Synopsis: There will be an island-wide solstice prayer vigil for Mauna Kea on Sunday, June 21.

Welina e nā makamaka heluhelu. Ua hiki hou mai kahi wā e pono ai ke po’o mana’o e kau a’ela i luna, ‘o ia ho’i, “alu ka pule i Hakalau.” Eia mai ka mo’olelo i puka ai nei ‘ōlelo no’eau, ma mua, ma Hakalau, aia kahi kahuna, a he kahuna hana ‘ino aku ia i nā kānaka o kona wahi a me nā wahi ‘ē a’e e pili ana. Ua ho’ā’o pākahi kekahi mau kāhuna e kala aku i ua kahuna ‘ino lā. ‘A’ole na’e i hiki. Ma hope mai, hiki ihola kekahi kahuna i laila, a hō’ike a’ela ‘o ia iā lākou i ka mana’o, e alu like lākou kahuna ma ka pule ‘ana i mea e pau ai ko lākou ‘enemi. A i ko lākou alu like ‘ana, ua lanakila akula. A no laila nō e kau a’ela ia ‘ōlelo no’eau i po’o mana’o i kēia lā.

Ho’i i ka piko. Ke kāhea ‘ia nei kānaka e huliāmahi ma O’ahu nei i kēia Lāpule, ka lā 21 ho’i, no ka pule ‘ana no ka pono o Mauna Kea. ‘O ia Lāpule, ‘o ia nō ho’i ka wā o ke ala polohiwa a Kāne, ka wā ho’i o ka lā e hele ai ma ka palena ma ka ‘ākau, a i kapa ‘ia ‘o ka summer solstice ma ka ‘ōlelo haole. A ‘o ia ihola ka lā i koho ‘ia i lā e alu like ai ka pule i Hakalau.

Eia ka hana o ia lā: E hui ana i ka Pāka Kahakai o Waimānalo i ka hola 4:30 o ke kakahiaka, a e pule ana a e ho’okupu ana i kēlā me kēia hola a i ka hola 12 o ke awakea. ‘O ka pule i ka hola 12, e pule like ana ko Waimānalo, ko ke Kulanui o Hawai’i ma Mānoa a me ko Kūkaniloko. I ka hola 1, e ha’alele ana iā Waimānalo no ke Kulanui o Hawai’i ma Mānoa. Ma ke ahu o Mauna Kea ma laila (ma ke kihi o nā alanui ‘o Dole me University), e pule ana me ka ho’okupu ‘ana. I ka hola 4, e ha’alele ana iā Mānoa a me Kūkaniloko no Pōka’ī. A ma hope o ka pule ‘ana ma laila, e mālama ‘ia ana ma Kū’īlioloa, kahi ‘aha i ka napo’o ‘ana o ka lā. E komo paha i ka lole ‘ula’ula a ‘ele’ele paha. A noi ‘ia ka po’e hula, e lawe i ka pahu, ke kilu a i ka ipu paha. A ‘o ke kanaka hula ‘ole, e lawe paha i ka pū a me ka pū ‘ohe paha. A ‘o nā mea a pau, e hana ‘ia me ke kapu aloha. No kahi ‘ike hou, e hele aku i www.hifinest.com.

‘Aha Mele Aloha ‘Āina. Aia nō kēia ‘aha mele i kēia Pō’aono a’e, ka lā 27 ho’i o ka mahina ‘o Iune. E nui ana nā pu’ukani kaulana o ka ‘āina, ‘o ia ho’i ‘o Henry Kapono, ‘o Brother Noland, ‘o John Cruz, ‘o Mark Kealii Hoomalu, ‘o Weldon Kekauoha, ‘o Amy Hanaialii, ‘o Hapa, ‘o Fiji, ‘o Maoli, ‘o Mana’o Company, ‘o Paula Funga, ‘o Kaumakaiwa, ‘o Shawn Pimental, a me Sudden Rush. E ho’omaka ana ka honehone ‘ana o nā leo mele i ka hola 5:00. ‘O ke kikiki emi loa, he $20, a ‘o ke kikiki pipi’i loa, he $55. ‘O nā pōmaika’i e loa’a ana, e lilo ana no ka pono o Mauna Kea a me nā wahi la’a ‘ē a’e.

———

Ka Ho’okūkū Mele A Mo’olelo. Mai nō a poina i ka Ho’okūkū Mele A Mo’olelo. E hiki koke mai ana ka lā kau palena, ‘o ia ho’i ka Lā Ho’iho’i Ea, ka lā 31 ho’i o Iulai. No laila, e ho’oka’awale paha i manawa e haku ai i mele no kou mea aloha, a e kākau ai paha i mo’olelo a e waiho aku ma www.hawaiianliterature.com. Aia i laila ka palapala e ho’opihapiha ai. A he wahi makana nō e lilo ana i ka lanakila o ka māhele haku mele a me ka māhele kākau mo’olelo, he $500.

———

This column is coordinated by Kawaihuelani Center for Hawaiian Language at the University of Hawai’i at Mānoa.