Synopsis: There are many popular hairstyles for men with quaint foreign names. In order to speak of them in Hawaiian, I have suggested some Hawaiian alternatives.

Aloha mai kākou. He kumuhana ‘ano ‘oko‘a e kama‘ilio ai i kēia pule. ‘O ka ‘ako lauoho ho‘i. I kēia mau lā e pi‘i nei ka wela o ka honua, ke pi‘i pū nei me ko‘u ‘i‘ini e ‘ako i ku‘u lauoho. Ua hele a loloa! Inā nō e ‘au‘a iki ka Moa‘e i ka halihali mai i kona mau aheahe makani hō‘olu‘olu, he ikiiki nō a lohe mai ke a‘o! ‘O ka po‘e e waiho nei i ka lauoho a ulu ka huelo, ‘a‘ohe wahi ‘olu‘olu iki i laila. He kohu kapa ho‘i ka hoa like, e ho‘omahana ana i ke po‘o a kahe wale ka hou. Aia wale nō ka ‘olu‘olu a ‘ako ‘ia mai. Wahi a ka lohe, he ‘ano Hawai‘i kahiko ka waiho ‘ana o nā kāne a loloa ke oho, a ‘o nā wāhine na‘e, ‘o ia kai ‘ako a pōkole. He ‘oki pohe paha ko lākou kaila i ia au. I ka hō‘ea mai na‘e o ka haole, hō‘ea pū mai me ke kaila ‘oko‘a, ‘o ia ho‘i, he lauoho loloa ko ka wahine. ‘A‘ole na‘e paha e hihi. Na ka wahine nō paha ia e kama‘ilio no ka lauoho wahine. No nā kāne na‘e, i ka hala ‘ana o nā makahiki, hapa maila ka loloa, a i kahi manawa, he ‘oki pohe nō.

I ka mana‘o Hawai‘i, he mana ko ka lauoho. Ke loa‘a ke oho i kekahi kanaka, e lilo paha ia i maunu no ka mea ‘ino e hana ‘ino mai. E aho kona hūnā ‘ia o loa‘a auanei i ke ka‘aka hana ‘ino. Eia aku a eia mai, he ‘oki ‘ia nō. Aia ka pono ‘o ka hūnā maika‘i. He ‘oki ‘ia nō i ka wā e kūmākena ai. He ‘oki mahiole, he ‘oki po‘o ‘ō‘ū, he po‘o kīkepa, a he pa‘ipa‘i‘iole paha, wahi a Pukui mā. ‘O ka ‘oki mahiole, ‘o ia ka mea e kapa ‘ia nei i ka Mohawk i kēia mau lā. ‘O ke po‘o ‘ō‘ū, ‘o ka ‘oki pau ia i ka lauoho o hope o ke po‘o me ka waiho mai i nā oho o mua. ‘O ke po‘o kīkepa, he ‘oki pau ia i ka lauoho o kekahi ‘ao‘ao me ka waiho ‘ia o ka lauoho o kekahi ‘ao‘ao. A ‘o ka pa‘ipa‘i‘iole, ‘o ia nō ka ‘oki kapakahi ‘ana. Ua ‘ano ‘ōkumukumu paha kekahi wahi me nā ‘ao‘ao e ‘oi‘oi ana i luna. Ua lohe au i ka ‘ōlelo pā‘iole ma mua, a ua kuhi au he ‘ano pao wale ‘ia o kekahi mahele o ka lauoho, kohu mea lā ua nalinali ‘ia e ka ‘iole. Kainō, ‘o ia ka mea i kapa ‘ia he “rat bite” ma ka ‘ōlelo pa‘i‘ai. I ko‘u wā kamali‘i, pēlā i ho‘ohenehene ‘ia ai nā keiki i hele ‘ole i ka hale ‘ako lauoho, a ua ‘ako hemahema ‘ia na‘e ma ka hale.

Nui hewahewa nā kaila lauoho o nā kāne, a ‘oki loa paha ka nui o nā kaila wahine. I ko‘u wā o ka hele kula ‘ana, nui ko‘u mau hoa i ‘oki ‘ia ko lākou lauoho ma ke ‘ano he chowon. Kohu mea lā, ua kau maila kahi pola ma luna o ke po‘o a ‘ako wale ‘ia nā oho e lewalewa ana i lalo. I nānā aku ka hana, eia kā, he hua Kōlea ‘o chowon nona ka mana‘o ‘o kula mau‘u. Auē! Kuhi akula au he pola ia no ka laiki! Maika‘i nō paha kona kapa ‘ia i ka “māmalu.” ‘O kekahi kaila, he punahele na ka po‘e Pā‘ele, ua kapa ‘ia he “cornrow.” No‘u iho, ‘a‘ole launa ka lālani kūlina me ka mana‘o Hawai‘i, no laila, ua mana‘o au iā “pāoho,” e like me ka pāiwi a Kalapana i ‘ike ai ma Kaua‘i. ‘O kekahi ‘ano, ‘o ia ka “dreadlocks.” I loko nō o kona ‘ano ‘āpi‘ipi‘i a lepo paha ke nānā aku, ua ma‘ema‘e nō. ‘O kona wiliwili mau ‘ia e ka lima milimili, hele a weuweu ke nānā aku. Maika‘i paha ka hua ‘ōlelo “oho wiliweu.”

He mau mea hou aku, eia na‘e, ‘a‘ole au e lu‘u aku i loko o ia kai. E hāpai ‘ia na‘e kahi kaila i kaulana ma ka inoa “mullet.” Wahi a ka haole, he “business up front, party in the back.” ‘A‘ole nō i maopopo le‘a ke kumu i kapa ‘ia ai i ka “mullet,” eia na‘e, ua mana‘o au e ho‘ohana i ka inoa i‘a Hawai‘i ‘o “‘anae,” no ka mea, ‘o ia ke ‘ano mullet nona ke kino nui loa, a ke ho‘opilipili aku nei au i ia hua haole ma ke kapa aku i ia kaila lauoho i ka “lae‘anae.”

———

E ho‘ouna ‘ia mai na ā leka iā māua, ‘o ia ho‘i ‘o Laiana Wong a me Kekeha Solis ma ka pahu leka uila ma lalo nei:

>> kwong@hawaii.edu

>> rsolis@hawaii.edu

a i ‘ole ia, ma ke kelepona:

>> 808-956-2627 (Laiana)

>> 808-956-2627 (Kekeha)

This column is coordinated by Kawaihuelani Center for Hawaiian Language at the University of Hawai‘i at Mānoa.