Synopsis: Domestic abuse has been around for ages. Hopefully it can end soon, with more victims speaking out.

Welina e nā makamaka heluhelu o Kauakūkalahale. Ua kaumaha ihola ka na’au i ka heluhelu ‘ana aku nei o ko ‘oukou mea kākau i kekahi po’o mana’o o ka Hōkū Avalataisa o nehinei. Eia mai ua po’o mana’o lā. Kūka’i ‘ōlelo ihola ka ipo ma mua o kekahi māka’i i ka mo’olelo o kona hana ‘ino ‘ia e ia māka’i. Ua ho’omaka ko lāua wā he mau ipo i ka mahina ‘o Malaki o ka makahiki 2013, a pau ihola i ka mahina ‘o Pepeluali o ka makahiki 2014. Wahi a ua wahine lā, ua limanui ‘o Danson Cappo iā ia a ua ho’oweliweli ‘o Cappo iā ia ma muli o ke kūlana māka’i o Cappo, i pa’a kona waha, ‘a’ole e ha’i aku ka wahine no kona hana ‘ino ‘ia ‘ana. He māka’i ‘o Cappo he ‘elua makahiki. ‘O kekahi ‘ōlelo a ua wahine nei, ua ku’i ‘ia ‘o ia e Cappo a ua uli mai ka maka, ua kau ka pū a Cappo i ke po’o o ka wahine me ka ‘ōlelo pū ‘ana aku, he mana’o kona e ho’omake iā ia.

A he mau hana ‘ē a’e nō ho’i. Wahi a ka wahine, he mana’o kona e kāhea aku i ka māka’i ma mua, akā, ha’i maila ‘o Cappo iā ia, ‘a’ole e hilina’i ‘ia kāna ‘ōlelo ma mua o ka ‘ōlelo a kahi māka’i. Ke lana nei ka mana’o o ua wahine nei, lilo kona mo’olelo i mea kōkua i ka po’e e hana ‘ino ‘ia nei e kekahi mea aloha, a he māka’i ia.

Mahalo a nui i ua wahine nei no ka hō’ike ‘ana a’e i kona mo’olelo. ‘A’ole hiki ke ho’āhewa koke aku iā Cappo, no ka mea, ‘a’ole ‘o ia i kū i mua o ka ‘aha ho’okolokolo a holo ka mana’o o ke kiure ma ke kū o ka hewa a me ke kū ‘ole paha. Akā, inā ua hana ‘i’o nō ‘o ia, e ‘imi aku paha ‘o ia i pololakamu e a’o ai ‘o ia i ka hana e ‘u’umi ai i kona inaina i ka wahine, a i nā kānaka a pau paha.

I ka wā hea lā i ho’omaka ai ia hana ‘o ka pepehi ‘ana o ke kāne i kāna wahine, a ‘o ka wahine paha i kāna kāne (a ‘o ka makua paha i kāna keiki). Akā, ho’omana’o paha ‘oukou e nā makamaka heluhelu, i ka mahina paha ‘o Kepakemapa, ua pa’i ‘ia kekahi mo’olelo kahiko mai loko mai o ka nūpepa Ka Leo O Ka Lahui no ka hō’eha ‘ana o ke kāne i ka wahine. ‘O ka makahiki 1891 ia, a ‘o ia hana mau nō ia.

He pono kākou ke a’o i kā kākou po’e keiki i ka hana kūpono, pēlā paha e pau ai nei hana māna’ona’o. Ma muli paha o ka ‘ike ‘ana o ke keiki i ka hana a ka makua, a he kuhi paha kā ke keiki, he mea ma’a mau ia. No ka mea, ‘o ka hana a ka makua, he hei ia na ke keiki.

‘Auhea ‘oukou e nā kānaka, inā hana māinoino ‘ia ‘oe a hō’eha ‘ia paha e kāu ipo, kāu kāne a e kāu wahine paha, e kāhea aku i kēia helu kelepona, 1-800-799-7233. ‘O ka Helu Hikiwawae Hana Māinoino Kūloko ia a he manuahi ke kāhea ‘ana no ke kāko’o i nā hola a pau o ka lā ma ka ho’olālā, kahi e noho ai, ke kama’āina kāko’o a me nā mea e pono ai ‘oe.

A ‘auhea ‘oukou e ka po’e hō’eha wahine, e ho’opau aku i ia ‘ano no’ono’o ‘ana, a e mālama kākou iā lākou. ‘A’ole e poina iā kākou, na ka wahine nō kākou i hānau.

A e maka’ala ho’i ‘oukou i ke Ka’i Huaka’i A Ka Po’e Kāne No Ke Kū’ē ‘Ana I Ka Hana Māinoino Wahine A Kāne paha. Aia ana i ka mahina ‘o ‘Okakopa.

E ho’ouna ‘ia mai na ā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:

>> kwong@hawaii.edu

>> rsolis@hawaii.edu

a i ‘ole ia, ma ke kelepona:

>> 956-2627 (Laiana)

>> 956-2627 (Kekeha)

This column is coordinated by Kawaihuelani Center for Hawaiian Language at the University of Hawai’i at Mānoa.