Synopsis: It seems people are more prepared this time for the possible natural disaster, but a couple of different problems have arisen.

———

‘O ia ‘ōlelo e kau a’ela i luna i po’o no ke kino nui nepunepu o Kauakūkalahale i kēia lā, no loko mai ia o kahi ‘ōlelo kahiko mai nā kūpuna mai, a penei ka ‘ōlelo piha, “Ako ‘ē i ka hale a pa’a a i ke komo ‘ana mai o ka ho’oilo, ‘a’ole e kulu i ka ua o Hilinehu.” He ‘ōlelo no’eau kēia no ka pono o kākou, no ka mea, ma mua, i ka wā e noho ana nā kūpuna i ka hale pili, inā hemo paha kekahi māhele o ke pili, a helele’i ka ua, e pulu ana ‘o loko o ka hale. A no laila, e ho’oponopono ‘ē ‘ia ia mau māhele o ka hale i ‘ole e kulu ka ua i loko. A ‘o ia ‘ōlelo kahiko, ‘a’ole wale nō ia no ke ako ‘ana i ka hale. He pili i ka ho’omākaukau ‘ana no nā ‘ano hana like ‘ole i ‘ole e pilikia. A ‘o kekahi, ‘o ia ka ho’omākaukau ‘ana i ka hale a me ka ho’olako ‘ana i ka hale i mākaukau i ka wā e pāhola mai ai ka makani pāhili, e like me ka makani pāhili ‘o Iselle a me ka makani pāhili ‘o Julio. (Kohu mea lā, e kā’alo wale ana nō ka makani pāhili ‘o Julio i ka ‘ao’ao ‘ākau o ko kākou pae ‘āina.)

‘O ka ho’olako ‘ana i ka hale i ke kini mea’ai a me ka wai a me nā mea ‘ē a’e e pono ai ke pau ka uila, he mea nui nō ia. A ma ka pule i hala iho nei, ‘a’ole nō i kū’ai pupule kānaka i ia mau pono, e like me kekahi wā ma mua i kau ai ka weli i ka hiki ‘ana mai o ke kai ho’ē’e.

‘O kahi mea na’e i kanikani ai ka waha o kekahi mau kānaka, ‘o ia ka ho’opi’i ‘ino ‘ia ‘ana o ke kumu kū’ai o ka wai ma kekahi hale kū’ai. Ma ka Hōkū-Avalataisa o ka Pō’alima nei, hō’ike ‘ia ka mo’olelo o kekahi kanaka i uku i $48 no ‘elua pahu ‘ōmole wai (he 24 ‘ōmole o ka pahu) ma kekahi hale kū’ai. ‘O ia ho’i, ua kū’ai ‘ia nā ‘ōmole wai ma ke kumu kū’ai o ka ‘ōmole ho’okahi. Wahi a ka waha ‘ōlelo o ia hale kū’ai, ‘a’ole i ho’opi’i ‘ia ke kumu kū’ai o ka ‘ōmole wai, akā, inā kū’ai ke kanaka i nā ‘ōmole wai he nui e kū’ai pākahi ‘ia nei, a laila, e nui ana ke kālā e ho’olilo ‘ia ana. ‘O kahi mea maika’i, ua kau aku nei kahi kānāwai e ho’opa’a ana i nā kumu kū’ai o nā pono ma Hawai’i nei, ‘a’ole hiki ke ho’opi’i ‘ia a hiki i ka lā 15 o ‘Aukake, i ‘ole e ho’opi’i ‘ino ‘ia ke kumu kū’ai o nā pono ma muli o ia mau makani pāhili ‘elua i ‘ōlelo ‘ia a’e nei. A e noi’i ‘ia ana ka hana a nā hale kū’ai, a inā ‘ike ‘ia ka ho’opi’i ‘ino ‘ana, e ho’opa’i ‘ia aku.

‘O kekahi mea minamina i ‘ike ‘ia ma Hawai’i moku, ua ‘aihue ‘ia kekahi kalaka o ka Hui Ke’a ‘Ula’ula. He kalaka ia e lawe aku ai i nā pono i nā kānaka i pilikia. I ka Pō’ahā nei paha ka hana a ka piko pau ‘iole. Aloha nō kahi hana lapuwale. He keu ia a ka no’ono’o ‘ole no ka pono o nā kānaka. Ke lana nei ka mana’o ua ho’iho’i ‘ia aku nei paha, a ua loa’a paha kekahi kalaka e lawe hele ai i nā pono ma ‘ō a ma ‘ane’i o ia mokupuni.

E ho’ouna ‘ia mai na ā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:

» kwong@hawaii.edu
» rsolis@hawaii.edu

a i ‘ole ia, ma ke kelepona:

» 956-2627 (Laiana)
» 956-2627 (Kekeha)

This column is coordinated by Kawaihuelani Center for Hawaiian Language at the University of Hawai’i at Mānoa.