Synopsis: The 8th Interdisciplinary Colloquium on Proverbs in Tavira, Portugal, hosted by the Associação Internacional de Paremiologia/International Association of Paremiology (AIP-IAP), the Municipality of Tavira and the Hotels Porta Nova and Vila Galé, was a success, with representatives from about 30 countries sharing their research on paremiology.

‘A’ohe hana nui ke alu ‘ia. He ‘ōlelo kahiko ia mai nā kūpuna mai, e hō’ike ana ē ke hana like kānaka a kōkua aku ho’i a kōkua mai, he hiki ke ho’okō ‘ia nā mea like ‘ole. A ‘o ia ka mea i koho ‘ia ai ua ‘ōlelo kahiko nei i po’o mana’o no kēia mo’olelo nei. Ua mālama ‘ia iho nei ka ‘Ewalu o ka ‘Aha Kūkā ma ka ‘Ōlelo No’eau. Ma Tavira, Pokukala i mālama ‘ia ai ua ‘aha kūkā nei a he ‘ewalu ona lā, mai ka lā 2 o Nowemapa a i ka lā 9. A he mea maopopo wale, ua nui nō ka hana ma ka ho’olālā ‘ana. A ma muli o ke alu like ‘ana o nā kānaka like ‘ole, ua holo pono ua ‘aha kūkā nei.

‘O nā kānaka i komo i loko o ia ‘aha kūkā, no nā ‘āina like ‘ole nō lākou, he kanakolu ‘āina, ‘o ‘Anakola, ‘o Belegiuma, ‘o Palakila, ‘o Kina, ‘o ke Aupuni Pelekikena ‘o Keka, ‘o ‘Esetonia, ‘o Pinilana, ‘o Palani, ‘o Kelemania, ‘o Hunakalia, ‘o Pokukala, ‘o Kepania, ‘o Solowenia, ‘o Kuekena, ‘o Pelekane Nui, ‘o Wiekanama, ‘o Solowakia, ‘o São Tomé e Príncipe, ‘o Romania, ‘o ka Lepupalika Kemokalaka ‘o Konokō, ‘o Pōlani, ‘o Nolewai, ‘o Nekelana, ‘o Moloko, ‘o Lakawia, ‘o Iāpana ‘o ‘kālia, ‘o ‘Ilelani, ‘o ‘Ilana a me Hawai’i. A ‘o nā ha’i ‘ōlelo o Hawai’i, ‘o ia nō ko ‘oukou mau mea kākau o kēia lā.

Ua ulu ka hoi i nā ha’i ‘ōlelo a pau. ‘O kekahi mau ha’i ‘ōlelo na’e, ‘a’ole i hiki ke ho’omaopopo ‘ia e ko ‘oukou mau mea kākau, no ka mea, ma ka ‘ōlelo Pukikī nō ia. Ma nei ‘aha, he ‘elua ‘ōlelo i ‘ae ‘ia, ‘o ka ‘ōlelo Pelekane, ‘oiai, ‘o ia paha ka ‘ōlelo i laha loa ma ka honua nei, a me ka ‘ōlelo Pukikī, ‘oiai, ‘o Pokukala nō ka ‘āina e mālama ‘ia ai ka ‘aha kūkā. He nui nō nā kumuhana i ha’i ‘ōlelo ‘ia, akā, ‘o nā mea a pau, he pili nō i ia mea he ‘ōlelo no’eau. ‘O kekahi o nā kānaka ha’i ‘ōlelo, ua hele nō i nā ‘aha kūkā (ICP) ‘ewalu, a ‘o kekahi, ‘akahi nō a hele i kēia makahiki nei. He nani wale kēia ‘aha kūkā, no ka mea, he wahi kēia e kūkākūkā ai me nā kānaka like ‘ole o nā ‘āina like ‘ole no ia mea he ‘ōlelo no’eau, a pēlā pū me ke a’o aku, a’o mai.

Mahalo a nui i nā mea ho’okipa, ‘o ia ka ‘Ahahui Noi’i ‘Ōlelo No’eau o nā ‘Āina Like ‘Ole (AIP-IAP), ke kaona aupuni kū’oko’a o Tavira a me nā Hōkele ‘o Porta Nova a me Vila Galé, ‘o nā limahana a pau i komo pū ma ka ho’olālā ‘ana a me ka hana i nā mea e pono ai, a pēlā pū me nā kānaka a pau i hele, e aloha nui nei ho’i i nā ‘ōlelo a nā kūpuna, nā ‘ōlelo no’eau ho’i.

A ‘o kekahi mea i koho ‘ia ai ia ‘ōlelo kahiko e kau a’ela i luna i po’o mana’o, ‘o ia nō ka hana i mea e ho’omau ai i nā ‘ōlelo no’eau a kēlā me kēia lāhui kanaka. He hana nui nō ia, akā, ke alu like kākou, he hiki nō ke ho’okō ‘ia ka makemake.

E ho’ouna ‘ia mai na ā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:

» kwong@hawaii.edu
» rsolis@hawaii.edu

a i ‘ole ia, ma ke kelepona:

» 956-2627 (Laiana)
» 956-2627 (Kekeha)

This column is coordinated by Kawaihuelani Center for Hawaiian Language at the University of Hawai’i at Mānoa.