Synopsis: A mother in Baltimore demonstrates the meaning of a proverb. Also, a few Protect Mauna Kea events are coming up.

Welina e nā makamaka heluhelu, ‘o ia ‘ōlelo no’eau e kau a’ela i luna, e hō’ike mai ana ia, he mea maika’i ka ‘ōlelo a’o a ka makua. A ‘ike ‘ia kahi ‘ōlelo i ‘ane like ma kekahi o nā puke a Dr. No’eau Warner, ‘o ia ho’i, “Mai ho’okuli i ke a’o a ka makua o pilikia ‘oe!” A he ‘ōlelo paha ia no nā kānaka a pau a puni ka honua. Ua lohe paha ‘oukou no ia kanaka Pā’ele i make aku nei i kona wā e lawe ‘ia ana i ka hale māka’i ma Balatimoa. Ua ala a’ela ka haunaele i laila, a puhi akula kekahi po’e i kekahi mau hale i ke ahi, a pēlā pū me kekahi mau ka’a. Ua ‘aikena ihola ia mau kānaka o ia wahi i ka hana a ka māka’i i ka po’e Pā’ele. A ‘o ka pilikia, he hana ia e ho’omau ‘ia ana no ka manawa lō’ihi, a ma nā wahi like ‘ole o ‘Amelika. Ke kuhi nei paha kekahi, ‘o ia ‘ano hana haunaele wale nō ka mea e ho’omaopopo ai nā luna aupuni a me nā māka’i i ka hana ‘ino ‘ia o lākou. (‘O ke Kapu Aloha paha kahi ala e pono ai.)

‘A’ole na’e pēlā nā kānaka a pau o laila. ‘O kekahi makuahine, ‘o Toya Graham, ua ha’i akula i kāna keiki kāne, ‘a’ole e hele aku i ka ho’ohaunaele ‘ana. Akā, ua kāpae ‘ia akula ke a’o a ua makua nei, a hele akula ua wahi keiki ala. A ‘ike akula ‘o Graham i kāna keiki, iā Michael Singleton, e pehi ana i ka pōhaku a pēlā aku. Pololei akula ‘o ia a i mua o kāna keiki, me ka nuku ‘ana aku a pēlā pū me ke pa’ipa’i ‘ana aku i kona po’o. ‘O ke pa’i po’o, ‘a’ole ia he mea maika’i, akā, kohu mea lā, ua pi’i loa a’ela ke kai o Graham, a e pa’i wale aku ana kona lima pa’i. Ke hānai ho’okahi nei ‘o Graham i kāna mau keiki ‘eono, a ‘a’ole ‘o ia makemake e like ka hopena o kāna keiki me Freddie Gray, a no laila nō ‘o ia i hana ai pēlā. ‘A’ole i nāukiuki a nuha paha ke keiki i ka hana a kona makuahine, no ka mea, maopopo iā ia, ma muli o ke aloha ‘o ia i hana ai pēlā. A ‘o ia nō paha ka mea e ha’i ai ka makua i kahi ‘ōlelo a’o i ke keiki. He makuahine alaka’i kēia no ka lehulehu.

A eia mai kekahi mau hana e mālama ‘ia ana a puni ka honua, kahi e hō’ike ai i ke aloha ‘āina a me ke aloha ho’i iā Mauna Kea. E naue aku paha i kekahi o ia mau hana a hō’ike i ke kāko’o a me ke aloha ‘āina, ke aloha kupuna a me ke aloha kanaka. Kapu Aloha.

Aloha ‘Āina. E ‘ākoakoa ana ma ka Spam Jam i Waikīkī i kēia lā, ka lā 2 o Mei, no ka hō’ike hō’ailona ‘ana mai ka hola 6:00 o ke ahiahi a i ka hola 8:00. E hui pū i ke ki’i o Duke Kahanamoku.

Kū Kia’i Mauna. I ka lā 3 o kēia mahina nei ‘o Mei, e mālama ‘ia ana kahi wā a’o no Mauna Kea ma ke Kulanui ‘o Mills. E ho’omaka ana i ka hola 3:00 o ka ‘auinalā, a e pau ana i ka hola 6:00 o ke ahiahi. E ho’omaopopo ‘ia ana kahi e mālama ‘ia ai, ke pa’a. E ha’i ‘ōlelo ana ‘o Kumu Paul Neves. Inā he nīnau paha, e leka uila aku iā Makaiwa ma ka hua leka uila, mykaiwa@gmail.com, a e kāhea aku paha ma ka helu (808) 990-8754.

Kū Kia’i Mauna. E mālama ‘ia ana kahi ‘ahamele i ka lā 23 o ka mahina ‘o Mei. Ma Hawaiian Brians, O’ahu ana e mālama ‘ia ai. E ho’omaka ana i ka hola 9:00 o ke ahiahi. He ‘elima kālā e komo ai, a he pono ke piha nā makahiki he 18 i ke kanaka a ‘oi aku. ‘O nā pōmaika’i e loa’a mai ana, e lilo ana no ka pono o Mauna Kea.

This column is coordinated by Kawaihuelani Center for Hawaiian Language at the University of Hawai’i at Mānoa.