Synopsis: One of our strong and beloved leaders, Leinaala Kalama Heine, has passed away.
Welina e nā makamaka heluhelu o Kauakūkalahale, he wahi mo’olelo kēia no ka ho’ohenoheno ‘ana i kekahi o ko kākou Hawai’i Alaka’i i hala aku nei i ke ao polohiwa a Kāne. A ‘o ia Hawai’i Alaka’i, ‘o ia nō ‘o Rebecca Leinaala Kalama Heine. Ua kāka’ikahi ka launa ‘ana aku o ko ‘oukou mea kākau me ‘Anakē Leinaala, a ‘a’ole i kama’āina loa. Akā, he mana’o nō e hā’awi aloha, ‘oiai, he keu aku ‘o ia a ka ‘olu’olu.
Ma ka Pūnana Leo o Honolulu i launa mua ai ko ‘oukou mea kākau me ‘Anakē Leinaala, a na Lilinoe Wong nō ka ho’olauna ‘ana. (E hui hou ana lāua i kēlā ‘ao’ao.) E hele ana ka mo’opuna a ‘Anakē i ia Pūnana Leo. ‘O Ke’ala paha ka inoa o ua mo’opuna nei. (E kala mai e ka mo’opuna, inā ua kuhihewa au.) I ia manawa, ‘a’ole i lohe iki ko ‘oukou mea kākau no ‘Anakē Leinaala. Akā, ma muli o ka ho’omau ‘ana i ke a’o ‘ana mai i ka ‘ōlelo Hawai’i, ua ‘ike ihola, he ki’i maka nunui nō ‘o ia ala. He kumu hula kaulana i aloha nui ‘ia e nā kānaka a puni kēia pae ‘āina. A he wahine pu’uwai hāmama. Ua like ke ‘ano o ‘Anakē Leinaala me kekahi ‘anakē o ko ‘oukou mea kākau, ‘o ia ho’i, he ‘o’ole’a paha, akā, he wahine ia nāna ‘oe e ho’omalu pono, a palena ‘ole kona lokomaika’i.
Ma muli o ke kāka’ikahi o ko’u launa pū ‘ana me ‘Anakē, ua kuhi ihola, ‘a’ole paha i ho’omana’o mai. A no laila, i kekahi lā ma Maui, ua ‘ike akula ko ‘oukou mea kākau iā ‘Anakē, akā, ‘a’ole i hele aku i ona lā e aloha aku ai iā ia, o ‘ōlelo kekahi po’e he ho’opili mea ‘ai au. A i kona hele ‘ana mai a kokoke, ua ho’opuka maila ‘o ia i ko’u inoa me ke aloha ‘ana mai. A ma ia hope mai, i ko’u ‘ike ‘ana aku iā ia, ua hele aku au i ona lā a aloha akula. He palena ‘ole ka mahalo o ko ‘oukou mea kākau iā ‘Anakē. Me ‘oukou e ka ‘ohana i ha’alele ‘ia ihola i hope nei ko māua luna ho’oponopono aloha.
Aloha ‘Āina Ho’i i ka Piko. E mālama ‘ia ana kēia ma ke Kahua Pā’ani ‘o John Henry Wise, ‘o ia ho’i ‘o ka Pā Mau’u ‘o Bachman ma ke Kulanui o Hawai’i ma Mānoa. Aia i ka lā 22 o Kepakemapa, he Pō’alua. E ho’omaka ana i ka hola 9:00 o ke kakahiaka a e pau ana i ka hola 1:00 o ke awakea. No ka Piko o Wākea kēia hui ‘ana no ka hō’ike ‘ana i ka lōkahi o nā kānaka ma o ka hilo ‘ana i aho ka’ā ‘umi, a ‘o ka lō’ihi o ia aho, he 40 kapua’i. Mai nō a hopohopo, inā ‘a’ole maopopo ka hilo ‘ana i ke aho, e a’o ‘ia ana ia hana ma laila. A i ke kau ‘ana o ka lā i ka lolo, e ho’okupu ‘ia ana ia aho. A ma hope o kēlā, he pū pa’akai ka hana. No laila, e lawe aku i wahi mea ‘ai e pū pa’akai ai. ‘O kekahi mau pono, ‘o ia ka ‘aila pale lā, a me ka ‘ōmole wai. A ‘o ka mea nui loa, ‘o ia nō ke kapu aloha. A he mea nō ho’i kēia e ho’ohiwahiwa ana iā ‘Anakē Leina’ala Kalama Heine i hala iho nei, ‘oiai, ua kūpa’a ‘o ia ma hope o ka ‘āina.
E ho‘ouna ‘ia mai na ā leka iā māua, ‘o ia ho‘i ‘o Laiana Wong a me Kekeha Solis ma ka pahu leka uila ma lalo nei:
>> kwong@hawaii.edu
>> rsolis@hawaii.edu
a i ‘ole ia, ma ke kelepona:
>> 956-2627 (Laiana)
>> 956-2627 (Kekeha)
This column is coordinated by Kawaihuelani Center for Hawaiian Language at the University of Hawai‘i at Mānoa.
