Synopsis: Congratulations to Marcus Mariota and his family, and not just for all his awards.

Ua piha hau’oli ka na’au o ko Hawai’i a me ko ‘Olekona i ke kūkala ‘ia ‘ana a’e i kēlā Pō’aono aku nei, ua lilo aku nei ka Makana ‘o Heisman i kahi keiki o Hawai’i nei. ‘O Marcus Mariota kona inoa. ‘O ka makamua ia o ka lilo ‘ana o ua makana lā i ka mea pā’ani pōpō pekupeku i hānau a i hānai ‘ia paha i Hawai’i nei. A ‘o ka makamua nō ho’i ia o ka lilo ‘ana aku o ua makana lā i ka mea pā’ani pōpō pekupeku o ke Kulanui ‘o ‘Olekona.

A he mau manawa ko Marcus i kau ai i ka hano hāweo no ka hana ma ke kikina i hala iho nei. Ua koho ‘ia ‘o ia e ka Associated Press, he ‘alihikūlele ‘Amelika Piha. A ‘o ka Mea Pā’ani Pōpō Pekupeku Polenekia ‘oi ia o nā Kulanui o ‘Amelika o ka Makahiki. A ‘o kekahi mau makana i lilo aku iā ia, ‘o ia ka Makana ‘o Davey O’Brien, ka Makana ‘o Walter Camp, ka Makana ‘o Maxwell, ka Makana Lima Kula ‘o Johnny Unitas. ‘O Marcus nō ho’i ka Mea Pā’ani ‘Oi Loa o ka Ho’okūkū Inoa Moho o ka ‘Ahahui Pac-12. A koho ‘ia nō ho’i ‘o ia, ‘o ia ka Mea Pā’ani Kūlele ‘Oi o ka Makahiki ma ua ‘ahahui lā.

‘O kahi mea maika’i wale, i loko nō o ka nui o nā makana i lilo aku nei i ua keiki nei o Hawai’i, ‘a’ole ‘o ia i ho’oki’eki’e iki. He noho iho nō i ke ōpū weuweu. A ‘o ia kekahi mea i mahalo nui ‘ia ai ‘o Marcus Mariota, ‘o ia ho’i, ‘o kona ‘ano ha’aha’a. A no laila, mahalo nō ho’i i nā mākua o Marcus, na lāua nō i hānai a a’o pono iā ia, a lilo ai ‘o ia he kanaka maika’i.

A ‘o kekahi mea maika’i, ‘a’ole wale nō ‘o ia he kanaka mākaukau a akamai ho’i ma ke kahua pā’ani, akā, he kanaka ‘eleu nō ho’i ‘o ia ma ka hana kula. E puka ana ‘o ia i kēia kau nei. He ‘ekolu wale nō makahiki a pa’a mai ke kekelē. He kumu alaka’i maika’i wale ‘o Marcus na nā keiki.

Ma ka lilo ‘ana o ka Makana Heisman iā Marcus, he hō’ike ia i ka lehulehu, he hiki nō i nā keiki o Hawai’i ke hana a ho’okō paha i nā mea kupaianaha. A ‘a’ole wale nō ma ka hana ‘ālapa, akā ma nā ‘ano hana like ‘ole o ka honua nei.

E ‘ā’ume’ume aku ana ‘o Marcus a me nā Kakā i nā Kemenō o Pololika Moku’āina ma ke kahua pā’ani i ka lā mua o ka mahina ‘o Ianuali ma ka Ipu Pua Loke. Inā na Marcus mā ka lanakila, ‘o lākou kekahi o nā hui ‘elua o ka Ho’okūkū Inoa Moho Kulanui ‘Amelika e mālama ‘ia ana ma ka lā 12 o ka mahina ‘o Ianuali. Ma hope o kēlā, he aha ana lā ka hana a Marcus Mariota? ‘O ka ho’omau i ka ho’ona’auao ‘ana ma ke kula lae o’o a me ka ho’omau ‘ana i ka pā’ani ‘ana ma ke kūlana kulanui? ‘O ka lilo ‘ana i loea pā’ani pōpō pekupeku? He aha ana lā kona ala e hele ai, e hiki ana iā ia ke ‘ōlelo, ua ‘ae’oia au.

He ho’omaika’i kēia iā ‘oe e Marcus Mariota no ka hana kupaianaha ma ke kahua pā’ani a me ka hana kūpono ma ke ‘ano he kanaka.

E ho’ouna ‘ia mai na ā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:

» kwong@hawaii.edu
» rsolis@hawaii.edu

a i ‘ole ia, ma ke kelepona:

» 956-2627 (Laiana)
» 956-2627 (Kekeha)

This column is coordinated by Kawaihuelani Center for Hawaiian Language at the University of Hawai’i at Mānoa.