Synopsis: Our children have to study in the sweltering heat day after day; however, some adults get to leave work if the air conditioners break down.

Welina e nā makamaka heluhelu. ‘O ia ‘ōlelo e kau a’ela i luna i po’o mana’o, no loko mai ia o kahi ‘ōlelo no’eau mai kahiko mai. A ‘o ua ‘ōlelo no’eau nei, e hō’ike ana i ka hele ‘ana o kekahi kanaka a inaina a huhū loa ho’i, ua pi’i ho’i ke kai o kekahi. (‘O Papa’ena’ena, he wahi ia ma Waimea i Kaua’i.) Akā, ma kēia mo’olelo nūpepa nei, ‘a’ole e pili mai ana ia mana’o i ke kumuhana o kēia lā. ‘O ka mana’o kūlike loa ka mea e ho’opilipili ‘ia aku ana, ‘o ia ho’i, no ia pili pono ‘ana mai o ka lā. A ‘o Lumi Papa ‘ena’ena o nā kula aupuni o Hawai’i nei, ‘o ia ka mea i hele a wela loa i ka pili pono ‘ana mai o ka lā.

‘Eā, he mea minamina loa ka noho ‘ana aku o nā keiki o Hawai’i nei ma ka lumi papa wela a ikiiki ho’i i ko lākou wā e a’o mai ai i nā ha’awina, he ‘eono paha hola o ka lā, he ‘elima lā o ka pule. Aloha nō nā keiki a kākou. ‘O ka wela ma kekahi mau lumi papa, hiki a’e nō a ka 100 kekelē.

Ma Hawai’i nei, he 94 pākeneka o nā kula, ‘a’ohe mīkini hō’olu ea. A ‘o ka mea ‘āpiki, ‘o ka hapa nui o nā kula, he kahiko loa, he kanaono makahiki a ‘oi aku paha, no laila, he pono nō i nā puka aniani hou a me ka ho’omaika’i ‘ana a’e i nā mea uila. A ‘ōlelo ‘ia nō ho’i, ‘o ka pila uila o nā kula aupuni o Hawai’i nei, he $60 miliona a ‘oi o ka makahiki i kēia manawa. A ke loa’a ka mīkini hō’olu ea i nā kula a pau, e pā ‘umi ana paha ia pila uila a ‘oi aku paha.

Ua maopopo iā kākou, he ho’omanawanui ka hana a nā keiki o Hawai’i nei i ke a’o ‘ana ma ka lumi keu a ka wela ma nā makahiki i ka’a hope aku nei. ‘O ka mea i pū’iwa ai ka no’ono’o, ‘o ia ka hana a kekahi mau limahana o ke kūlanakauhale i ka wā i poloke ai ka mīkini hō’olu ea o ko lākou mau ke’ena, ‘o ia ho’i, ua ho’oku’u ‘ia aku ua mau lima hana lā i ‘ole paha lākou e ma’ule ma muli o ka wela. He pono i nā keiki ke ho’omanawanui i kēlā me kēia makahiki kula, eia na’e, ‘o ke kanaka makua, ‘a’ole hiki ke ho’omanawanui i ka wela, he ho’okahi wale nō lā. Pehea lā e pono ai?

E ho‘ouna ‘ia mai na ā leka iā māua, ‘o ia ho‘i ‘o Laiana Wong a me Kekeha Solis ma ka pahu leka uila ma lalo nei:

>> kwong@hawaii.edu
>> rsolis@hawaii.edu

a i ‘ole ia, ma ke kelepona:

>> 956-2627 (Laiana)
>> 956-2627 (Kekeha)

This column is coordinated by Kawaihuelani Center for Hawaiian Language at the University of Hawai‘i at Mānoa.