Synopsis: Don’t miss the new play by Haili’ōpua entitled, “My Boy, He Play Ball.”

‘Ano’ai kākou i ke aloha, e nā hoa makamaka puni heluhelu iā Kauakūkalahale.

Ua kau iho nei kēia ‘ōlelo kā’au o nā kūpuna i po’omana’o no kākou, ‘oiai ‘akahi nō a lohe ‘ia kēia ‘ōlelo no’eau e nā pepeiao o’u. Pili ho’i kēia ‘ōlelo no’eau i kekahi mea e waiho pololei aku i mua pono ou, a ‘oiai ahuwale ia, ua nalowale aku iā ‘oe.

Lohe ‘ia kēia ‘ōlelo maika’i ma ka hana keaka nona ka inoa ‘o My Boy, He Play Ball. ‘O ka mea nāna i haku i ia hana keaka, ‘o Kumu Haili’ōpua Baker. He hoa makamaka ‘o ia no kākou, nā hoa ‘auamo kuleana ‘ōlelo Hawai’i. Ua kipa aku nei kēia mea kākau i ke kahua hana keaka ‘o Kumu Kahua ma ka hola 2:00 o ka ‘auinalā ma ka Lāpule aku nei i mea e nanea ai ko’u mau maka i ua hana keaka lā.

‘A’ole o kana mai ka maika’i o ua hana keaka lā. He kā’e’a’e’a maoli nō ‘o Baker i ka haku ‘ana i ka hana keaka. Kohu like nō ka mo’olelo me ka hapanui o nā mākuakāne ma Hawai’i nei. Hō’ike akula ua hana keaka lā i ka ‘oia’i’o o nā ‘ohana o nā ‘ālapa pā’ani pōpeku. A hō’ike ho’i i nā pōpilikia o kēia au hou e ne’e nei. ‘O Boy ka hāme’e nui o ua hana keaka lā. ‘O ia nei kai hele aku i ka ‘āina ‘ē i mea e pā’ani ai i ka pā’ani pōpeku. A he mo’olelo nō ho’i ua hana keaka lā, i ka hihia e ho’ohihi aku ai ko Boy na’au. ‘O ka hihia ho’i, ‘o ia ka hākōkō ‘ana ma waena o ka pā’ani pōpeku ‘ana a i ka hahai ‘ana i kona kuleana i pāhola ‘ia mai mai nā kūpuna mai.

E ulu a’e ana ka hoi ke naue aku i ka hale hana keaka ‘o Kumu Kahua, a ‘ike i nā helehelena kama’āina iā ‘oukou, nā hoa makamaka. Ua komo nō ho’i ‘elua me’e mai ka hana keaka lua ‘ole ‘o Lā’ieikawai i loko o ua hana keaka lā. A mālama ‘ia kēia hana keaka ma ka ‘ōlelo Pa’i’ai, a he launa maika’i i nā pepeiao i ma’a i ka ‘ōlelo Pa’i’ai. ‘A’ohe o’u makemake e ha’i hou i kēia mo’olelo iā ‘oukou, e nā mea heluhelu, ‘oiai e ho’okikina ana kēia mea kākau iā ‘oukou e naue aku i Ka’akopua e walea ai i ua hana keaka lā.

Mālama ‘ia ua hana keaka lā a hiki i ka lā ‘eono o kēia mahina a’e (Dēkēmapa) mai ka Pō’ahā a hiki i ka Pō’aono ma ka hola ‘ewalu o ke ahiahi. A ma ka Lāpule ho’i ma ka hola ‘elua o ka ‘auinalā. Mai kali a pau nā niho, o kō auane’i kēia ‘ōlelo no’eau a nā kūpuna o luna nei. O hala auane’i kēia hana keaka lua ‘ole e kū pololei i mua o ‘oukou ma Kou nei.

E huli aku a nānā ma lalo nei no nā ‘ike ko’iko’i a me ke kū’ai ‘ana mai i likiki ma ‘ane’i, ma www.kumukahua.org.

[Mahalo a nui e Kalikoaloha, no ka hele ‘ana aku i ia hana keaka a Haili’ōpua a me ke kākau ‘ana i nei mo’olelo i mea e hō’ike aku ai i ka lehulehu a me ka paipai ‘ana iā lākou e nānā aku. ‘A’ole ia he hana keaka ma ka ‘ōlelo Hawai’i, akā, maika’i ke kāko’o ‘ia nā mea kākau hana keaka a me nā mea hana keaka ma ka hele ‘ana e nānā.

A ‘o kekahi mea maika’i, he hana keaka ia ma ka ‘ōlelo Pa’i’ai, kekahi o nā ‘ōlelo o Hawai’i nei. A ‘o kahi mea maika’i, i kēlā pule aku nei, ua helu ‘ia ka ‘ōlelo Pa’i’ai o Hawai’i, he ‘ōlelo ‘i’o nō ia. Pēlā ka Helu Kanaka ‘Amelika Hui Pū ‘Ia. L.H.]

This column is coordinated by Kawaihuelani Center for Hawaiian Language at the University of Hawai‘i at Mānoa.