Synopsis: This is a chant of lamentation for Aunty Aggie Kalanihookaha Cope, an icon of Hawaiian education, politics and the arts. She exemplified the term “doer and shaker” in her work to elevate the condition of the Hawaiian people. We will surely miss her.
Auwe! Auwe ka hoi e!
Ua hala aku nei ka lani
Mai ka lani no a ka honua
Pa mai no kahi uila
Ho-o mai no i ka honua nei
O ka lele wale akula no ia
I ke ao polohiwa a Kane
Lele pu me ka ha o ke ola
Ka ha o Ka-lani-hoo-ka-ha
Ka lani hooulu manao
E malamalama ai kanaka
A pii ai ke kulana nohona
Aia no i ka lani ke ao
Naauao ai ka lehulehu
Ue ka hoi ka maka
A luuluu kahi naau
Na wai e ole ke kaumaha
Ua aloha ia e ka lani?
Ke aloha a Kalanihookaha
Auwe! Auwe ke aloha e!
O ke alo minoaka
Ke aka no o ke aloha
He aloha lahui kanaka
Kanaka nui, kanaka iki
He aloha kamalii
Kani moopuna ka hale
He hale anu ko-u wale
Ua hala ka makamaka
Ka maka nana i ka pono
I pono ka nohona kamalii
O kamalii kolohe nae
Kani mai ka hauhau ue
Loaa mai i ka haawina ao
O ka pai mahanahana
He hana aloha na ka lima
Aloha no ia mau la ua hala
Hala pu me Kalanihookaha
Auwe! Auwe ke olakino e!
Ke ola ia a Kalanihookaha
Nana i paipai i ke kahua
He hale lapaau, hale ola no
Ola hoi na kanaka o Kaala
Ala hou mai a polapola
Ola na la kupilikii o ka oiwi
Ka iwi kona one hanau
O ka huakai loa i ke kaona
Aia i ke au o ka manawa
Na wai e ole ka pomaikai
Ka hana maikai a Kalani
He lani no ko luna
He honua hoi ko lalo
Ua aeoia ka nohona
He pokomaikai wale no ia
E pono ai na hoa kanaka
Auwe! Auwe ka noeau e!
He hana noeau ka Kalani
E ole kana paipai i ia loina
Ola ai kamalii i ka naauao
Ua ao Hawaii i ia mau hana
Na loina ia o ka aina
Hapai ia ka leo oli
Hapai pu ia me ka leo mele
Ke mele pu no me ka hula
He mau mea e paipai ai
No ka haaheo o ka lahui
He mau mea e ike ai
No ka welo o na kupuna
Ia puna o ka ike e puai ai
A paa ai ka nohona maoli
Auwe ka hala e o Kalani
Aohe lua e like ai
Auwe! Auwe no ka hoi e!
Ua hala i ke ala hoi ole mai
I ke ao polohiwa a Kane
Aohe lua e like ai me oe
Me ka waiwai o kau hana
Na hana he nui hewahewa
Piha ka hokeo o ka Hawaii
Ma Hawaii no a puni
Ke o nei kou inoa e Anake
He inoa kau mai i ka hano
No ka hoohanohano nui ia
Ma na kaiaulu o Waianae
Ma na holoe o ke kapikala
Ma ke Kulanui no o Hawaii
Papahi ia i ke kekele kauka
Lei ae i ka lei o ka lanakila
Ke lana nei kahi manao
O ka nui o kau mau hana
Pii ke kulana o na Hawaii
O oe ke ku mai i ka hano
Ua ola na iwi ia oe
Ia Kalanihookaha e
This column is coordinated by Kawaihuelani Center for Hawaiian Language at the University of Hawai‘i at Mänoa.
