Synopsis: Active-duty soldiers will be reduced to perhaps 420,000 soldiers throughout the United States. As usual, the American government does things without thinking about consequences.

Aloha mai e nā makamaka heluhelu o Kauakūkalahale. Ua lilo iho nei ke ‘oki ‘ia ‘ana o ka pū’alikoa i mea kama’ilio nui ‘ia ma Hawai’i nei. I ka Pō’alua nei i mālama ‘ia ai kahi hālāwai hō’ike mana’o no ka ho’ēmi ‘ia ‘ana iho o nā koa ma Hawai’i nei ma ka Hōkele ‘o Hale Koa. A i ka Pō’akolu nei ka lua o ia ‘ano hālāwai, i ke Kula Ki’eki’e ‘o Leilehua i mālama ‘ia ai. Ma ka hālāwai mua, ua hō’ike a’e kekahi mau luna aupuni, ‘o ia ke Kenekoa Brian Schatz, ka Lunamaka’āinana Mark Takai a me ka Lunamaka’āinana Tulsi Gabbard, ma o ka wikiō, i ko lākou kū’ē ‘ana aku i ka ho’ēmi ‘ia ‘ana o nā koa a me ko lākou makemake e noho pa’a ka pū’alikoa ma Hawai’i nei. Ua hele kino aku ka Meia Kirk Caldwell a hō’ike like i kona kū’ē ‘ana a me kona mahalo i ka pū’alikoa ma Hawai’i nei.

‘A’ole na’e pēlā nā kānaka a pau ma ia mau hālāwai. Ma ua hālāwai mua lā, ma hope o ka hō’ike ‘ana o kekahi mau loea kālai’āina i ko lākou makemake e noho pa’a ka pū’alikoa, ua hele a ‘aikena kekahi wahine, a ‘uā a’ela ‘o ia, “Makemake au e lohe i ka leo o ka maka’āinana! E hō’ike mana’o kekahi i alualu ‘ole i ke kūlana kālai’āina a i lilo ‘ole paha i luna aupuni!” A he mau kānaka nō e kāko’o ana i ua wahine nei. Ma ia mau hālāwai ‘elua, he mau kānaka e kāko’o ana i ka ho’ēmi ‘ia ‘ana o ka pū’alikoa a me ko lākou ha’alele ‘ana iā Hawai’i nei, a he mau kānaka nō ho’i e kū’ē ana i ia mau mea.

‘O ‘Amelika Hui Pū ‘Ia a me kona mau luna ka pilikia. Ke kū nei lākou i ka hewa. E like me ka mea mau, ‘a’ohe nānā o ‘Amelika. E hana wale aku ‘o ia me ka no’ono’o ‘ole i ka hopena. E kau a’e paha ka nīnau, “He aha ka hana hewa o ‘Amelika Hui Pū?” A eia mai ka pane, “He nui nō ka hana hewa, ‘a’ole e pau i ka helu ‘ia, akā, no ka ho’ēmi ‘ia ‘ana o ka pū’alikoa, ‘o ia ke ‘oki ‘ia ‘ana o nā koa he nui hewahewa i ka wā like. ‘O ka nui paha o nā koa e ‘oki ‘ia ma O’ahu nei, he 19,800 lākou. A he ‘ohana nō ho’i paha ko ka hapanui o lākou, he wahine a he kāne paha, he mau keiki paha. He aha ana lā ka hopena o lākou? ‘A’ole paha e waiho wale ana he 20,000 kūlana hana ma O’ahu nei e komo koke ai nā koa a pau e ‘oki ‘ia, i mea e mana’o ai ke ola.

‘O ka hana kūpono paha a ka pū’alikoa, ‘o ia ka ho’ēmi li’ili’i ‘ana i kēlā me kēia makahiki, a laila, ‘a’ole paha e nui loa ka pilikia o nā koa, nā ‘ohana a me nā hui a me nā kānaka e kālele nei i ka pū’alikoa ke pau loa i ke ‘oki ‘ia. Inā ‘a’ohe luna i no’ono’o i nei ha’ina i wehewehe ‘ia iho nei, makehewa ko lākou uku ‘ia ‘ana. E ‘ike i ka hoa kanaka, o kipa hewa ke aloha i ka ‘īlio. E nā luna aupuni, ‘a’ole wale nō e nānā i ka hana hiki wale, e no’ono’o pono i ka mea e pono ai ke kanaka. He mau alahele maika’i a makepono a kūpono ho’i ke no’ono’o iho ‘oukou.

E ho’ouna ‘a mai na ā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:

>> kwong@hawaii.edu

>> rsolis@hawaii.edu

a i ‘ole ia, ma ke kelepona:

>> 956-2627 (Laiana)

>> 956-2627 (Kekeha)

This column is coordinated by Kawaihuelani Center for Hawaiian Language at the University of Hawai’i at Mānoa.