Synopsis: Celebrating Hawaiian Independence Day, Makawalu presents Lā Kū’oko’a Aloha ‘Āina Concert on Nov. 28 at 4:30 p.m.
———
Welina e nā makamaka heluhelu, nā kānaka kū ho’i i ka pono. E hiki koke mai ana ka Lā Kū’oko’a o Hawai’i, ‘o ia ho’i, ka lā 28 o Nowemapa. Ma mua o ka hō’ike ‘ana no kahi ‘ahamele e ho’oheno ai i ia lā kulāia o kākou, e hō’ike ‘ia ana kekahi māhele o ka ha’i ‘ōlelo a Jas. K. Kaulia ma ka Lā Kū’oko’a Hawai’i o ka makahiki 1896. A penei ia:
“Ma ka la 19 o Dekemaba, M. H. 1842, ua kipa aku la na elele Hawaii me na poo Aupuni kiekie o ke Aupuni Amerika, a ua aeia mai ke kuokoa ana o Hawaii nei, a o ke koena aku o na hana i koe a na elele, ua hala loa aku laua no Beritania Nui. Ua kipa aku na Elele Hawaii ma Ladana, ke kulanakauhale poo Aupuni o Beritania,ua apoia mai na elele me na hookipa kiekie a ke Aupuni o Beritania Nui, ua apoia mai la ia e ka Moiwahine o Beritania Nui me na hoohiwahiwa he nui i paholaia mai.
“A ma ka la 12 o Aperila, M. H. 1843, ua noho ka aha uwao o Beritania Nui, a me Farani a me na Elele Hawaii. A ua aeia ke kuokoa ana o na Paeaina o Hawaii. A i ka holopono ana o na hana a na elele, a ma ko laua ala huli hoi i ka aina, ua make iho la ka Elele Alii Timoteo Haalilio ma ka la 3 o Dekemaba, M. H. 1843. He kauwa hoolohe me ka hoomanawanui no ka Moi Kauikeaouli, ua kuu ka uhi iloko o ka hauoli, no ka pono o ka aina, ka hana hoi e hiki ole ai ke hoopoinaia, no ka nui o kona aloha i kona Alii, ka aina, a me ka lahui,
“A ma ke kulanakauhale poo Aupuni o Ladana ma ka la 28 o Novemaba, M. H. 1843, ua kakauinoaia iho la ke Kuikahi Kuokoa o Hawaii nei, a e heluheluia penei:”
Na Olelo o ke Kuikahi.
“O ka Moi, ke Aliiwahine o ke Aupuni Hui o Beritania Nui a me Irelani, a me ka Moi o ka poe Farani, ma ka noonoo ana a me ka lawe ana mai i ke kulana o na Mokupuni Sandwich Ailana, he Aupuni kona he hiki ke hoomaopopo no ka hooko pololei ana i kona mau launa ana me ko na Aupuni e, ke manao like nei he mea pono ka hui lokahi ma ka hoike ana he Aupuni Kuokoa ka Paeaina o Hawaii, aole e lawe a lilo ia laua, aole hoi ma ke kaili pololei ana, a i ole, ma ke ano hoomalu, aole hoi ma kekahi ano e ae i ke kau wahi lihi o ua wahi la.”
He nani nō ka heluhelu ‘ana i nā ‘ōlelo a nā kūpuna o kākou no ka pono o ka Lāhui Hawai’i. A i kēia manawa, e nānā käkou i ka hana a nä mamo i kēia mau lā.
E mālama ‘ia ana ka ‘aha mele ma kēia Pō’akolu, ka lā 28 ho’i o Nowemapa. Aia ana ma ka Pā Mau’u ‘o Bachman i ke Kulanui o Hawai’i ma Mānoa. Na ka hui haumäna ‘o Makawalu e mälama ana. E ho’omaka ana i ka hola 4:30 o ka ‘auinalā. Nui ana nā pu’ukani, ‘o Hanale Bishop, ‘o Koa Hewahewa, ‘o Skippy Ioane a pēlā aku. Aia ana ka mea ‘ai, ka makana a pëlā aku. E nānā aku ma “FACEBOOK.COM/HEHAWAIIAU.”
———
E ho’ouna ‘ia mai na ā leka iā mā ua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:
>> kwong@hawaii.edu >> rsolis@hawaii.edu a i ‘ole ia, ma ke kelepona: >> 956-2627 (Laiana) >> 956-2627 (Kekeha) This column is coordinated by Kawaihuelani Center for Hawaiian Language at the University of Hawai’i at Mänoa.
