Synopsis: Is state Rep. Tom Brower telling the full story? Does he really want to work with the people living on the sidewalk near the Children’s Discovery Center in Kaka’ako to find solutions?

Ua lilo hou ka Lunamaka’āinana Tom Brower i mea kama’ilio nui ‘ia i ka pule i hala iho nei. I ka Pō’akahi nei, ua pāluku aku nei kekahi mau ‘ōpio i ua luna maka’āinana lā a wahi āna, ‘a’ole ‘o ia i ho’oukiuki iki i ia mau ‘ōpio, a pāluku wale aku iā ia. ‘O ka Tom Brower kēia nāna i hahau wale aku i ke ka’a pahu a ke kanaka kuewa i ka hāmale ku’i hao i ka makahiki 2013. Ua ‘ōlelo ‘o Brower, inā he mau mea ko ke ka’a pahu, unuhi ‘ia a’ela nā mea a pau me ka ‘olu’olu a waiho akula ma kahi kokoke i loa’a ai ia ka’a pahu, a laila, hahau wale ‘ia akula. ‘Eā, ‘a’ole ‘o ia i noi ‘ia e ka māka’i e hana pēlā, ua hana wale aku ‘o ia e like me kona makemake.

Pehea, ‘a’ole paha ‘o ia i ho’oukiuki iki i ia mau ‘ōpio? ‘O ka Tom Brower kēia nāna i hele aku i ke kanaka e hiamoe ana ma kahi kau ka’a ‘ōhua a ha’i akula iā ia, “Get your ass moving.” ‘A’ole ‘o ia i ‘ōlelo me ka ‘olu’olu, “E ia nei, e ala mai, ua pāpā ‘ia, ‘a’ole e hiamoe ma kahi kau ka’a ‘ōhua.” ‘A’ole ‘o ia i ‘ōlelo pēlā. “E hele aku pēlā” (Get your ass moving), ‘o ia kāna ‘ōlelo.

A i kēia manawa, ua kūpa’a ‘o Brower, ‘a’ole ‘o ia i ho’oukiuki iki i ia mau ‘ōpio. ‘A’ole paha e piliwi ‘ia. Ma ka Hōkū Avalataisa o ka lā 2 iho nei o kēia mahina nei, ua ‘ōlelo ho’opa’a ihola ‘o Brower, e ho’omau ‘o ia i ke kama’ilio ‘ana me ka po’e kuewa e noho ana ma kahi o ke Kikowaena Kamali’i, kahi ho’i i pāluku ‘ia ai ‘o ia. A wahi a Brower, inā e mau ana ka noho ‘ana o nā kānaka ma laila, he mana’o kona e hālāwai me ia mau kānaka no ka hana e pono ai. Ke lana nei ka mana’o, he ‘oia’i’o ia ‘ōlelo a Brower no kāna hana like ‘ana me ia mau kānaka. ‘O ka mea ‘āpiki, ‘a’ole pēlā kāna hana mai kinohi. He hana kūpono ‘ole kāna ma mua, ‘a’ole i kū iki i kona kūlana lunamaka’āinana. He hahau kāna i ke ka’a pahu a ke kanaka kuewa, he ha’i aku i ke kanaka hiamoe, “E hele aku pēlā,” a i ka Pō’akahi nei, he pa’i ki’i wale aku kāna i kahi o ia mau kānaka kuewa e noho ana. I ua lā nei, ua hiki nō iā Brower ke hele aku a kama’ilio i nā kānaka e noho ana ma laila. ‘A’ole na’e ‘o ia i hana pēlā. Akā, inā he makemake ‘i’o nō kona e hana no ka pono o ia mau kānaka, a laila, he kūpono nō ia po’o mana’o e kau a’ela i luna, ‘o ka hāuli o ka mea hewa ‘ole, he nalowale koke. Ma ka hana ka ‘ike, e ka Lunamaka’āinana Brower.

Ka Ho’okūkū Mele A Mo’olelo. ‘Auhea ‘oukou, e nā kānaka haku mele a kākau mo’olelo paha, mai nō a poina i ka Ho’okūkū Mele A Mo’olelo. He iwakālua kūmāwalu wale nō lā i koe, a pau. He pono ke waiho i ke mele a i ka mo’olelo paha i ka Lā Ho’iho’i Ea, ka lā 31 ho’i o Iulai.

No laila, e ho’oka’awale paha i manawa e haku ai i mele no kou mea aloha, a e kākau ai paha i mo’olelo, a e waiho aku ma www.hawaiianliterature.com. Aia i laila ka palapala e ho’opihapiha ai. A he wahi makana nō e lilo ana i ka lanakila o ka māhele haku mele a me ka māhele kākau mo’olelo, he $500.

This column is coordinated by Kawaihuelani Center for Hawaiian Language at the University of Hawai’i at Mānoa.