Synopsis: For Computer Science Education week, the Hour of Code was created to help people learn computer science.

———

Welina e nā makamaka heluhelu o Kauakūkalahale, ‘o nā pule hope loa kēia o ke kula ma mua o ka wā ho’omaha Kalikimaka, a no laila, ua pa’ahana paha, a no laila, ‘a’ole paha i lohe no kēia mea hou. ‘O ko ‘oukou mea kākau, ‘akahi nō a lohe no ia mea hou i ka Pō’ahā nei, ‘o ia ho’i, mai ka lā 9 o Kēkēmapa a i ka lā 15 o Kēkēmapa, ‘o ka Pule A’o ‘Epekema Kamepiula ia. A ‘o kahi mea i hana ‘ia no ke kōkua ‘ana i nā kānaka a pau, mai ke nui a ka li’ili’i, ma ke a’o ‘ana mai i ka haku ‘ana i ka helu ‘ālualua, he kahua ma ka pūnaewaele (csedweek.org/learn), kahi e a’o ai nā kānaka like ‘ole, mai ke kama iki a i ka ‘elemakule i ia hana kamepiula.

A he mea maika’i paha ke a’o ka po’e keiki a me ka po’e ‘ōpiopio i ka haku ‘ana i ka helu ‘ālualua a akamai ma ia māhele, ‘oiai, pēlā paha kākou e holo mua ai ma kēia hope aku ma nā māhele a pau o ka nohona, ma ka lapa’au ‘ana paha i ke kanaka a pēlā aku. Inā i a’o ko ‘oukou mea kākou i ia hana i ka wā e kamali’i ana, inā ua pau i ka haku ‘ia kekahi mau polokalamu ma ka ‘ōlelo Hawai’i no ka iPona a me ka iPaka paha. Akā, ‘a’ole pilikia, ‘o ka wā nō kēia a kākou e a’o ai.

E kuhi paha kekahi, “’A’ole hiki ia’u ke a’o mai i ka haku ‘ana i ka helu ‘ālualua. ‘A’ole lawa ko’u akamai.” Mai nō a hopohopo, ‘o ko ‘oukou mea kākau kekahi i mana’o pēlā ma mua o ke kipa ‘ana aku i ia kahua. A ua komo maoli nō i ka papa a’o haku helu ‘ālualua ma ke Kulanui o Hawai’i ma Mānoa. Akā, ‘a’ole nō i ‘a’apo ‘ia mai ia hana. A ua mana’o ihola ko ‘oukou mea kākau, “’O ka mamo hope loa paha au a Wa’awa’a mā.”

‘O ka mea e lana ai ka mana’o, he mau hana ko ia kahua (csedweek.org/learn) e a’o mai ai ka mea ‘akahi ‘akahi, a me ke kama iki paha i ka haku ‘ana i ka helu ‘ālualua. A inā he mana’o kou, he wai ‘au’au wale nō ia, he mau pae hou aku nō no ka po’e ‘a’apo, a me ka po’e paha i a’o iki paha ma mua.

Ke kauleo aku nei ko ‘oukou mea kākau, e ho’ā aku i ke kamepiula i kēia manawa ‘ānō, e ‘imi aku i ia kahu, a e ‘a’ako i ka hana. A inā he keiki paha kāu a he mo’opuna paha, e a’o like ‘olua i ka haku ‘ana i ka helu ‘ālualua i mea e pa’a ai ia ‘ano ‘ike iā ia ‘oi ‘ōpiopio. A i mea ho’i e ‘ike ai ka po’e keiki a kākou, he hiki nō iā lākou ke holo mua ma ia māhele hana a ma ia ‘oihana ho’i.

‘O ka mea minamina, ‘o ka lā 15 o Kēkēmapa ka lā hope loa o ia kahua pūnaewele. Inā he nui ka makemake o ka po’e na lākou i kūkulu i ia kahua e a’o nā kānaka he nui i ka haku helu ‘ālualua, e ho’omau ‘ia paha ia kahua no kekahi mau pule hou aku. A he wā kūpono ia no ka po’e keiki, ‘oiai, ‘a’ohe kula ma ia wā, he hiki iā lākou ke komo loa i loko o nā hana like ‘ole o ia kahua a pa’a loa ia mea ‘o ka haku hana ‘ālualua. A e haku ‘ia aku paha kekahi mau polokalamu kamepiula ma ka ‘ōlelo Hawai’i ma kēia hope aku.

———

This column is coordinated by Kawaihuelani Center for Hawaiian Language at the University of Hawai‘i at Mānoa.