hou o ke Kulanui o Hawai’i. ‘A’ohe mea ho’olaki o nā Koa Ānuenue a me nā Wāhine Ānuenue i nā makahiki ‘elua i hala iho nei. ‘O ka mea ho’olaki hope loa, ‘o ia ‘o Vili ke Koa, ‘o ia ho’i, ‘o Vili Fehoko, a e hana ana ‘o ia ma ke ‘ano he mea ho’olaki no nā makahiki he nui. He 12 makahiki ka lō’ihi.

‘O Vili ke Koa, i kona wā e hana ana ma ke ‘ano he mea ho’olaki, he ho’oulu ‘i’o nō ‘o ia i ke anaina māka’ika’i. A ua nui loa nā kānaka i mahalo i kāna hana. Akā, ua nui nō ho’i paha nā kānaka i mahalo ‘ole i kāna hana. I ka makahiki 2004, ua ho’ohalahala ‘ia ‘o ia no kāna hana hō’oi’oi. Ma kekahi ho’okūkū, ua hana ‘ino ‘o ia i ka mea ho’olaki o ke Kulanui o Alabama. He ‘elepani ia, a ua huki ‘o Fehoko i kona ihu peleleu a kau ma kahi o kona ‘ēlemu a ho’omaka akula i ka holopeki ‘ana me ke kauō pū ‘ana aku i kahi ‘elepani i hope. Kohu mea lā, ua maika’i ihola ka hana a Fehoko, no ka mea, ua ho’omau ‘o ia i ka hana mea ho’olaki he 8 makahiki ma ia hope mai. A i ka makahiki 2012, ua holo ihola ‘o ia i kona mana’o e waiho i ia hana, i mea e nui ai ka manawa no ka ho’onanea pū ‘ana me kona ‘ohana.

Ma hope mai o ia makahiki, ‘a’ohe mea ho’olaki o ke Kulanui o Hawai’i. I ke kama’ilio ‘ana o ke Ke’ena ‘Ālapa no ka mea ho’olaki hou, ua holo ka mana’o, inā he mea ho’olaki hou, maika’i ke kū i ke ‘ano o ke Koa Ānuenue a me ka Wahine Ānuenue.

No laila, he aha ana lā ka mea ho’olaki hou o ke Kulanui o Hawai’i? ‘O Kalo Man paha. Ua pa’a ‘ē kahi mele a Ikaika Brown ma ia inoa. A he hiki i ka Pāna Puhi ‘Ohe o ke Kulanui o Hawai’i ke ho’okani i ia mele i kēlā me kēia pule. A puka mai kahi Kalo Man, me ka ‘umeke poi a ‘umeke pa’i ‘ai paha, e hānai ana i ke anaina. ‘Eā, he mea paha ia e piha ai ke kahua pā’ani i nā kānaka māka’ika’i.

Pehea inā he ‘elua mea ho’olaki o ke Kulanui o Hawai’i, he kāne a he wahine. He mau koa paha lāua, a he hula nō ho’i. He mea maika’i nō ho’i ia, ‘oiai, ‘o ka po’e hula, he ikaika nō ke kino. A ‘o ka loa’a ‘ana o ke kāne a me ka wahine, he kū loa nō i ke ‘ano o ka Hawai’i. ‘O ia paha ka mea e pono ai. He mea e kū ana i ke ‘ano o ka Hawai’i. He aha lā ia mea ho’olaki, ‘o kahi mea nui, he mea ia e ha’aheo ai ko Hawai’i.

E ho’ouna ‘ia mai na leka i mua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:

» kwong@hawaii.edu
» rsolis@hawaii.edu

a i ‘ole ia, ma ke kelepona:

» 956-2627 (Laiana)
» 956-2627 (Kekeha)

This column is coordinated by Kawaihuelani Center for Hawaiian Language at the University of Hawai’i at Manoa.