Synopsis: The mayor of Honolulu signed into law Bill 42, Bill 43 and Bill 46. However, is Honolulu ready for these bills?

Welina e nā makamaka heluhelu, i ka Pō’alua nei, ua pūlima aku nei ka Meia Kirk Caldwell i kekahi mau pila ‘ekolu a lilo ai ia mau pila i mau kānāwai no ko O’ahu nei. ‘O ka mua, ‘o ka Pila 42 ia, e pāpā ana, ‘a’ole e noho a e moe paha ke kanaka ma nā pīpā alanui o Waikīkī. Aloha nō kahi kumukānāwai a Kamehameha I. ‘A’ole loa e ho’okō ‘ia ma kēia hope aku.

‘O ka lua o ka pila, ‘o ka Pila 43 ia, e pāpā ana, ‘a’ole e mimi a e ki’o paha ke kanaka ma nā wahi i hāmama ‘ia i ka lehulehu ma Waikīkī. A ‘o ke kolu o ka pila, ‘o ka Pila 46, e pāpā ana, ‘a’ole e mimi a e ki’o paha ke kanaka ma nā wahi ‘ē a’e o O’ahu nei, koe ke kaona a me ke Kaona Pākē, ‘oiai, ua pa’a ‘ē kahi kānāwai moku’āina e pili ana i ia mau wahi. Aloha nō, ‘a’ole e ‘ike ‘ia ana ka manu palupalu e waiho wale ana a ma lalo paha o kahi pāpale.

‘O ka ‘a’e ‘ana i ia mau kānāwai, he mau mikamina li’ili’i loa ia, a ‘o ka ho’opa’i, e uku ke kanaka i $1,000 a emi iho, a e noho pa’ahao he ho’okahi mahina a emi iho. Wahi a nā luna aupuni, ua hele a pihaku’i nā pīpā alanui o Waikīkī i ka po’e kuewa ma nā makahiki i hala iho nei, a emi loa ihola ka ho’i ‘ana mai o nā malihini māka’ika’i. A no laila, wahi a nā luna aupuni, he mau pila kēia e ho’oponopono ‘ia ai ka pilikia. Akā, pehea lā e kōkua ‘ia ai ka po’e kuewa ma o kēia mau kānāwai? He ho’okahi kaukani kālā ka ho’opa’i ki’eki’e loa. ‘A’ohe paha kālā o ka po’e kuewa. Pehea lā lākou e uku ai i ka ho’opa’i? A ‘o kekahi ho’opa’i, ‘o ka noho pa’ahao. Akā, ua ho’ouna ‘ia aku kekahi mau pa’ahao o Hawai’i i ‘Amelika e noho pa’ahao ai ma muli o ka piha’ū o nā hale pa’ahao o ‘ane’i nei. ‘A’ole paha lawa ka lumi e noho pa’ahao ai ka po’e kuewa ma O’ahu nei, a e pono ana paha ke ho’ouna ‘ia aku kekahi mau pa’ahao hou i ‘Alikona.

A no ka mimi a me ke ki’o ‘ana, i ka Pō’akahi nei, ‘akahi nō a ho’omaka iho ka hemo ‘ana o kahi hale ho’opau pilikia i nā hola a pau o ka lā, he 24. Aia nō ia ma kahi o ka hale māka’i o Waikīkī. ‘O ka pilikia, nui loa nō ‘o Waikīkī, a he ho’okahi wale nō hale ho’opau pilikia e hemo ana i nā hola a pau o ka lā. Pehea, inā aia ke kanaka ma kahi o ke ala wai ma ke alanui ‘o Paoakalani, a pu’u mimi a pu’u ki’o iho paha ‘o ia? ‘A’ole paha e hiki iā ia ke ‘u’umi iho a hiki aku i kahi o ka hale māka’i o Waikīkī, a e ‘oi aku ka pilikia, ke loa’a ke kanaka i ka ma’i mimi kō. Inā paha i kali nā luna aupuni a loa’a he mau hale ho’opau pilikia ma ‘ō a ma ‘ane’i o Waikīkī e hemo ana i nā hola a pau o ka lā, inā ua maika’i iki mai. ‘A’ole na’e e hihi, ua pau aku nei nā pila i ka pūlima ‘ia e ka Meia Kirk Caldwell.

‘Auhea ‘oukou e nā luna aupuni, e ho’olālā pono ke hana i kānāwai hou.

———

E ho’ouna ‘ia mai na ā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:

>> kwong@hawaii.edu

>> rsolis@hawaii.edu

a i ‘ole ia, ma ke kelepona:

>> 956-2627 (Laiana)

>> 956-2627 (Kekeha)

This column is coordinated by Kawaihuelani Center for Hawaiian Language at the University of Hawai’i.