Synopsis: Take care of our children. The things being testified about the treatment of Talia Williams are unbelievable.
Welina e nā makamaka heluhelu o Kauakūkalahale. ‘O ia po‘o mana‘o e kau a‘ela i luna, he ‘ōlelo ia mai kahiko mai, ‘o ia ho‘i, “He lani ke keiki, he milimili na ka makua.” Hō‘ike mai ua ‘ōlelo kahiko nei ē he nui ka hana ma ka mālama ‘ana aku i ke keiki, e like ho‘i me ka mālama ‘ana i ke ali‘i.
Ma ka ‘ike ‘ana i ia ‘ōlelo a me kekahi mau ‘ōlelo ‘ē aku paha, e la‘a me kēia ‘ōlelo nei, “He lei poina ‘ole ke keiki,” he mea mōakāka ke aloha i ke keiki. A no laila, ua kaumaha ihola ka na‘au o ko ‘oukou mea kākau i ka heluhelu ‘ana ma ka Hōkū Avalataisa nei no ka hana ‘ino a pepehi ‘ia ‘ana iho o Talia Williams e kona lūau‘i makuakāne a me kona makuahine kōlea. A i ka lā 16 o ka mahina ‘o Iulai o ka makahiki 2005, ‘o ia ka manawa hope loa o kona makuakāne, o Naeem Williams, i pepehi loa ai i ua kaikamahine nei. Aloha nō. Na ka lūau‘i makuakāne i pepehi i kāna kaikamahine a make.
Ua ‘ane like kēia mo‘olelo me ko Pa‘ahana, kaikama-hine noho kuahiwi. ‘O ka hopena na‘e, ua ‘oko‘a ko Talia, ‘oko‘a ho‘i ko Pa‘ahana. ‘O Talia, ua make ihola i ia lā 16 o ka mahina ‘o Iulai. A ‘o Pa‘ahana, ua pakele ‘o ia.
‘O ka hana a ka lūau‘i makuakāne a me ka makuahine kōlea o Talia, he keu aku ia a ka māna‘ona‘o ke heluhelu iho. Kohu mea lā, e mokomoko ana ‘elua mau kānaka makua ma ka UFC, ‘o ka pilikia na‘e, e kū‘ē ana kahi kanaka makua i ke kaikamahine li‘ili‘i, he ‘elima wale nō ona makahiki. Ma kahi mo‘olelo nūpepa o ka Hōkū Avalataisa o ka Pō‘ahā nei, ua ‘ōlelo ‘ia, ua hana keaka ‘o Delilah, ka makuahine kōlea o Talia, i ke ‘ano o ka hehi ‘ana aku o kona wāwae ma luna o Talia, he 17 mau lā ma mua o ka make ‘ana iho o Talia. Penei ia: Ua ho‘opa‘a ‘o ia (ka makuahine kōlea) i ke pākaukau, a kū ihola ma kona wāwae hema, a hehihehi ihola kona wāwae ‘ākau i luna o ke kaikamahine. Ha‘i akula ‘o Delilah, ua hehi ‘o ia i ka ‘ōpū o Talia he ‘ewalu manawa a ‘oi aku a emi mai paha. A ua ho‘ohana ‘o ia i ka ikaika a pau i loa‘a iā ia ma ka hehi ‘ana. A ‘o ka lohe a ‘ike ‘ana paha i ka haki ‘ana o kekahi mea ma lalo o kona wāwae, ‘o ia ka mea i pau ai kona hehi ‘ana. Ua hō‘ike ia makuahine kōlea i kekahi mau hana ‘ino hou aku āna i kāna kaikamahine kōlea, akā, ‘a‘ole nō e hō‘ike ‘ia i loko nei. ‘O ka ‘ōlelo wale nō e ho‘opuka ‘ia i kēia manawa, ‘o ia ho‘i, E kanono ka ho‘opa‘i i kēia mau mākua ho‘omāinoino.
‘Auhea ‘oukou e nā mākua mea keiki, i ko ‘oukou wā e uluhua ai a i ka wā ho‘i e ulukū ai ka no‘ono‘o, mai nō a lele ka lima ikaika o ka makua i ke keiki. He mea ‘ole inā ‘o ia keiki ka mea i ulukū ai ka no‘ono‘o a ‘a‘ole paha. ‘O ke keiki, he lei aloha mau nō ia na kākou e mālama pono ai.
E ho‘ouna ‘ia mai na ā leka iā māua, ‘o ia ho ‘i ‘o Laiana Wong a me Kekeha Solis ma ka pahu leka uila ma lalo nei:
» kwong@hawaii.edu
» rsolis@hawaii.edu
a i ‘ole ia, ma ke kelepona:
» 956-2627 (Laiana)
» 956-2627 (Kekeha)
This column is coordinated by Kawaihuelani Center for Hawaiian Language at the University of Hawai‘i at Mānoa.