Ho’okahi wale nō ala no nā ka’a kau kahi

Synopsis: Instead of having a single carpool lane, there should be a single lane set aside for low-occupancy vehicles. That would encourage people to use the rail.

Aloha mai nō kākou e nā hoa ‘alo like i ka ‘īnea, ‘o ia ho’i, ka po’e e ho’omana-wanui ana i nā ka’a he nui a lehulehu e kolo ana ma ke alaloa i kēlā me kēia kakahiaka, a pēia pū ho’i me nā ahiahi. ‘O ka pa’apū loa o ke ala, he holo pupū ka hana. Aloha nō ka po’e i pōkole ka na’au. ‘A’ohe ala e pakele ai.

‘O ua pilikia nei i hō’ike ‘ia a’ela, ua ‘ike ‘ia kona ho’olawehala ‘ana i loko o nā makahiki he nui i ka’ahope aku nei. ‘O ia nō ke kumu i ho’okumu ‘ia ai kēia mea ‘o ke alahao kau i ka lewa. Ke mana’o ‘ia nei ‘o ia ana ka mea e emi ai ka nui o nā ka’a a hemo ai ho’i ke paniwai e pa’a nei nā mea kalaiwa o kēlā lā kēia lā. No kēia wā na’e, a no nā makahiki mai ka wā i ho’omaka ‘ia ai ka hana, ua māhuahua mai ka nui o nā ka’a a ‘o ia mau holo pupū nō.

‘A’ohe wahi pono a loa’a mai. Mali’a o kahe hou mai nā ka’a ke pa’a ke alahao kau lewa a holo pinepine nā ka’auila mai lalo mai o ‘Ewa. Koe aku ia.

Nui ka poe ho’omaloka e kānālua nei i ka waiwai o kēia ala hou, a nui ho’i nā ‘īnea a lākou e ‘ike nei i kēia wā o ua ala nei o ke kūkulu ‘ia ‘ana. ‘O ka heluna o ke kālā a kākou e uku nei, kohu mea lā, ‘a’ohe wā e pau ai kona pi’i ‘ana. Eia hou, he makehewa ia no nā hoa maka’āinana e noho nei ma nā ‘ao’ao Ko’olau a Maunalua paha. Ke uku nei e uku ai. ‘O ke kumu nui e kū’ē nei ua po’e ho’omaloka nei, penei ho’i, ke pa’a mai ke alahao i ke kūkulu ‘ia a ho’omaka mai nā ka’auila i ka holo aku holo mai i kēlā me kēia lā, ‘a’ole e emi nā ka’a o ke alaloa, a no ka mea, ua ma’a loa ka po’e o O’ahu nei i ka holo lanakila ‘ana ma ‘ō a ma ‘ane’i ma luna o ko lākou ka’a pono’ī, a he kāka’ikahi wale nō ka po’e e waiho wale ana i ko lākou ka’a i ka hale ka’a.

No laila, pehea e pono ai? ‘O ka nui o nā kālā i lilo ‘ē i kēia papahana, ‘a’ole paha e hiki ke kāpae ‘ia i kēia manawa. Eia mai na’e kahi mana’o. ‘Oiai ua ma’a ka po’e nāna e kalaiwa i ke alaloa i ka ho’oka’awale ‘ia o ho’okahi ala no nā ka’a e kau ‘ia ana e nā kānaka he ‘elua a ‘oi, ‘a’ole paha e pilikia ka ho’onui ‘ana i nā ala no nā ka’a halihali nui i nā ‘ōhua. Hiki ke waiho ‘ia ho’okahi ala no ka po’e kau ho’okahi ma luna o ko lākou ka’a pono’ī. He wā nō e uē ai ka maka a ‘uī’uī ai ka niho, ‘a’ole nō na’e a he wā, ‘ikea ka waiwai o ke kau ‘ana ma luna o ke alahao kau lewa. Na kēlā me kēia ‘ohana e ho’olālā i nā wahi a lākou e hele ai i kekahi lā, a ‘o ia ihola nō ka mea e pono ai.

Inā pēlā mai ka hana, e hapa mai ana nō ka nui o nā ka’a. ‘O ka po’e o Ko’olau mā me Maunalua, ke kalaiwa lākou, ua hapa mai ka nui o nā ka’a ma nā alanui o ke kūlanakauhale. ‘O ia ka pōmaika’i e ili mai ana i luna o lākou no kā lākou uku ‘ana i ka ‘auhau e ho’olako ai i nā waihona kālā e ho’ohana ‘ia nei no ke kūkulu alahao.

E ho‘ouna ‘ia mai na ā leka iā māua, ‘o ia ho‘i ‘o Laiana Wong a me Kekeha Solis ma ka pahu leka uila ma lalo nei:

>> kwong@hawaii.edu

>> rsolis@hawaii.edu

a i ‘ole ia, ma ke kelepona:

>> 956-2627 (Laiana)

>> 956-2627 (Kekeha)

This column is coordinated by Kawaihuelani Center for Hawaiian Language at the University of Hawai‘i at Mānoa.