Kauakukalahale: I le’a ka hula i ka ho’opa’a

Synopsis: Beautiful hula on Thursday night. Congratulations to all the women who danced for the Miss Aloha Hula competition.

Welina e nā makamaka heluhelu i hele kino aku paha i ka Ho’okūkū Hula ‘o ka Merry Monarch a me nā makamaka heluhelu ho’i i kau ka maka ma luna o ke kīwī. Ua nanea nō paha nā maka i ka nānā ‘ana aku i nā kino ‘olu i ka hula. Ua lohe ‘ē paha ‘oukou i kahi ‘ōlelo no’eau e kau a’ela i luna, ‘o ia ho’i, ‘o “I le’a ka hula i ka ho’opa’a.” He ‘ōlelo ia e hō’ike ana he mea nui ka mea nāna e ho’opa’a ana i ka ipu a i ka pahu paha a pēia pū nō me ka leo e oli ana. A no laila, he nui ka mahalo o ko ‘oukou mea kākau i ka po’e kumu hula a me nā ho’opa’a ‘ē a’e i hana i kā lākou hana e le’a ai ka hula o ka pō nei. A ‘auhea ‘oukou e nā ‘ōlapa i hula iho nei i ka pō nei, he ho’omaika’i kēia iā ‘oukou no ko ‘oukou ho’omau ‘ana i nei hana mai nā kūpuna mai. He mea maopopo, he nui nā lā a me nā hola a ‘oukou i noke ai i ka ho’oma’ama’a ‘ana ma ka hula a me ke oli a pēlā nō ho’i i le’a ai ka hula a i ‘olu ai ho’i ke kino i ka hula. A he ho’omaika’i nō kēia i ka Miki Aloha Hula hou, ‘o ia ho’i ‘o Jasmine Kaleihiwa Dunlap o ka Hula Hālau ‘O Kamuela, a ‘o Kau’ionālani Kamana’o lāua ‘o Kunewa Mook kāna mau kumu. A ‘o ka helu ‘elua, ‘o ia ‘o Abby Claire Hali’ahauola Resulta o ka Hālau Hi’iakaināmakalehua, a ‘o Robert Ke’ano Ka’upu IV lāua ‘o Lono Padilla kāna mau kumu. ‘O ka helu ‘ekolu, ‘o ia ‘o Noelani Dudoit o ka Lā ‘Ōnohi Mai O Ha’eha’e, a ‘o Tracie lāua ‘o Keawe Lopes kāna mau kumu. A ‘o ka helu ‘ehā, ‘o ia ‘o Jayna Marie Kau’iokalanimālie Shaffer o ka Hālau Ka Lei Mokihana O Leinā’ala, a ‘o Leinā’ala Pavao Jardin kāna kumu. A ‘o ka helu ‘elima, ‘o ia ‘o ‘Ānela U’ilani Ruth Fusano Tanigawa o ka Hālau Nā Lei Kaumaka O Uka, a ‘o Nāpua Greig kāna kumu. E ho’onanea kākou i ka hula o kēia ahiahi.

Mai poina i ko ‘oukou mea kākau ka hā’awi aloha ‘ana i ka ‘ohana o kekahi mau kānaka i hala i ka makahiki i ka’a hope iho nei. He mau kānaka ia i pili i ka hula a me ka mele paha a me ka Ho’okūkū Hula ‘o ka Merrie Monarch. ‘O ia ‘o Leilani Alama, ‘o Wayne Keahi Chang, ‘o Aloha Dalire, ‘o Richard Piggy Kaleohano a me Edith Kawelohea McKinzie. He aloha kēia iā ‘oukou e nā kūpuna. Ua ola nā mea Hawai’i iā ‘oukou.

Aloha Mauna Kea

Synopsis: A couple of events to show support for Mauna Kea.

E Kū, E Kia’i. E mālama ‘ia ana kēia i ka lā 12 o kēia mahina nei, kēia Lāpule ho’i, i ka mokupuni ‘o Hawai’i. Ma ka Pāka Mokua’āina ‘o Wailoa ana e ‘ākoakoa ai kānaka ma kahi o ke ki’i o ke Ali’i ‘o Kamehameha. I ka hola 10:00 ka ho’omaka ‘ana. A e pi’i like ana no luna o Mauna Kea. Noi ‘ia ka po’e hele i ke komo ‘ana i ka lole ‘ula’ula, inā hiki.

Kū Kia’i Mauna. He hālāwai hō’eu’eu kēia e mālama ‘ia ana i kēia Lāpule, ka lā 12 o kēia mahina nei. I ‘Iolani Hale ana e mālama ‘ia ai, mai ka hola 12:00 o ke awakea a i ka hola 7:00 o ke ahiahi. E ha’i ‘ōlelo ana kekahi mau kānaka, a e ho’okani pila ana kekahi.

Kū Kia’i Mauna. E mālama ‘ia ana kahi ‘ahamele i ka lā 23 o ka mahina ‘o Mei. Ma Hawaiian Brians, O’ahu ana e mālama ‘ia ai. E ho’omaka ana i ka hola 9:00 o ke ahiahi. He ‘elima kālā e komo ai, a he pono ke piha nā makahiki he 18 i ke kanaka a ‘oi aku. ‘O nā pōmaika’i e loa’a mai ana, e lilo ana no ka pono o Mauna Kea.

This column is coordinated by Kawaihuelani Center for Hawaiian Language at the University of Hawai’i at Mānoa.