Synopsis: Discussion of the transit of Venus and the names of the planets that orbit the sun.

———

Welina e nā makamaka heluhelu o Kauakūkalahale. Ua ‘ike aku nei paha ko ‘oukou mau maka i ka mā’alo ‘ana a’e o Hōkūloa ma mua pono mai o ka lā i ka Pō’alua nei? He mea nui paha ia, no ka mea, ua ‘ōlelo ‘ia, he hiki i ke kanaka akeakamai ke ana i ka Paralake (parallax) o ka Lā. A ma o ia Paralake e ‘imi ai ke kanaka akeakamai i ka loa mai ka Honua aku a hiki i ka Lā (Ka Nupepa Kuokoa, Nowemapa 26, 1864).

A ‘o kekahi mea nui, inā ‘a’ole ‘oukou i ‘ike aku i ia hele ‘ana o Hōkūloa ma luna o ka maka o ka lā i ka Pō’alua nei, ‘a’ole nō ‘oukou e ‘ike iki aku. Aia wale nō paha a lō’ihi ko ‘oukou mau makahiki e ola ai, e like me ko Kūali’i, a laila, e hiki ke ‘ike aku. No ka mea, ‘o ka makahiki e mā’alo hou ai ‘o Hōkūloa ma mua pono mai o ka lā, ‘o ia ka makahiki 2117.

A ua pōmaika’i ko ‘oukou mea kākau, no ka mea, ma ua lā nei, e iho ana kēia i ke alapi’i ma ka Hale ‘o Spalding no ka hui pū ‘ana me ka wahine aloha, a ma ia iho ‘ana i ke alapi’i, e iho pū ana ka luna o ke Ke’ena IPLL o ke Kulanui o Hawai’i ma Mānoa, ‘o John Mayer, a ua loa’a kāna pale kilo lā. (‘Auhea ‘oukou, mai nō a poina, ‘a’ole e nānā wale ka maka i ka lā e kau ana, o pilikia auane’i ka maka, a ‘o ka makaaniani pale lā, ‘a’ole lawa ke pale ‘ana aku, he pono ke pale kilo lā.) A ma ka hiki ‘ana iho i lalo o Spalding, nānā a’ela ‘o John i luna i ka Lā me ia pale kilo lā, a ‘oiai, ‘o ka ho’omaka wale nō ia o Hōkūloa e ‘ike ‘ia ma ka lihilihi o ka Lā, ‘a’ole i mōakāka pono. Noi akula ko ‘oukou mea kākau iā John i kāna pale kilo lā, a i nānā aku ka hana o ko ‘oukou mea kākau, ua ‘ike ‘ia nō, he hapa kiko wale nō ia. A ma ka ‘olu’olu o John, hā’awi maila ‘o ia i pale kilo lā na ko ‘oukou mea kākau. A i ka nānā hou ‘ana a’e i ka Lā he kanakolu paha minuke ma ia hope mai, ua komo le’a mai ‘o Hōkūloa ma ke alo o ka Lā. He kiko ‘u’uku wale nō ia i ka maka o ka Lā.

Ma muli o ia, komo ihola ka mana’o i loko o ko ‘oukou mea kākau, e ‘imi aku i nā inoa o nā Hōkūhele, a ua loa’a maila nō. ‘O Hōkūloa, ‘o Venuka ia. ‘O Ukali (Ukaliali’i), ‘o Melekulia nō ia. ‘O Holoholopīna’au (a ‘o Hōkū’ula paha i kekahi manawa), ‘o Maleka nō ia. ‘O Ka’āwela, ‘o Iupika nō ia. ‘O Nāholoholo (a ‘o Makulu i kekahi manawa), ‘o Kakulena ia. ‘O Helekela, ‘o Ulano ia. A ho’okahi Hōkūhele, ‘a’ohe ona inoa Hawai’i, ua ho’ohawai’i wale ‘ia iho nō kona inoa haole. ‘O ia ‘o Nepetune. He aha lā ke kumu i loa’a ‘ole ai kona inoa Hawai’i pono’ī? A he inoa nō paha, ‘a’ole na’e i loa’a i ko ‘oukou mea kākau.

A ‘o kekahi mea i ulu ai ka hoi, ma ka puke a Fornander, hō’ike mai ‘o ia he mau inoa ko Venuka, ‘o Nāholoholo a me Ka’āwela i kona wā he Hōkū kau ahiahi, a i kona kau ‘ana i ke kakahiaka, ‘o Mānanalo a me Hōkūloa. He kumu paha i kapa ‘ia ai ‘o Venuka lāua ‘o Kakulena ma ka inoa ho’okahi? E ‘olu’olu, inā maopopo paha i kekahi o ‘oukou, e hō’ike mai.

Ua lawa paha ia. Ke ho’i aku nei ko Mānana uka keiki, ua ahiahi. Ke aloha.

———

This column is coordinated by Kawaihuelani Center for Hawaiian Language at the University of Hawai’i at Mānoa.