Synopsis: The use of research training and revolving funds (RTRF) by Univer- sity of Hawaii leadership to offset legal costs incurred by delays in construction of the Thirty Meter Telescope ultimately penalizes faculty, none of whom should be culpable for the unwise decisions of those who get paid the big bucks to make them.
Aloha mai nō kākou e nā makamaka heluhelu o Kauakūkalahale. Pehea lā ho’i kākou? No’u iho, ua lawa au i ka lohe pinepine ‘ana e pili ana no nā hana kohu ‘olu a nā luna o ke Kulanui o Hawai’i ma Mānoa. He aha lā ho’i ka palena o ka nui kālā e ho’olilo ‘ia nei no ka ho’oponopono ‘ana i nā pilikia i kupu mai ma muli o ko lākou mau koho hāwāwā pono’ī iho nō? ‘A’ole anei i koho ‘ia a hai ‘ia ho’i kēia po’e no ko lākou akamai i ka ho’okele ‘ana i ka moku, me ka hō’alo aku ho’i i nā pūko’a ‘ai moku o ke kai? Eia a’e kahi pūko’a nunui e kau ana ma ko kākou ala e holo nei, ‘o ia ho’i, ka ‘ohe ho’onui ‘ike, ka pilikua ho’i e kapa ‘ia nei ‘o ka TMT. He ulupā nō paha ka hopena o ko kākou wahi moku? Koe aku ia.
Ua ‘ike ‘ia, he mea ma’amau ka huli kua ‘ia o nā leo o nā maka’āinana. I loko o nā makahiki i hala a’e nei, ua lele kapuahi nā kālā he nui loa ma muli o ka hemahema o nā luna o kā kākou Kulanui aloha. ‘O ka uku ‘ana i kekahi mau luna ‘elua no ka maka’ala ‘ana i ka hana a ka luna ho’olauka’i o ke Cancer Center, ‘o ia ho’i, ‘o Michele Carbone, a me kona ho’olilo wale aku i nā kālā he nui no nā kākī i kānālua ko lākou pono. He aha lā ka waiwai o ka uku ‘ana i kahi luna no ka maka’ala ‘ana i kekahi luna?
‘O ka pi’i ‘ana o ka helu o nā luna o ke Kulanui, ua ho’olaha ‘ia. Na wai na’e ia e ho’oponopono? Na nā luna? Eia nō kahi mea kupanaha. I loko nō o kēia wā wī, ua hā’awi ihola nā luna iā lākou iho i nā kālā he ho’okahi miliona i mea e pi’i ai ka nui o kā lākou uku. He aha lā kēlā ‘ano?
I kēia manawa, ke mana’o nei ia mau luna Kulanui, e kā’ili i kekahi mau kālā he ‘elima pakeneka o ka waihona RTRF. He kālā kēia i ho’oka’awale ‘ia no ka uku ‘ana i nā papahana noi’i e ‘imi ana i hā’ina no nā nīnau wāhi pūniu like ‘ole o ke ao. Akā, wahi a ka leka a Vassilis Syrmos (VP for Research and Innovation) i ho’ouna ai iā Robert Bley-Vroman (Interim Chancellor), e ho’ohana ‘ia he ‘elima pakeneka no ka uku ‘ana i nā pila e māhuahua nei no ka ‘ohe ho’onui ‘ike. A ma loko mai o ia heluna, he nui nā kālā e ho’olilo ‘ia ana no ka uku ‘ana i nā loio a ke Kulanui i hai ai no ke kaupale ‘ana i nā hihia ma nā hale ho’okolokolo, nā hihia ho’i e kāohi nei i ka holomua ma ke kūkulu ‘ana i ka TMT.
A ‘o nā polopeka nāna i ki’i i nā ha’awina kālā no nā ‘ano papahana noi’i like ‘ole o ke kulanui, kahi ho’i i ‘apakau ‘ia ai ka ‘elima pākeneka, ‘a’ole lākou i nīnau ‘ia no ko lākou kāko’o a kāko’o ‘ole paha i ka TMT. Mea ‘ole ho’i ka leo o nā kānaka. ‘Eā, wahi a kahiko, “I ali’i no ke ali’i i ke kānaka.” I hō’ea ke kanaka i ka palena o ka ‘eha, ‘o kona ho’okahuli ‘ana nō paha ia i ke ali’i.
E ho‘ouna ‘ia mai na ā leka iā māua, ‘o ia ho‘i ‘o Laiana Wong a me Kekeha Solis ma ka pahu leka uila ma lalo nei:
>> kwong@hawaii.edu
>> rsolis@hawaii.edu
a i ‘ole ia, ma ke kelepona:
>> 956-2627 (Laiana)
>> 956-2627 (Kekeha)
This column is coordinated by Kawaihuelani Center for Hawaiian Language at the University of Hawai‘i.
