Synopsis: There needs to be more education about the Ebola virus, so that we may be able to care for those who get sick anywhere, in the hospital, at home, etc., without contracting the virus.
Aloha nō. Ua make aku nei ‘o Thomas Eric Duncan i ka lā ‘ewalu o ‘Okakopa ma ka Haukapila Pelekepulikano Ola Kino o Tekeka. ‘O Duncan ka mea nāna i lawe i ka mea ho’oma’i ‘o Ebola i ‘Amelika Hui Pū ‘Ia. A he mea minamina ia, ‘oiai, ‘a’ole i mākaukau ia haukapila ma ka lawelawe ‘ana a me ka mālama ‘ana i ke kanaka i loa’a i ua mea ho’oma’i lā. Ma muli o ia kanaka ho’okahi, ua loa’a ‘elua kahu ma’i o ia haukapila i ka Ebola. ‘O Nina Pham ka mua, a ‘o Amber Vinson ka lua. ‘O lāua kekahi o nā kahu ma’i i mālama iā Duncan.
‘O ka mea ‘āpiki, aia nō nā luna o ia haukapila e ‘ōlelo a’e ana, ‘a’ole i maopopo ke ‘ano i lele ai ia mea ho’oma’i ma luna o nā kahu ma’i ‘elua, ‘oiai, ua hana ‘ia nā mea a pau e pono ai ke pale ‘ana aku i ia ho’oma’i, ua a’o pono ‘ia nā limahana a pēlā aku. Akā inā pēlā, pehea lā i lele ai ka Ebola a ma luna o ia mau kahu ma’i? ‘Eā, inā he ‘oia’i’o kā nā luna o ka haukapila, inā ‘a’ole paha i loa’a ia mau kahu ma’i ‘elua i ka Ebola. ‘Eā, ‘a’ole kēia ‘o ka wā e ho’opunipuni ai. Inā ua hemahema ka hana a ka haukapila, e ha’i pololei ‘ia aku, a e ho’oponopono ‘ia.
‘O ka hana i kēia manawa, ‘o ia ka ho’omākaukau pono ‘ana i nā kahu ma’i a pau a me ke a’o pono ‘ana ho’i iā lākou i nā mea a pau e pono ai ka mālama ‘ana i ke kanaka i loa’a i ka Ebola. A pēlā pū paha me ke a’o ‘ana i nā kānaka a pau o ka honua, i mākaukau kākou a pau ke hiki mai i ko kākou ‘āina e noho nei. A pa’a mai ia ‘ike i nā kānaka a pau, ‘a’ole e kau ka weli o kākou, ua maopopo ‘ē ka hana e pono ai ka mālama ‘ana. Inā e loa’a kekahi ‘ohana i ua ma’i lā, e hiki ana iā kākou ke mālama i ko kākou ‘ohana me ka lele ‘ole o ia ma’i ‘ino loa i luna o kākou.
Akā, e maka’ala nō ho’i kākou, inā ‘ike kekahi, ua launa pū paha ‘o ia me kekahi kanaka i loa’a i ka ma’i Ebola, mai hele ma ‘ō a ma ‘ane’i, mai nō a kipa kauhale, a wahi ‘ē a’e paha o lele auane’i kahi ma’i Ebola. E hele aku paha i ka haukapila, a e noho paha ma ka hale me ka maka’ala i ka loa’a a me ka loa’a ‘ole paha i ua ma’i lā.
A inā ua loa’a kekahi kanaka i ia ma’i, a aia ‘o ia ma ka haukapila e noho ana, e ‘ae ka haukapila i ke kipa ‘ana o ka ‘ohana a me nā hoa aloha, me ke komo ‘ana i nā ‘ano lole pale nāna e pale aku i ka Ebola. A eia mai kahi nīnau, he mea pono ia mau pale? ‘O ia wale nō ka mea e hiki ai ke lawelawe i ka mea ma’i Ebola? A i ‘ole ia, he mau ala.
Ua kuhi paha kekahi po’e kānaka, ma ‘Apelika wale nō e laha wale ai ka mea ho’oma’i Ebola ma muli o ke ‘ano nohona ma laila. Akā, ua lele koke nō ma ‘Amelika Hui Pū ‘Ia. A no laila, ke mana’o nei ko ‘oukou mea kākau, he hiki nō ke laha wale ma nā ‘āina like ‘ole. ‘O ka mea nui paha, ‘o ia ke a’o ‘ana i nā mea a pau no kēia mea ho’oma’i a me ke ‘ano o ka mālama ‘ana i ke kanaka i loa’a i ia mea ho’oma’i.
———
E ho’ouna ‘ia mai na ā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:
>> kwong@hawaii.edu
>> rsolis@hawaii.edu
a i ‘ole ia, ma ke kelepona:
>> 956-2627 (Laiana)
>> 956-2627 (Kekeha)
This column is coordinated by Kawaihuelani Center for Hawaiian Language at the University of Hawai’i at Mānoa
