Synopsis: This issue marks a milestone for Kauakūkalahale — 10 years and counting!
Aloha mai kākou e nā hoa o Kauakūkalahale. E kala loa nō ko kākou hālāwai ‘ana ma loko o ke kino nui o ka StarAdvertiser. Ua hele aku nei au i Kalalau a ho’i mai. A he mahalo nui ko’u i ka ho’omanawanui ‘ana o ko’u hoa ‘alo like i ka ‘īnea, ‘o Kekeha Solis, nona ho’i ka ‘amo e pī nei i kēlā me kēia pule ma ka mālama ‘ana i ke kolamu.
Ua ho’okumu ‘ia kā kākou kolamu ‘ōlelo kanaka i ka mahina ‘o ‘Okakopa i ka MH 2002. Auē nō kā ho’i ē! Ua aha ‘ia kēlā mau makahiki he ‘umi i ka’ahope aku? Ma ka nānā ‘ana i ke aniani kilohi, ua hele a nui maila nā welelau hinahina e kau li’ili’i nei ma ka lauoho. ‘A’ole na’e e hihi. Ua mau nō ke kolamu a ua mau nō ho’i ka hāmama o ka ‘īpuka, kahi e komo mai ai ka mana’o o kēlā me kēia kanaka e ‘i’ini nei e hō’ike aku i kona nani i mua o ke ākea. A pēlā nō ka mana’o nui o kēia papahana mai ka wā mai i ho’okumu ‘ia ai he ‘umi makahiki aku nei a hiki i kēia wā.
Eia na’e ka mea ‘āpiki. He kāka’ikahi wale nō nā kolamu e hō’ea mai ana ma loko o ko māua pahu leka. Ua pohō nō paha kēlā mau ‘īniha ‘elua ma lalo loa o ke kolamu, kahi i hō’ike ‘ia ai ko māua inoa leka uila. He aha ka waiwai o ia māhele inā ‘a’ohe hua e loa’a mai ana? Mai poina, ‘eā, na kākou kēia kolamu, kahi e hō’ike ākea ai i ko kākou mana’o no nā nīnau wāhi pūniu like ‘ole o ka honua nei. ‘A’ole ia na māua wale nō.
He aha lā ho’i ke kumu e hana ‘ole ai? Mali’a, ua hilahila i ka hemahema. Eia kā māua: ‘A’ohe mea hemolele! Mali’a, ua maka’u o manakā ka mana’o. ‘Eā, ua hiki nō ke ho’ohiala’ai ‘ia nā kumuhana a pau! Mali’a, ua ku’ihē ka na’au a ‘a’ole makemake e hō’eha aku i ka na’au o ha’i. ‘Eā, na ha’i nō e hō’ike mai i kona mana’o kū’ē! Pēlā e ‘ike ‘ia ai nā ‘ao’ao ‘elua o ka nīnau. Pēlā nō ho’i e na’auao ai kākou a pau. A inā e kākau kākou a pau, pēlā e ulu ai ke kolamu. Mali’a o piha ho’okahi ‘ao’ao! E ola ka ‘ōlelo Hawai’i!
———
E ho’ouna ‘ia mai na ā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:
>> kwong@hawaii.edu
>> rsolis@hawaii.edu
a i ‘ole ia, ma ke kelepona:
>> 956-2627 (Laiana)
>> 956-2627 (Kekeha)
This column is coordinated by Kawaihuelani Center for Hawaiian Language at the University of Hawai’i at Mānoa.
