Synopsis: The new bicycle lane is good but risky.

Aloha mai kākou e nā makamaka heluhelu o Kauakūkalahale. ‘O ia po’o mana’o e kau a’ela i luna, he lālani ia no loko mai o ke mele ‘o Sweet Lei Lehua, ‘o ia ho’i, Ka’a baisikala go front come back.

A ho’omana’o a’ela ko ‘oukou mea kākau i ka hīmeni ‘ana o ‘Anakala Kimo Alama Keaulana i ua mele nei ma kā pā’ina a me kekahi mau wahi o ka ‘āina. He mele hō’eu’eu kino nō, a ua piha hau’oli ka na’au o ko ‘oukou mea kākau i ka ‘ike ‘ana aku iā Sweet Lei Lehua ma ka CD a Nā Hoa i puka mai he ‘elua paha makahiki i hala iho nei.

A ‘o ke kumu e kau a’e nei ia lālani i po’o mana’o no kēia kolamu nei i kēia lā, e kama’ilio ‘ia ana ke ala holo ka’a paikikala, holo ka’a hehi wāwae ho’i o O’ahu nei e moe ana ma ke alanui Mō’ī, mai ke alanui ‘o Alapa’i a i ke alanui ‘o Isenberg.

Ke no’ono’o iho, he mea maika’i paha ke ala holo paikikala, ‘oiai, ‘o ka wāwae ka mea e holo ai ke ka’a paikikala, ‘a’ole ‘o ka ‘aila, a no laila, ‘o ka holo paikikala kekahi mea e mālama ‘ia ai ka ‘āina.

‘O kekahi, ‘a’ole pono ka ‘aila, no laila, ‘a’ole e lilo aku kāu mau kenikeni a kālā ho’i i nā hui kū’ai ‘aila.

‘O kahi mea ‘āpiki, i ka lohe ‘ia ‘ana no ua wahi ala holo paikikala, ua ho’omaka ihola ke emi ‘ana mai o ke kumu kū’ai ‘aila. Maka’u paha nā hui kū’ai ‘aila i ka lele nui ‘ana o kānaka i ka holo paikikala.

He hana ho’oikaika kino nō ho’i ka holo ka’a hehi wāwae. He mea ia e emi ai nā paona i lu’ulu’u ai ke kino a me ka pu’uwai ho’i. A no laila, he mea maika’i kēia hana a ke kūlanakauhale. Kohu mea lā, ke no’ono’o nei nā luna kau kānāwai a me ka meia i ka pono o ke kanaka.

‘O kahi pilikia na’e, ‘a’ole i pau pono nā mea a pau o ia ala hou, a no laila, he huikau paha nā kānaka a pau, ka po’e kalaiwa ka’a ‘okomopila a me ka po’e holo paikikala. I kēia manawa, he ho’okahi wale nō kaha kuhi ma ke ala e kuhikuhi ana i ka ‘ao’ao ma Lē’ahi.

Ua ‘ōlelo ‘ia, he hiki i ka po’e holo paikikala ma ua ala nei, ke holo no Lē’ahi, a he hiki nō ho’i ke holo no ‘Ewa, ‘a’ole na’e i pau ke kaha kuhi i ke pena ‘ia, a ‘a’ole ho’i i pau i ke kūkulu ‘ia nā kukui hō’ailona no nā mea holo ka’a hehi wāwae e holo ana no ‘Ewa.

He kāka’ikahi nā ka’a paikikala ma ua ala hou i kēia mau lā mua (‘akahi nō a wehe ‘ia i ka lā ‘eono o ka mahina ‘o Kēkēmapa i hala iho nei), akā, inā he nui a he li’ili’i paha, ‘o ka mea e hopohopo nei ko ‘oukou mea kākau, ‘o ia ka huli hema ‘ana o nā ka’a.

Inā no ‘Ewa wale nō e holo ai nā ka’a paikikala, he ma’alahi wale ka ‘ike ‘ana aku o ka po’e kalaiwa iā lākou, akā, inā e hele like ana ke ka’a a me ka paikikala no Lē’ahi, he pa’akikī.

‘O ia paha ke kumu e hiki ‘ole ai i nā ka’a hamu ‘aila a iho uila ho’i ke hana pēlā. He pono i ke ka’a ke hele aku a i ke ala o ka ‘ao’ao hema i mea e huli hema aku ai a pēlā pū ho’i me ke ala o ka ‘ao’ao ‘ākau no ka huli ‘ākau. ‘A’ole hiki ke huli hema wale a huli ‘ākau wale paha mai kahi ala o waena o ke alanui. No ke aha lā e hiki ai ke hana pēlā me ka paikikala?

‘A’ole like ke ko’ele wāwae me ka mea holo paikikala. ‘Oi aku ka wikiwiki o ka holo paikikala. No laila, e ‘olu’olu, e maka’ala kākou a pau i ka wā e holo ana ma ke alanui.

This column is coordinated by Kawaihuelani Center for Hawaiian Language at the University of Hawai’i at Mānoa.