Synopsis: Some events in Hawai’i and elsewhere to show support for Mauna Kea.

Eia mai kekahi mau hana e ‘ākoakoa ana kānaka no ka pono o Mauna Kea a me ke aloha ‘āina. A ‘o kekahi hana, ‘o ia ka leka ‘ana aku a me ke kāhea ‘ana aku paha i nā kahu waiwai o ke Ke’ena Kuleana Hawai’i no ka paipai ‘ana aku iā lākou e mālama pono lākou iā Mauna Kea. Eia mai nā hua leka uila a me nā helu kelepona o nā kahu waiwai. ‘O ka Luna Ho’omalu Robert Lindsey, robertl@oha.org, (808) 594-1855; ‘o Colette Machado, colettem@oha.org, (808) 594-1837; ‘o Peter Apo, petera@oha.org (808) 594-1854; ‘o Haunani Apoliona, reynoldf@oha.org (808) 594-1886; ‘o Rowena Akana, rowenaa@oha.org, (808) 594-1860; ‘o John Waihe’e IV, crayna@oha.org, (808) 594-1876; ‘o Carmen Hulu Lindsey, hulul@oha.org, (808) 594-1858; Dan Ahuna, dana@oha.org, (808) 594-1751; a ‘o Leina’ala Ahu Isa, leia@oha.org, (808) 594-1857.

Hō’ole TMT. I kēlā lā kēia lā a pau loa ka mana’o kūkulu TMT, mai ka hola 3:00 o ka ‘auinalā a i ka hola 6:00 o ke ahiahi, e ‘ākoakoa ana kānaka ma ka huina o nā alanui ‘o Kekuanaoa a me Kanoelehua ma kahi o ke Kahua Ho’olulu Mokulele o Hilo, no ka hō’ike ‘ana i ke aloha iā Mauna Kea. E komo i ka lole ‘ula’ula, a e lawe pū ‘ia ka hō’ailona, ka shaka, ke aloha a me ka mino’aka.

Ho’ōki TMT (#TMTshutdownMaunalua). E ‘ākoakoa ana kānaka ma ka Pāka Kahakai ‘o Maunalua i kēia lā, ka lā 18 o ka mahina ‘o ‘Apelila, no ka hō’ike ‘ana i ke aloha iā Mauna Kea a me ke a’o ‘ana aku i nā mea e pili ana i ia kuahiwi la’a. E ho’omaka i ka hola 10:00 o ke awakea, a e pau i ka hola 3:00 o ka ‘auinalā. E lawe ‘ia aku nā hō’ailona, nā hae, nā ‘ohana, nā hoa aloha a me ke aloha.

Hana Hō’ailona. I kēia lā, ka lā 18 o ‘Apelila, ma ka mokupuni ‘o Hawai’i, e naue aku i Ono Kona, Kona Brewing Co. no ka hana ‘ana i ka hō’ailona no ka pono o Mauna Kea. He manuahi, a he hiki i nā kānaka a pau ke hele, mai ke nui a ka li’ili’i. Inā hiki, e hā’awi manawale’a paha i ka uhi pela, ke kīlepalepa, ke pena, ka hulu pena a pēlā aku. E ho’omaka i ka hola 6:00 o ke ahiahi, a e pau i ka hola 10:00 o ke aumoe.

Eō Pokalana, ‘Olekona. E ‘ākoakoa ana ko Pokalana, ‘Olekona no ka hō’ike ‘ana i ke aloha iā Mauna Kea i ka lā 18 o kēia mahina nei ‘o ‘Apelila. E ho’omaka i ka hola 2:00 o ka ‘auinalā. Aia ana i Paionia Kuea.

‘O Mauna Kea Mākou (We Are Mauna Kea). He hālāwai hō’eu’eu kēia i ka lā 19 o kēia mahina nei. Aia e mālama ‘ia ana i ka Hale Waihona Puke o Allendale ma Pasadena, Kaleponi. I ka hola ‘elua o ka ‘auinalā e ho’omaka ai.

Hō’ike Aloha Iā Mauna A Wākea. Aia ana kēia ma ka McDonalds o Wahiawā i ka lā 22 o kēia mahina nei. E ho’omaka ma kahi o ka hola 4:30 a me ka hola 5:00 paha.

Kū Kia’i Mauna. E mālama ‘ia ana kahi ‘ahamele i ka lā 23 o ka mahina ‘o Mei. Ma Hawaiian Brians, O’ahu ana e mālama ‘ia ai. E ho’omaka ana i ka hola 9:00 o ke ahiahi. He ‘elima kālā e komo ai, a he pono ke piha nā makahiki he 18 i ke kanaka a ‘oi aku. ‘O nā pōmaika’i e loa’a mai ana, e lilo ana no ka pono o Mauna Kea.

This column is coordinated by Kawaihuelani Center for Hawaiian Language at the University of Hawai’i at Mānoa.