E alu like mai paha kākou

Synopsis: Perhaps the Legislature of Hawai’i needs help in finding appropriate solutions for the houseless population on O’ahu. Their current actions might not be sufficient.

Welina e nā makamaka heluhelu o Kauakūkalahale. I ka Pō’ahā nei, ua ‘āpono ‘ia aku nei kekahi mau pila hou ‘elua e kahi kōmike o ka ‘Aha Kūkā o Honolulu nei no ka holo ‘ana i mua. ‘O ka mua, ‘o ka Pila 44, e ho’onui ana i nā wahi e pāpā ‘ia ai, ‘elua wahi hou, ‘a’ole e noho ‘ia a e moe ‘ia paha ka pīpā alanui o ia mau wahi. ‘O ka lua o ka pila, ‘o ka Pila 46, e pāpā ana ‘a’ole e ho’omoana, ‘a’ole e hiamoe, a ‘a’ole ho’i e kūkulu ‘ia aku ka hale pe’a a me nā hana ‘ē a’e e pili ana ma ke kapa o nā kahawai a puni ‘o O’ahu nei.

Kohu mea lā, ‘a’ole e ‘ike ‘ia nei ka hopena o ia ‘ano kānāwai e nā luna ‘aha kūkā a i ‘ole ia, he ka’a kaua ia ma ka pā’ani kōnane. a e kali ana nā luna ‘aha kūkā, ‘o ka ‘ike aku i kahi e lele aku ai kona hoa paio. A oki loa aku ka mana’o o kekahi luna ‘aha kūkā, ‘o ia ho’i, e hāpai hou ‘ia kahi pila e pāpā ana, ‘a’ole e noho a e moe paha ma nā pīpā alanui a pau o O’ahu nei.

E aho paha e noi aku i nā kānaka na’auao o O’ahu nei, mai ke nui a ka li’ili’i, i ka no’ono’o ‘ana i mea e pono ai ka po’e hale ‘ole. A loa’a ia mau ha’ina, ‘o ia ka wā e waele aku ai a loa’a ka mea kūpono.

Ua hau’oli ko ‘oukou mea kākau i ka lohe ‘ana no kahi wahi palekana e hemo ana, kahi e hiki ai ke noho ka po’e hale ‘ole e noho akula ma Kaka’ako, akā, ‘a’ole paha e lawa. No laila, inā e alu like nā luna kau kānāwai a me nā kānaka akamai a pau o O’ahu nei, a o kēia pae ‘āina holo’oko’a paha, e loa’a auane’i paha ka mea e pono ai kākou. I kekahi manawa, ‘o kekahi ‘ano pilikia, he mea wāwahi pūniu nō ia, a no laila, he pono ke alu like ‘ana e kō ai kahi ‘ōlelo a kahiko, ‘o ia ho’i, ‘a’ohe hana nui ke alu ‘ia. A mai nō a poina e nā luna kau kānāwai i ke aloha kanaka.

Ka Ho’okūkū Mele A Mo’olelo. ‘Auhea ‘oukou, e nā makamaka heluhelu, e hiki koke mai ana kahi lā kau palena e waiho ai i mele a i mo’olelo paha no ka Ho’okūkū Mele A Mo’olelo. He ho’okahi wale nō pule koe a hiki mai. ‘O ka lā 31 ho’i ia o ka mahina nei ‘o Iulai, ka Lā Ho’iho’i Ea. E hō’ike mai i ko ‘oukou akamai ma ka haku mele a me kākau mo’olelo paha, a e lilo nō ho’i ia i mea e nanea ai ka lehulehu ma ka ho’olohe a me ka heluhelu paha. E lawa paha ka ‘ike, he mea ia e luana ai nā kānaka like ‘ole, akā, inā e koho ‘ia ‘o kāu mea ka ‘oi ma kona māhele pono’ī, e lilo aku kahi kenikeni i loko o kou pākeke. ‘O ka makana nō e lilo ana i ka lanakila o ka māhele haku mele a me ka māhele kākau mo’olelo, he $500. No laila, e waiho aku i kāu mele a i kāu mo’olelo paha ma www.hawaiianliterature.com. Aia i laila ka palapala e ho’opihapiha ai. Mai kali a pau nā niho o hala a’e ka Pu’ulena.

E ho‘ouna ‘ia mai na ā leka iā māua, ‘o ia ho‘i ‘o Laiana Wong a me Kekeha Solis ma ka pahu leka uila ma lalo nei:

>> kwong@hawaii.edu

>> rsolis@hawaii.edu

a i ‘ole ia, ma ke kelepona:

>> 956-2627 (Laiana)

>> 956-2627 (Kekeha)

This column is coordinated by Kawaihuelani Center for Hawaiian Language at the University of Hawai‘i at Mānoa.