Synopsis: Good news for Gaza: Israel and Hamas have agreed to a ceasefire. If this holds up, infrastructure and lives will need to be rebuilt. It is important that politics don’t get in the way.

Aloha mai kākou a aloha ho‘i ko kākou mau hoa kanaka o ke ao. I kēlā makahiki aku nei a i ia makahiki aku, i ‘Okakopa ho‘i, ua lele kūhonua kauwahi hui Palesetine me ka ho‘ouka kaua ‘ana i ka po‘e o Iseraela. ‘O ka hui kaulana loa o lākou, ‘o ia nō ‘o Hamas. Ma ia hope koke iho, ho‘ouka pāna‘i akula ‘o Iseraela, a ma ia hope mai, ua hahana ke kaua ‘ana ma Gaza. Nui hewahewa ka po‘e i pepehi ‘ia, a ‘o ka hapanui, he maka‘āinana Palesetine i pili ‘ole i ka ‘oihana koa. ‘O ka pinepine o ka ho‘olaha ‘ia o ka nūhou no ia kaua weliweli i nā lā a pau, he kāka‘ikahi wale nō paha ka po‘e i ‘ike ‘ole ē he hihia ko laila. A ‘o kekahi mea e kaulana nei, ‘o ia ka po‘e Iseraela i lawe pio ‘ia e Hamas mā. Eia nō kekahi ke ho‘omanawanui nei i ka ‘ino o ka noho pio ‘ana, a ‘o kekahi ho‘i, ua hala ‘ē aku i ke ala ho‘i ‘ole mai. Eia nō ho‘i kauwahi po‘e Palesetine ke pa‘a nei i loko o nā hale pa‘ahao o Iseraela.

I kēia lā nō i puka mai ai ka nūhou no ka ho‘omalolo kaua ‘ana ma Gaza. I nūhou maika‘i loa nō ia no ko ke ao nei, no ka mea, e pau ana ka make pohō ‘ana o ia mau kānaka he nui hewahewa a e ho‘iho‘i ‘ia nā pio i ko lākou mau ‘āina pono‘ī. Ua pi‘i a‘e nei ka heluna o ka po‘e make i ke 46,000 a ‘oi, a wahi a kekahi hō‘ike ma ka nūhou, ua hiki aku i ke 60,000! ‘Eā, e nā makamaka, ma loko o ia heluna, he nui ka po‘e maka‘āinana i komo ‘ole i ka hakakā ‘ana, a i kēlā lele kūhonua mua ‘ana paha. Eia hou ho‘i, he nui wale ka po‘e kamali‘i i make, a i aha ai ho‘i? Na wai e ‘ole ka menemene? ‘O ka ‘oia‘i‘o, no ka lō‘ihi o ia kaua ‘ana, ke kama‘āina ‘ole i ia po‘e e ho‘omanawanui nei i ka noho ‘īnea, ke kupu ‘ana mai o nā hihia hou a‘e he nui a puni ke ao, a pau pū ho‘i me ke kupu ‘ana mai o ko kākou mau pilikia pono‘ī, hapa mai ka uluhua a nalohia ka menemene! Aloha nō!

E o‘u mau makamaka, ‘a‘ole ka‘u he ho‘ohalahala iā kākou. ‘O ke ‘ano ia o kānaka. Ke komo mai na‘e ka politika i loko o ia ‘ano nīnau, hele a pupuka loa. ‘O ia nō ka‘u i ‘ike ai ma luna o ke kīwī, kahi e hō‘ike ‘ia ana ka ho‘olaha a ka Pelekikena Biden no ka ho‘omalolo kaua ‘ana ma Gaza. E hō‘ike ana ‘o ia ala no kāna hana e paipai ana i nā ‘ao‘ao ‘elua e ho‘ōki i ia hana. ‘Oiai ‘o ka pau ‘ana kēia o kona wā ma loko o ia kūlana, na kekahi pelekikena aku ia e ho‘okō ai i ia hana, ‘o ia ho‘i, na Trump. ‘A‘ole nō a he wā, pane maila ‘o ia ala ma o ke kūlelepaho, me ke kaena ho‘i no kāna hana ma ia ‘aelike. ‘O ka ‘oia‘i‘o, ‘a‘ole nō i kō ia ‘aelike. Koe aku ka pūlima ‘ana o nā ‘ao‘ao ‘elua. A mai poina, he pūlima wale nō ia. Inā e loli ka mana‘o, e hahana hou mai ana ke kaua. Koe aku ia.

Eia nō au ke kākau nei ma mua o ko Biden ha‘i‘ōlelo hope ma mua o ka ha‘alele ‘ana i kona kūlana. ‘A‘ole hiki ia‘u ke ‘ike i ka mea e hiki mai ana. Ua ‘ike ‘ia na‘e ke ‘ano politika o kēia paipai ‘ana i ka ‘aelike. ‘O ia ho‘i, he mea nui i ia mau ka‘aka lā a ‘elua ka ili ‘ana mai o ka hanohano ma luna o lāua. Me he mea lā, ua hapa mai ke ko‘iko‘i o ia mea he mālama maluhia i mua o ka hanohano. Mai kuhihewa, e ka makamaka, ‘a‘ole au e ho‘oha‘aha‘a nei i ia mea he kūlana maluhia ma Gaza. ‘O ka ho‘omaka wale nō na‘e ia o ka polapola ‘ana o ko laila pono. Eia ke koe nei ke kūkulu hou ‘ana i nā hale, nā alanui, nā paipu wai, ka ‘ōnaehana uila, a ia mea aku ia mea aku. Ke ho‘ohalahala nei na‘e au i ke ‘ano ‘ālunu o ia mea he politika. ‘O ia ke kumu i ho‘ouka ‘ia ai ia kaua!