Synopsis: The military has been relying on volunteers for over 50 years. Recently, however, it has not been able to meet its intended quotas. There is discussion about reinstituting the draft. This will require men from ages 18 to 25 to register for the draft. You might not know this, but if you have a driver’s license, you are already registered.
Aloha nō kahi keiki ‘ike ‘ole i nā kānāwai a ka ho‘okolonaio! Nui hewahewa ia mau kānāwai a ‘a‘ohe wahi maopopo o ka hapanui i ka lehulehu. ‘O ia nō paha ke kumu i kū‘ono‘ono ai ka ‘oihana loio. Na lākou ia e unuhi mai ai i ka ‘ōlelo kānāwai a ahuwale mai kona mana‘o i mua o kākou, ka hū. A na kākou ia e kauka‘i ai ma luna o lākou lā. I kekahi manawa na‘e, he loli nō kekahi mau kānāwai, a ‘o ka mea i pa‘a mua, ua loli maila, a ua pau ho‘i kona pa‘a e like me kona ‘ano ma mua. Ua pōmaika‘i nō na‘e kākou i kēia manawa, no ka mea, aia nō kēia mau ‘ike ua pa‘a nō ma loko o ka pūnaewele, a he kikokiko wale nō na ka manamana lima ka uku e loa‘a mai ai. Pēlā ka‘u hana i ko‘u wā i lohe ai no ko Trump paipai ‘ana i ia mea he kauoha e komo ai nā kāne i loko o ka ‘oihana koa. I noi‘i aku ka hana o‘u i loko o ia kumuhana, ua ‘ō‘ili koke maila nā mo‘olelo no ko ia ala hō‘ole ‘ana i ia hana, ‘a‘ole nō ‘o ia i ‘ōlelo pēlā. Ho‘oikaika ‘ia ihola ke kānalua i loko o ku‘u na‘au no ka ‘oia‘i‘o a me ka ‘ole o ia mea he mo‘olelo haole.
‘Ehia mea aloha o nā keiki kāne i piha iā lākou nā makahiki ma waena o ka 18 a me ka 25. No ke emi mai o ka po‘e e ‘a‘a nei i ke komo aku i loko o ka ‘oihana koa i kēia wā, ke kama‘ilio ‘ia nei ke koikoi ‘ana iā lākou e lawelawe i ia hana ma ke ‘ano he kuleana ma lalo o ke kānāwai. Iā kākou nō e maka‘ala nei, he mana‘o kuhi wale nō ia kānāwai. Ua hoihoi na‘e au i ka mana‘o no ko Trump kāko‘o ‘ana i ia ‘ano kauoha, no ka mea, ua ‘ike ahuwale ‘ia kona pakele ‘ana i ia kauoha i ka wā e hahana ana ke kaua ma Viekanama. Nui ka po‘e i lohe i ka mo‘olelo no ko ia ala pakele ‘ana i ke kauoha komo i ka ‘oihana koa. Nui ho‘i ka po‘e i ho‘ohuoi i ke kumu o ko ia ala ho‘oku‘u ‘ia mai ia kuleana aku. ‘O ka mo‘olelo kaulana, ua loa‘a ‘o ia i nā kākala ‘oi‘oi e ulu ana ma nā iwi o kona mau wāwae. He mea ia e ‘eha loa ai ka wāwae a hiki ‘ole ai iā ia ke komo i loko o ka ‘oihana koa. ‘A‘ole loa‘a ka hō‘ike a ke kauka a he mea ho‘ohuoi wale ‘ia nō ko ia ala inoa, a no laila, nui ka ho‘ohuoi no ka ‘oia‘i‘o o ia mo‘olelo. Me he mea lā, he pilikia ia i haku wale ‘ia i mea e pakele ai kahi Trump i ka hele ‘ana i Viekanama.
‘A‘ole na‘e paha kākou e hihi i loko o ka mo‘olelo o Trump. I Ianulai o ka MH 1973, aia au i loko o ka papa 11 o ke kula ki‘eki‘e. E mau ana ka hahana kaua ma Viekanama a e piha ana ia‘u nā makahiki he 18 i loko wale nō o ho‘okahi makahiki me ka hapa. E kauoha ‘ia mai ana paha au e hele i ke kaua ma Viekanama. Ma ia koke iho na‘e, ua pau ka ‘ohi ‘ia mai o mākou ‘ōpio a me ka ho‘ouna ‘ia aku i ke kaua, a ua mau nō ia palekana ‘ana a hiki i kēia wā a kākou e noho nei. A eia nō ka mea ‘āpiki. Kainō ua pau ia kauoha e kākau inoa ai nā ‘ōpio no ke komo ‘ana i loko o ka ‘oihana kaua, eia kā, ua mau nō. E like me ka‘u i hō‘ike ai ma luna, he kānāwai ia kākau inoa ‘ana, a inā ‘a‘ole e ho‘okō ‘ia, e ho‘opa‘i ‘ia mai ana a e ‘au‘a ‘ia ana kekahi mau pono ma lalo o ke kānāwai, e la‘a me ke ki‘i ‘ana i ka laikini kalaiwa ka‘a. ‘A‘ole i maopopo ia‘u, he mea ‘akomi ma Hawai‘i nei, inā he laikini kalaiwa ka‘a kāu, inā ua ‘ae ‘oe i ke kākau ‘ia o kou inoa no ia hana he ‘ohi kanaka no ka ‘oihana kaua.
E ho‘ouna ‘ia mai na ā leka iā māua, ‘o ia ho‘i ‘o Laiana Wong a me Kekeha Solis ma ka pahu leka uila ma lalo nei:
>> kwong@hawaii.edu
>> rsolis@hawaii.edu
a i ‘ole ia, ma ke kelepona:
>> 808-956-2627 (Laiana)
>> 808-956-2627 (Kekeha)
This column is coordinated by Kawaihuelani Center for Hawaiian Language at the University of Hawai‘i at Mānoa.
