Kauakukalahale: Mai ka pō mai ka ‘oia’i’o

Synopsis: The “TMT and Mauna Kea: Common Ground” series of presentations began May 19. There will be three more presentations, on May 27 at Kula’imano Community Center; June 2 in Pepe’ekeo; and June 9 at Laupāhoehoe Community Public Charter School Cafeteria. They are from 6:30 to 9 p.m.

Welina e nā makamaka heluhelu o Kauakūkalahale. Ua lohe iho nei paha ‘oukou no kahi mau ha’i ‘ōlelo e mālama ‘ia ana i kēia mahina nei a me ka mahina ‘o Iune. Ua kapa ‘ia iho ia mau ha’i ‘ōlelo, ‘o ka ‘Ohe Nānā Kanakolu Mika ma Mauna Kea: ka Honua Like. Na ka Hui Ho’omohala Kaiāulu o Hilo me Hāmākua i kāko’o a i mālama ho’i. A ‘o ka Pō’alua nei ka lā mua i mālama ‘ia ai kekahi o ia mau ha’i ‘ōlelo. A he mea maika’i paha ‘oiai, he ‘ekolu mau kānaka ha’i ‘ōlelo, e hō’ike ana i nā ‘ao’ao like ‘ole. Ma ka ‘ao’ao o ke Ke’ena o ka Ho’oponopono Hana ma Mauna Kea, ‘o Stephanie Nagata. Ma ka ‘ao’ao ‘epekema, ‘o Paul Coleman. A ma ka ‘ao’ao ‘ike a hana Hawai’i ‘o Lanakila Mangauil. E hui kala mai i ko ‘oukou mea kākau, ‘akahi nō a ‘ike ‘ia kēia, a no laila, ua lawa wale nō ka manawa e nānā ai i kahi hapa o ka ha’i ‘ōlelo a Lanakila Mangauil, a he keu aku ia a ka maika’i. Ua ahuwale kona akamai a na’auao. Inā ‘a’ole ‘oukou i naue aku i nā ha’i ‘ōlelo o ka Pō’alua nei, a ‘a’ole paha hiki iā ‘oukou ke hele aku i nā ha’i ‘ōlelo, e hele aku ma ka pūnaewele ma ke kahua www.bigislandvideonews.com/tag/common-ground-tmt-series/.

I kēia Pō’akolu, ka lā 27, e mālama ‘ia ana nā ha’i ‘ōlelo i ke Kikowaena Kaiāulu o Kula’imano ma Pepe’ekeo. He ‘ekolu mau ha’i ‘ōlelo, ‘o Paul Neves, ‘o Sandra Dawson a me Peter Adler.

I ka lā 2 o Iune, i ka Hale ‘Aina o ke Kula Hō’āmana o Laupāhoehoe. He ‘ekolu mau ha’i ‘ōlelo hou, ‘o Hualalai Keohuloa, ‘o Wallace Ishibashi a me Paul Brewbaker. A i ka lā 9 o Iune, ma kahi like, he ‘ehā mau ha’i ‘ōlelo hou, ‘o Richard Ha, ‘o Art Kimura, ‘o Jesse Eiben a me Doug Simons. Ho’omaka nā ha’i ‘ōlelo a pau i ka hola 6:30 o ke ahiahi a pau i ka hola 9:00.

Kū Kia’i Mauna. E mālama ‘ia ana kahi ‘aha mele i ka lā 23 o ka mahina ‘o Mei, ‘o Kapu System lāua ‘o D.R.A.S nā hui hīmeni. Ma Hawaiian Brians, O’ahu ana e mālama ‘ia ai. E ho’omaka ana i ka hola 9:00 o ke ahiahi. He ‘elima kālā e komo ai, a he pono ke piha nā makahiki he 18 i ke kanaka a ‘oi aku. ‘O nā pōmaika’i e loa’a mai ana, e lilo ana no ka pono o Mauna Kea.

We Are KAHEA. He ho’oulu kālā kēia a he mea ho’oheno iā Mauna Kea. E mālama ‘ia aku ana i ka lā 4 o ka mahina ‘o Iune, mai ka hola 5:00 o ka ‘auinalā a i ka hola 8:00. ‘O kahi kāki komo, he kālā hā’awi manawale’a wale nō ma ka ‘īpuka, a he $15 ke kāki i ‘upu ‘ia, akā, nāu nō e koho i ka nui. Aia ana ka ho’okani pila ‘ana, ka mele ‘ana, ka mea inu a me ka pūpū. E nānā aku ma HIFINEST.COM no kekahi ‘ike hou aku.

‘Aha Mele Aloha ‘Āina. E mālama ‘ia ana kēia ‘aha mele i ka lā 27 o ka mahine ‘o Iune, he Pō’aono. E hemo ana ka ‘īpuka i ka hola 4:00 o ka ‘auinalā, a e ho’omaka ana ka honehone ‘ana o nā leo mele i ka hola 5:00. ‘O ke kikiki emi loa, he $20, a ‘o ke kikiki pipi’i loa, he $55. He nui ana nā pu’ukani, ‘o Henry Kapono, ‘o Brother Noland, ‘o John Cruz, ‘o Mark Kealii Hoomalu, ‘o Weldon Kekauoha, ‘o Amy Hanaialii, ‘o Hapa, ‘o Fiji, ‘o Maoli, ‘o Mana’o Co., ‘o Paula Funga, ‘o Kaumakaiwa, ‘o Shawn Pimental, a me Sudden Rush. ‘O ka lā mua kēia o ke kū’ai ‘ia ‘ana o nā kikiki.