Synopsis: I would encourage all pregnant women to consider opting for natural childbirth practices.

———

Aloha mai e nā hoa heluhelu. ‘O au ‘o Puanani Kama (Reis-Moniz) a e lilo ana au i makuahine i loko o kekahi mau pule, no laila, ua mana’o au e hō’ike aku iā ‘oukou i kekahi mau hana o ka hānau kūpono ‘ana a me ka maika’i o ia ‘ano hānau ‘ana.Ua pōmaika’i nō mākou, nā wāhine hānau keiki, no ka mea, ua pili mākou iā Haumea. Eia hou, na ke Akua i hana iā mākou me ka ho’omākaukau pono ‘ana i ko mākou kino no ka hānau kūpono ‘ana i ke keiki. A eia hou kekahi mea maika’i o ka hānau kūpono ‘ana, ‘o ia nō ke komo ‘ole aku o ka lā’au i loko o ke kino palupalu o ke keiki. I ko’u heluhelu ‘ana i kekahi mau puke no ka hānau keiki ‘ana, ua ho’omaopopo a’ela au, he mea maika’i ka ho’omākaukau ‘ana o ka wahine i kona kino ma mua o ka wā hānau, no ka mea, i kekahi manawa, lō’ihi ka wā hānau a ‘eha’eha loa nō ho’i, a ‘o ka lawelawe i kēia ‘ano hana ‘o ka ho’omākaukau kino ka mea e emi ai ia mau mea a ma’alahi ai ka hānau ‘ana.

Wahi a ka lohe, he mea maika’i ka lā’au i kapa ‘ia ‘o Epidural, no ka mea, ‘o ia ka mea e emi ai ka ‘eha’eha o ka wahine hānau keiki. Eia na’e, he mea kēia lā’au e pilikia ai ka wahine i kekahi manawa, no ka mea, no ka ‘ike ‘ole i ka ‘eha, ‘a’ole maopopo i ka wahine ke ‘ano o ka pahu ‘ana a me ka wā e pahu ai. Eia hou kekahi mea e maka’u ai i ka lā’au. He hou ‘ia ke kui ma ke kua o ka wahine, a inā e hou hewa ke kauka i ke kui ma kahi kūpono ‘ole o ka iwikuamo’o, e lōlō ana ka wahine. He mea kēia kui Epidural e maka’ala ai.

I kekahi wā hānau o ko’u hoa, ua lapa’au ‘ia ‘o ia i ka lā’au Epidural, a ‘a’ole ‘o ia i hānau ma ke ‘ano ma’amau. Ua pono ke kauka e kaha i kona ‘ōpū i mea e hānau ai. No laila, i kēlā manawa, ‘o ia ho’i ke kaha ‘ana i ka ‘ōpū me ka pahi, ua pono ka Epidural. Eia na’e, ke mana’o nei au, inā ua lapa’au ‘ole ‘ia ‘o ia me kēia lā’au, inā ua maika’i kona kino no ka hānau kūpono ‘ana. He mea kēia e no’ono’o ai. Wahi a kekahi mau kauka, ua ‘oi aku ka maika’i o ka hānau kūpono ‘ana, no ka mea, pēlā ka hana ma’amau o ke kino, ‘a’ole i ho’ololi ‘ia. Inā e ho’okomo ka wahine i nā lā’au kūpono ‘ole, ‘a’ole hiki iā ia ke kāohi iho me ka maika’i.

He mana’o kēia e ho’olaha aku ai i nā wāhine a pau. He mea maika’i ka hānau kūpono ‘ana. Hiki nō i nā wāhine a pau ke hana pēlā. ‘O ka mea nui ka ho’ā’o. Mana’olana au e hana pēlā ‘oukou a pau, e nā mākuahine, a ‘o au kekahi e hana ana i ko’u wā e hānau ai. No ka manawa, e no’ono’o ‘oukou, e nā hoa heluhelu, i kēia hana kūpono. Mahalo no ka heluhelu ‘ana mai.

(Ua hau’oli ka na’au o māua nei o Kauakūkalahale i ka lohe ‘ana i kēia nū ‘oli, e Puanani. A mahalo ho’i i kēia mo’olelo āu e a’oa’o ana i nā wāhine i ‘ike lākou i kahi ala kūpono ke hiki aku i ko lākou wā e hānau ai i ke keiki. A mahalo ho’i no ka ho’okō ‘ana i ka ‘ōlelo mākia a ka Mō’ī Kalākaua, ‘o ia ho’i, “Ho’oulu Lāhui.” Luna Ho?oponopono)

———

E ho’ouna ‘ia mai na ā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:

>> kwong@hawaii.edu
>> rsolis@hawaii.edu

a i ‘ole ia, ma ke kelepona:

>> 956-2627 (Laiana)
>> 956-2627 (Kekeha)

This column is coordinated by Kawaihuelani Center for Hawaiian Language at the University of Hawai’i at Mānoa.